0 8000 12 11

Զինծառայող Ռազմիկ Պետրոսյանին զինծառայության համար պիտանի ճանաչելու մասին՝ ՀՀ Կենտրոնական ռազմաբժշկական հանձնաժողովի 2016 թ. մարտի 3-ի նիստի որոշումը ՀՀ Վերաքննիչ վարչական  դատարանի որոշմամբ կրկին առաջին ատյանի դատարանում է:

Ռազմիկ Պետրոսյանն ավելի քան մեկ տարի ծառայության մեջ է, և գրեթե ամբողջ ընթացքում ոտքերի այտուցվածության ու կոշտուկների պատճառով գտնվել է հոսպիտալում:

Վերոնշյալ որոշմամբ Կենտրոնական ռազմաբժշկական հանձնաժողովը վերջինիս պիտանի էր ճանաչել, սակայն նշել էր, որ ծառայությունը հնարավոր չէ կազմակերպել ստանդարտ կոշիկով և նրան, բացառության կարգով, կթույլատրվի կրել ոչ ստանդարտ կոշիկ:

Հաշվի առնելով այն, որ ոչ ստանդարտ կոշիկներ կրելը որևէ իրավական ակտից չի բխում՝ Ռ. Պետրոսյանի ներկայացուցիչ, ՀՔԱ Վանաձորի գրասենյակի փաստաբան Արայիկ Զալյանը ԿՌԲՀ նիստի որոշումը վիճարկելու նպատակով 2016թ. հոկտեմբերի 7-ին դիմել է ՀՀ Վարչական դատարան: Դատարանը հայցը վարույթ չի ընդունել՝ համարելով, որ վիճարկվող ակտը վարչական ակտ չի համարվում: Սակայն վերաքննիչ դատարանն այս եզրահանգումը սխալ է համարել՝ շեշտելով որ  անհնար է նման եզրահանգումներ կատարել՝ առանց վիճարկվող ակտը հետազոտելու, առավել ևս՝ գնահատել դրա իրավաչափությունը դրա բացակայության պայմաններում:

2017 թ. մայիսի 30-ին ՀՀ Վարչական դատարանում կայացած դատական նիստին դատարանը մերժեց ՀՀ Պաշտպանության նախարարության ներկայացուցչի միջնորդությունը՝ գործի վարույթը կարճելու մասին, և անցավ դատաքննություն: