Հունիսի 28-ին ՀՀ-ում ոտնատակ տրվեց արդարադատությունը և դա պատժիչ գործողություն էր հանրության նկատմամբ. Արթուր Սաքունց (տեսանյութ)
18:49, July 18, 2017 | Այլ լրատվամիջոցներ, Նորություններ
Գործընկերություն հանուն բաց հասարակության» նախաձեռնության կազմակերպած «Համակարգային անպատժելիությունը՝ որպես մարտահրավեր քրեական արդարադատությանը» խորագրով հանրային քննարկմանը Հելսինկյան քաղաքացիական ասամբլեայի Վանաձորի գրասենյակի նախագահ Արթուր Սաքունցն անդրադարձավ ՊՊԾ գունդը գրաված անձանց դատական առաջին նիստին, երբ ծեծի են ենթարկվել ամբաստանյալները:
Նա նշեց, որ այն, ինչ տեղի է ունեցել այդ օրը ցույց է տալիս, որ արդարադատության խորհուրդը չկա, վճռաբեկ դատարանի նախագահը գոյություն չունի, դատական իշխանությունը ներկայացնող ինքնակառավարման մարմինները չկան: «Երբ նիստը նախագահող դատարանը չի արձագանքում դատարանի շենքում տեղի ունեցող այդ ամեն ինչին և բացարձակապես որևէ գնահատական, վերաբերմունք չկա հանրության աչքում` ինձ, որպես ՀՀ քաղաքացու աչքում, դատական իշխանության նկատմամբ առանց այն էլ ցածր վստահությունը վերափոխվում է այլ բնույթի: Ես այդ շենքը մտնեմ, որ ի՞նչ անեմ, գործում է բռնության ենթարկելու հավանականություն, ըստ որի` կարող եմ դատական իշխանությունը ներկայացնող այդ մարմնում, որին պետք է դիմեմ իմ խախտված իրավունքը վերականգնելու հարցով, այնտեղ վերստին բռնության ենթարկվել»,-ասաց նա:
Արթուր Սաքունցն ասաց, որ քաղաքացուն զրկում են արդարադատությունից, իսկ զրկողների նկատմամբ դատական իշխանության ինքնակառավարման մարմինը որևէ արձագանք չունի: «Այսինքն՝ ինքը միացել է դատական իշխանությունը ոչնչացողներին կամ նրա բարոյազրկողներին»,-ասաց նա՝ նշելով, որ այս հարցը որևէ մեխանիզմով պետք է բարձրացնել արդարադատության խորհրդում կամ դատական իշխանության մարմիններ:
«Այս երևույթի գնահատականը դատական իշխանության կողմից պետք է, անպայման, ստանանք, գուցե նրանք սպասում են ինչ-որ մի դիմումի: Իրապես սա մի փակուղային իրավիճակ է և դատարան դիմելու վստահության վրա մեծ հարված հասցվում: Հունիսի 28-ին ՀՀ-ում ոտնատակ տրվեց արդարադատությունը և դատական իշխանությունը ոստիկանական խմբի կողմից և դա պատժից գործողություն էր ոչ թե «Սասնա ծռեր» խմբի անդամների նկատմամբ, այլ դատական իշխանության և հանրության նկատմամբ»,-ասաց նա և նշեց, որ բավականին լուրջ մարտահրավեր է դատական իշխանության նկատմամբ վստահության վերջին նշույլները ոտնատակ անելը:
«Պետք է փրկել ՀՀ արդարադատությունը և դատական իշխանությունը ոստիկանական բռնություններից: Մեզ ցույց տվեցին, որ ցանկացած ժամանակ մեզ կարող են ծեծել ոչ միայն փողոցում, այլ դատարանում»,-ասաց նա: