«Թեղուտ» ՓԲԸ գործունեության վերաբերյալ հանցագործության մասին հաղորդումն ուղարկվել է ՀՀ Լոռու մարզի դատախազություն
18:07, February 28, 2018 | Նորություններ, Սեփական լրատվությունՀՀ Գլխավոր դատախազությունը 2018 թ. փետրվարի 21-ին արձագանքել է «Թեղուտ» ՓԲԸ գործունեության վերաբերյալ Հելսինկյան Քաղաքացիական Ասամբլեայի Վանաձորի գրասենյակի՝ հանցագործության մասին հաղորդմանը: ՀՔԱ Վանաձորի գրասենյակի գրությունն ու կից փաստաթղթերն ուղարկվել են ՀՀ Լոռու մարզի դատախազություն:
Քրեական գործ հարուցելու և շրջակա միջավայրի անվտանգության դեմ ուղղված գործողություններ կատարած անձանց պատասխանտվության ենթարկելու հարցով ՀՔԱ Վանաձորի գրասենյակը ՀՀ Գլխավոր դատախազություն էր դիմել 2018 թ. հունվարի 23-ին:
Հանցագործության մասին հաղորդման հիմքում 2018 թ. հունվարի 21-ին hetq.am-ում արված հրապարակումն էր, որում տեղեկություններ կային Ընկերության պոչամբարի լցվելու և պոչանքները Դեբեդ և Շնող գետեր ուղղելու մասին:
Տեղեկություններ կային նաև պոչամբարի պատերի ճաքելու վերաբերյալ:
Հաղորդում ներկայացնելուն զուգահեռ ՀՔԱ Վանաձորի գրասենյակը հարցում էր ներկայացրել ՀՀ Արտակարգ իրավիճակների նախարարություն՝ նյութում հրապարակված տեղեկությունների հավաստիության և դրանց ուղղությամբ Նախարարության ձեռնարկած գործողությունների մասին:
ԱԻՆ-ից 2018 թ. փետրվարի 8-ին թվագրված գրությամբ հայտնել են, որ ուսումնասիրություններ են կատարվել և պարզվել է, որ պոչամբարի վրա ճաքեր չկան, իսկ Ընկերությունը 2018 թ. հունվարի 12-ից չի գործում: Սակայն չեն ժխտում, որ գործարանից ջուր է բացթողնվել Շնող գետի վրա: Համաձայն Նախարարության պատասխանի՝ Ընկերության ներկայացուցիչը հայտնել է, որ ջուրը բաց է թողնվել հունվարի 21-ին, երբ գործարանն արդեն դադարեցրել էր աշխատանքները, և պարզեցված ջուրը 2 ժամ թափվել է Շնող գետը:
Արտակարգ իրավիճակների նախարարությունից հայտնում են նաև, որ «Թեղուտ» ՓԲԸ-ում և պոչամբարում վերջին փորձաքննությունն իրականացվել է 2017 թ. մարտի 6-ին:
«Ինչ վերաբերում է «Թեղուտ» ՓԲԸ կողմից աշխատանքների դադարեցմանը, ապա հայտնում ենք, որ «Տեխնիկական անվտանգության ազգային կենտրոն» ՊՈԱԿ-ն առանց արտադրական վտանգավոր օբյեկտ շահագործող անձի դիմումի և պայմանագրի իրավասու չէ որևէ աշխատանք իրականացնել արտադրական վտանգավոր օբյեկտում, հետևաբար՝ հրապարակման մեջ զետեղված ոչ մասնագիտական տեղեկությունների համապատասխանության վերաբերյալ կարծիք հայտնել չենք կարող»,- նշված է Նախարարության պատասխանում: