«ՀՀ զինված ուժերը Կրեմլն օգտագործելու է իր քաղաքական նպատակների համար, ինչից Հայաստանը բացառապես տուժելու է»
18:50, December 3, 2016 | Այլ լրատվամիջոցներ, Նորություններ
ԳԱԼԱ-ի զրուցակիցն է Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը:
-Պարոն Սաքունց, օրերս շատ քննարկվեց այն հարցը, թե ինչ նպատակով ՀՀ և ՌԴ միջև ստորագրվեց հայ-ռուսական միացյալ զորամիավորման մասին համաձայնագիրը: Մի մասը սա համարում է անվտանգության ամրապնդում, կան նաև կարծիքներ, որ այդպիսով ՀՀ-ն ինքնիշխանություն է զիջում: Ձեր կարծիքը:
-ՀՀ և ՌԴ միջև մինչ այժմ կնքված պայմանագրերի իրականացման, դրանց պահպանման, դրանց ազդեցության վերաբերյալ փորձը ցույց է տալիս, որ, ցավոք սրտի, այդ պայմանագրերը բացարձակապես որևէ նշանակություն ու արժեք չունեն, ու անգամ թղթի կտորի արժեքը չունեն, որի վրա այդ պայմանագրերը կնքված են, մասնավորապես խոսքը վերաբերում է հայ-ռուսական պայմանագրին Գյումրիի 102-րդ ռազմաբազայի վերաբերյալ, որի կետերի խախտման ականատեսը եղանք Պերմյակովի կողմից Ավետիսյանների ընտանիքի սպանության քրեական գործի շրջանակում, երբ ռուսական բազայի ղեկավարությունն, ըստ հայ-ռուսական պայմանագրով սահմանված դրույթների, պատշաճ չէր տեղեկացրել ՀՀ իրավապահ մարմիններին Պերմյակովի՝ զենքով ռազմական բազայի տարածքը թողնելու մասին, երկրորդը, ակնհայտ խախտելով նույն պայմանագրի դրույթը՝ քրեական գործ էր հարուցել Պերմյակովի կողմից Ավետիսյանների ընտանիքի սպանության հիմքով, որի իրավունքը նույնպես չուներ:
Արթուր Սաքունց
Այսինքն մենք գործ ունենք մի իրավիճակի հետ, երբ որ, այսպես կոչված, հայ-ռուսական պայմանագրերը գործում են միայն ռուսական կողմի ցանկությամբ, ավելին, հայկական կողմը բացարձակապես այդ պայմանագրերով որևէ լծակ չունի՝ մասնավորապես ռուսական բազայի և ռուսական սահմանապահ ծառայության նկատմամբ վերահսկողություն իրականացնելու առումով, սա է իրականությունը, ու երբ որ այս պարագայում, այս հանգամանքներում կնքվում է նոր համաձայնագիր միացյալ զինվորական ստորաբաժանում ստեղծելու մասին, ելնելով այսօրվա պրակտիկայից՝ ավելի քան միանշանակ է, որ այդ համաձայնագիր ասածը կնքվում է ոչ թե երկու իրավահավասար կողմերի միջև, այլ դա համաձայնագիր է, որի բուն էությունը կայանում է ենթարկեցնել հայկական զինված ուժերի մի ամբողջ ստորաբաժանում ռուսական զինված ուժերի հրամանատարությանը:
– Եղան կարծիքներ, որ սա Հայաստանի հանդեպ ագրեսիայի դեպքում Հայաստանի անվտանգությունն ապահովելու խնդիրն է լուծում: Վիգեն Սարգսյանն էլ հայտարարեց, թե միացյալ զորամիավորման հիմնական խնդիրն է՝ «ժամանակին բացահայտել Հայաստանի և Ռուսաստանի դեմ ռազմական հարձակման նախապատրաստությունն ու նպաստել ՀՀ և ՌԴ ԶՈՒ-ի փոխգործակցության ամրապնդմանը»:
-Ռուսական կողմի պաշտոնատար անձինք բազմիցս հայտարարել են, որ Հայաստանում ռուսական բազան և ռուսական ներկայությունը բացարձակապես որևէ առնչություն չունի ղարաբաղյան կոնֆլիկտի թեժացման ժամանակ, դերակատարում չունի, նրանք բազմիցս վստահեցրել են, որ Արցախի ժողովրդի անվտանգության ապահովման առումով այս հայ-ռուսական պայմանագրերը որևէ նշանակություն չունեն, և ունենք մյուս փաստը, որ ռուսական կողմը հրապարակավ շարունակում է սպառազինումը կոնֆլիկտի կողմերին, և բնականաբար ավելի մեծ քանակով ադրբեջանական կողմին՝ արդեն 5 միլիարդ և ավելի դոլար սպառազինության վաճառքի մասին է խոսքը, և նաև վերջին հայտարարությունները, որ ավելի են սերտացնում իրենց համագործակցությունը հակամարտության մյուս կողմի հետ, այսինքն հայկական կողմին ենթարկեցնում են, իսկ մյուս կողմի հետ սերտացնում հարաբերությունները, և այս առումով պարզապես սա միջոց է ղարաբաղյան հարցում միանձնյա դերակատարում ապահովելու, որի մասին հրապարակավ հայտարարեց նաև Չավուշօղլուն, որ ողջունում է ու խրախուսում ռուսական կողմի ջանքերը ղարաբաղյան հարցի լուծման ուղղությամբ, այսինքն առանձնացնում է Մինսկի խմբի համանախագահներից մեկին՝ ՌԴ-ին, ու աչքաթող է անում, անտեսում է Ֆրանսիային ու ԱՄՆ-ին:
Բայց քանի որ նաև որոշակի տեղեկատվության արտահոսք եղավ, որ հնարավոր է ՀՀ-ն ներգրավվի ռուսական կոալիցիայի շրջանակներում Սիրիայում պատերազմական գործողությունների մասնակցելու նպատակով, ապա ավելի քան տրամաբանական է, որ որպես այդպիսի մասնակցության ռեսուրս կհանդիսանան հենց հայ-ռուսական միասնական զորքերը, որոնք, ինչպես ռուսական կողմից նշեցին, պատերազմական գործողությունների ժամանակ ամբողջովին հրամանատարությունն անցնում է ռուսական կողմին, իսկ տվյալ դեպքում պատերազմական գործողությունների վիճակում գտնվում է ՌԴ-ն, որն իր շահերի համար կօգտագործի նաև, այսպես կոչված, հայ-ռուսական միասնական զորամիավորումը, իսկ ռուսական զորամիավորումներն արդեն իսկ Սիրիայում են, և միացյալ քողի անվան տակ ուղղակի այնտեղ կավելացվեն հայկական զինված ստորաբաժանումները, որի հետևանքներն առավել քան ծանր կարող են անդրադառնալ և՛ ՀՀ, և՛ ԼՂՀ անվտանգության համար, քանի որ մենք գիտենք, որ Սիրիայում ՌԴ ռազմական գործողությունների հետ կապված բավականին լուրջ վերապահումներ կան, քննադատություններ այնտեղ ներկա արևմտյան երկրների կողմից ու բազմաթիվ մտահոգություններ, որ այդ ստորաբաժանումներն օգտագործվում են նաև խաղաղ բնակիչների դեմ, ավելին, նաև ռուսական կողմը հրապարակավ հայտարարել է, որ ինքը պաշտպանում է Ասադի բռնապետական ռեժիմը, դուրս է գալիս, որ օգտագործելու են ՀՀ զինված ուժերը, Կրեմլն օգտագործելու է իր քաղաքական նպատակների համար, որից Հայաստանը բացարձակապես ոչ թե որևէ օգուտ չունի, այլ միայն վնասներ ունի:
-Պարոն Սաքունց, այսինքն Ձեր կարծիքով այս պայմանագրով ռուսական կողմը ՀՀ զինված ուժերի ղեկավարումն իր ձեռքն է վերցնում:
-Խնդիրը կայանում է հետևյալում, որ հայ-ռուսական այս միացյալ զորամիավորման այն տեսքը, որ ներկայումս ձեռք է բերում այս պայմանագրով, ինքը լուրջ վտանգում է նաև ՀՀ զինված ուժերը, քանի որ ՀՀ զինված ուժերի մի ամբողջ ստորաբաժանում, ուղղակի ենթակայության տակ անցնելով, ասենք, ՀՀ դեմ պատերազմական գործողությունների ժամանակ ռուսական կողմի հսկողությամբ ինքը չի ենթարկվելու ՀՀ զինված ուժերի ղեկավարությանը, և այսինքն Հայաստանի Հանրապետության զինված ուժերի մի խմբավորում գործելու է ռուսական հրամանատարության ներքո, իսկ զինված ուժերի մյուս մասը՝ ՀՀ զինված ուժերի ղեկավարության ներքո: Եվ կարող են նաև ՀՀ զինված ուժերի այս երկու մասերը գտնվել բարիկադների տարբեր տեղերում, այսինքն այստեղ վտանգն այն է, որ ինքը կործանում է զինված ուժերի միասնականությունը, և, այսպես կոչված, այդ հայրենասերները, հանրապետական ու այդ կոռումպացված համակարգից սնվողները, որոնք հանուն հայրենիքի ու երկրի անվտանգության կուրծք են ծեծում, այս տարրական վտանգներն աչքաթող են անում՝ հանուն իրենց իշխանության պահպանման, քանի որ այս զիջումներն արվում են ոչ թե ՀՀ անվտանգության, այլ հանուն ՌԴ քաղաքական շահերի սպասարկման, և հիմա վերջին ազգային ինստիտուտը, պետական ինստիտուտը՝ հանձինս զինված ուժերի, տրոհվում է, և ոչնչացվում է դրա միասնականությունն այս համաձայնագրով, սա ուղղակի հարված է ՀՀ ինքնիշխանությանը: