0 8000 12 11

2017 թ. ապրիլի 2-ին կայացած ՀՀ ԱԺ ընտրությունների ընթացքում Հելսինկյան Քաղաքացիական Ասամբլեայի Վանաձորի գրասենյակի դիտորդը «Անկախ դիտորդ» հասրակական դաշինքի կազմում  իրականացրած դիտորդական առաքելության ընթացքում Արմավիրի մարզի թիվ 14/10 ընտրական տեղամասում, ի թիվս այլ խախտումների, նկատել է նաև նույն անձի կողմից ինքնուրույն քվեարկելու հնարավորություն չունեցող անձանց երեք անգամ օգնելու դեպքեր, և այս խախտման վերաբերյալ առաջարկել է գրառել տեղամասային ընտրական հանձնաժողովի գրանցամատյանում։  հանձնաժողովի նախագահը անհիմն  մերժել է դիտորդի պահանջը:

Տեղամասային հանձնաժողովի անգործությունը ոչ իրավաչափ ճանաչելու և դիտորդի գնահատականը գրանցամատյանում արձանագրելուն պարտավորեցնելու պահանջով բողոք է ներկայացվել թիվ 14 տարածքային ընտրական հանձնաժողով, որը ևս, քննելով բողոքը, մերժել է այն: Ընդ որում՝ տարածքային ընտրական հանձնաժողովը մերժել է դիտորդի ներկայացուցչի՝ տվյալ տեղամասի տեսանկարահանման ֆայլը հետազոտելու միջնորդությունը, և վկայակոչել է դիտորդի կողմից նույն տեղամասում արձանագրված այլ խախտումների վերաբերյալ գրանցամատյանում արված գրառումները, որոնք որևէ առնչություն չունեն վկայակոչված խախտմանը:

Այսպիսով՝ խախտվել է ոչ միայն դիտորդի՝ ընտրական օրենսգրքով ամրագրված իրավունքը, այլև խոչընդոտվել է դիտորդական առաքելության իրացումը:

Հաշվի առնելով ընտրական հանձնաժողովի կողմից համանման իրավիճակներում վերը նշված գործողությունները կատարելու վտանգի առկայությունը՝ դիտորդ Օ. Ա.-ն և ՀՔԱ Վանաձորի գրասենյակը դիմել են ՀՀ Վարչական դատարան՝ 14/10 ընտարական տեղամասի հանձնաժողովի գործողությունները ոչ իրավաչափ ճանաչելու, դիտորդի գնահատականն արձանագրելուն պարտավորեցնելու և թիվ 14 տարածքային ընտրական հանձնաժողովի՝ բողոքը մերժելու մասին որոշումն անվավեր ճանաչելու պահանջով:

2017 թ. ապրիլի 12-ին ՀՀ Վարչական դատարանում կայացած առաջին դատական նիստի ընթացքում պատասխանող կողմը ժխտեց, որ դիտորդը վերոնշյալ ընտրախախտման վերաբերյալ գրանցամատյանում գրառում կատարելու պահանջ է ներկայացրել հանձնաժողովի նախագահին:

Նկատենք, որ թիվ 14 տարածքային ընտրական հանձնաժողովում դրա վերաբերյալ բողոքի քննության ընթացքում դա չէր վիճարկվել, ավելին՝ պնդել էին, թե գրառումը կատարվել է:

Այսօր արդեն հրապարակված վճռով դատարանը մերժեց դիմումը։