Բանակում պետք է կատարվեն այնպիսի փոփոխություններ, որ ծառայությունից խուսափելը դիտարկվի խայտառակություն
18:36, November 11, 2017 | Այլ լրատվամիջոցներ, Նորություններ
Արտերկրում գտնվող հայերից շատ քչերն են օգտվում այն հնարավորությունից, որ կարող են նախքան 27 տարին լրանալը բանակում չծառայած տարիների համար գումար վճարել, գալ Հայաստան ու խուսափել քրեական պատասխանատվությունից: Այս մասին Lragir.am-ի հետ զրույցում ասաց իրավապաշտպան Արթուր Սաքունցը՝ անդրադառնալով «Սահմանված կարգի խախտմամբ պարտադիր զինվորական ծառայության չանցած քաղաքացիների մասին» օրենքի նախագծում կատարվող փոփոխություններին:
Նշենք, որ Ազգային ժողովի պաշտպանության և անվտանգության հարցերի մշտական հանձնաժողովը հաստատել է այս օրենքի նախագիծը, որով առաջարկվում է պարտադիր զինծառայություն չանցած, արտերկրում գտնվող և 27 տարեկանը լրացած երիտասարդներին այս անգամ էլ հնարավորություն տալ վճարում կատարել և ազատվել հետախուզումից: Նախագծի նախնական տարբերակով առաջարկվում էր յուրաքանչյուր զորակոչի համար վճարի չափ սահմանել 500 հազար դրամը, սակայն քննարկումների արդյունքում որոշվեց այդ չափը սահմանել 200 հազար դրամ՝ ներկայիս 100 հազարի փոխարեն:Այսպիսով, մինչև 2017-ի դեկտեմբերի 1-ը բոլոր նրանք, ում 27 տարին կլրանա, կարող են ամեն զորակոչի համար 200 հազար դրամ վճարելով, ազատվել հետապնդումից ու վերադառնալ հայրենիք:
«Ես պրակտիկայում չեմ հիշում, որ շատերը դիմած լինեն՝ այդ որոշումից օգտվելու համար: Բայց մի բան հստակ է, որ ինչքան գումարի չափը բաձրացնեն, այնքան հավանակությունը կնվազի, որ մարդիկ փորձեն օգտվել այդ օրենքից: Դա մի պարզ պատճառ ունի, մարդիկ ֆինանսական հնարավորություններ չունեն: Այնպես չէ, որ եթե նրանք արտասահմանում են ապրում, բոլորն ունեն մեծ հնարավորություններ»,- ասաց Արթուր Սաքունցը:
Նրա խոսքով՝ մի կողմից իշխանություններն ասում են, որ ժողովրդագրական խնդիրների մասին են մտածում, բայց գործողությունների տրամաբանությունը լրիվ հակասում է այդ մտահոգություններին:
«Էլ չեմ խոսում այն մասին, որ եթե 500 հազար դրամ լիներ, ավելի կբարդանար վիճակը: Ինձ հետ արդեն արտասահմանից կապվել են ու մտահոգվել, թե արդյոք՝ այդ 9 մլն դրամը, որը նախատեսվում էր նախնական նախագծով գանձել, նախորդ դեպքերի վրա տարածվո՞ւմ է, թե ոչ: Այսինքն՝ կոնկրետ մարդը ցանկություն ուներ գալ Հայաստան, բայց գումարի հետ կապված մտահոգություն ուներ»,- հավելեց նա:
Նա նշեց, որ ընդհանրապես մինչև 27 տարեկան չծառայած երիտասարդների համար փոխհատուցման որոշումը պետք է հանվի և կիրառվի հանցագործության վաղեմության ժամկետի դրույթը:
Երկրորդ, օրենսդիրները պետք է գիտակցեն, որ պատժողական մոտեցումենրով խնդիրը չի լուծվի, որովհետև նախ պետք է լուրջ փոփոխություններ կատարվեն երկրում՝ կոռուպցիայի դեմ պայքար, արդարադատության ապահովում, տնտեսական ազատություններ, նորմալ ընտրություններ: Եվ նաև, ըստ Սաքունցի, հենց զինված ուժերում պետք է կատարվեն այնպիսի փոփոխություններ, որ մարդկանց համար զինվորական ծառայությունից խուսափելը դիտարկվի որպես խայտառակություն: Այնինչ, այսօր այն իրավիճակն է, որ հասարակության մեծամասնության համար բանակից խուսափողները չեն համարվում հանցագործներ:
«Եթե դու ոչ մի բան չես առաջարկում՝ ապահովություն, անվտանգություն, արժանապատիվ վերաբերմունք ծառայողի նկատմամբ, բայց նրա նկատմամբ պատժողական մոտեցում ես ցուցաբեում, ապա այդ դեպքում բանակից խուսափելը դառնում է որպես գերակա մոտիվ: Դու՝ որպես պետություն, չես արել այնպիսի բարեփոխումներ, որ մարդիկ չխուսափեն բանակից: Քո չարածների համար են հիմա մարդիկ խուսափում», ասաց իրավապաշտպանը: