«Լֆիկ Սամոն էլ պետք է հասկանա, որ ինքն էլ է պատասխան տալու, բայց ոչ թե Սերժ Սարգսյանի կաբինետում, այլ օրենքի առաջ». Ա.Սաքունց
09:38, May 7, 2013 | Նորություններ | Ընտրական իրավունք
Երևանի ավագանու ընտրություններին իրավապաշտպան Արթուր Սաքունցը մասնակցել է որպես դիտորդ և ԳԱԼԱ-ի լրագրողի հետ զրույցում գնահատել է անցած ընտրություններն ու տվել իրավական գնահատական: Վերջինս նշել է, որ ինքը չի ցանկանում անդրադառնալ առանձին խախտումներին, քանի որ դրանց շարքն, ըստ իրավապաշտպանի նույն է:
«Ընտրական հանձնաժողովները որևիցե կամք սեփական նախաձեռնությամբ կանխարգելելու խախտումները չեն դրսևորել ու չեն դրսևորում, այսինքն՝ ընտրական հանձնաժողովը չի դիտարկում, որ ինքը պետք է կանխարգելի խախտումը, ինքը սպասում է՝ դիտորդը կամ վստահված անձը կահազանգի՞, թե՞ ոչ, եթե կահազանգի, նոր ինչ-որ գործողություն կկատարի: Եթե առաջ ընդհանրապես որևէ բան չէին անում, հիմա գոնե ինչ-որ ձևով անդրադառնում են»,- galatv.am-ի հետ զրույցում նշել է իրավապաշտպանը: Ըստ Արթուր Սաքունցի՝ դա կարող են դիտարկել որպես դրական միտում, մինչդեռ ինքը՝ Սաքունցը, դա դրական չի համարում, քանի որ ըստ նրա՝ այն պարտավորությունը, որ ընտրական հանձնաժողովը պետք է գործողություն իրականացնի կանխարգելելու ընտրական խախտումները, այդ պարտականությունները չկատարելն արդեն բացասական է:
«Նույն ընտրական հանձնաժողովի անդամներ, նախագահներ, պատշաճ չեն տիրապետում ընտրական օրենսգրքին: Իսկ ոստիկանության աշխատանքը ոչ թե զրո է, այլ մինուս: Ոստիկանության ծառայությունը օպերատիվ հետախուզական գործունեության մասին օրենքի համաձայն՝ պետք է գործողություններ կատարի հայտնաբերելու խախտումներ կատարողներին: Իրանք շատ լավ գիտեն ու շատ լավ տիրապետում են, թե ովքեր են «դվիժենյա» անողները, բայց ոստիկանության համար դեռևս քաղաքացիներին իրենց կամքին հակառակ ընտրատեղամաս բերելը չի համարվում ընտրախախտում: Անպայման պետք է մեկը մեկի գլուխը ջարդի, որ նոր իրենք միջամտեն, չնայած էդ էլ է հարց՝ իրենց համար արդյո՞ք պատժելի է, քանի որ բռնություն կատարողի անձից է կախված իրենց վարքագիծը, եթե բռնություն կատարողը հովանավորյալ անձ է, այդ ժամանակ էլ են լռում»,- շարունակել է իրավապաշտպանը:
Ա. Սաքունցի կարծիքով, թաղային հեղինակությունները, որոնք ավագանու ընտրություններին հանդիսացան որպես ընտրական գործընթացների կարևոր մասնակիցներ, նրանց միջոցով է վերահսկվել ընտրողների վարքագիծը, ինչին ոստիկանությունն ընդհանրապես ուշադրություն չի դարձրել, իսկ մյուս կարևոր խնդիրն, ըստ Սաքունցի, դիտորդական առաքելություն իրականացնող ընկերություններին է վերաբերում: «Բազմաթիվ էին մեզ համար անծանոթ հասարակական կազմակերպությունները, որոնց դիտորդների դերում հանդես էին գալիս այս կամ այն կուսակցության օգտին աշխատողներ, դրանով ընտրական պրոցեսն է խեղաթյուրվում, որովհետև ընտրողի համար արդեն դիտորդ հասկացողությունն ու վստահված անձ հասկացողությունը խառնվում են իրար»:
Արթուր Սաքունցը անդրադարձել է նաև լրատվամիջոցների նշանակությանը: Նրա կարծիքով, երբ լրագրողներն՝ ըստ քաղաքական կողմնորոշման, մի բան տեսնում են, իսկ մեկ այլ բան՝ ոչ, ապա դա կեղծ կամ ծուռ հայելիների թագավորությունին ցույց տրվելու ֆենոմենն է: «Իրական պատկերն ամբողջովին չի ներկայացվում, այսինքն՝ ինֆորմացիոն մթնոլորտը ձևավորվում է միակողմանի կամ կիսաճշմարտային տեղեկատվությամբ, որն աղավաղում է իրական պատկերը: Իհարկե, Լֆիկ Սամոն չպետք է որոշի՝ պատժի, թե չէ գործիքներին, այլ հենց ինքն էլ պետք է իմանա, որ ինքն էլ է իրավաչափ գործողությունների համար պատասխան տալու, բայց ոչ թե Սերժ Սարգսյանի կաբինետում, ինչպես Նեմեց Ռուբոն, այլ օրենքի և իրավապահ մարմինների առջև: Այս անգամվա քայլերը ցույց տվեցին, որ իշխանության համար հիմնական գործիքը քրեական օլիգարխիան է՝ իր գործիքներով, և երբ որ հրահանգ է տրվում՝ խելոք պահեք ձեզ, խելոք են պահում, եթե հրահանգ տան, որ խելոք չպահեն՝ խելոք չեն պահի»:
Աղբյուրը՝ http://www.galatv.am/news/view/samvel-aleqsanyan-saqunc.html