ԱլԳ ՔՀՖ Ուկրաինայի ազգային պլատֆորմի ՀԱՅՏԱՐԱՐՈՒԹՅՈՒՆԸ
16:04, March 18, 2014 | Այլ, Հայտարարություններ
Եվրամիության- Ուկրաինա Ասոցացման համաձայնագիրն ամբողջական եւ անբաժանելի միջազգային-իրավական փաստաթուղթ է
14.03.2014
Մենք՝ Արեւելյան գործընկերության Քաղաքացիական հասարակության ֆորումի (ԱլԳ ՔՀՖ) Ուկրաինայի ազգային պլատֆորմի անդամ քաղաքացիական հասարակության կազմակերպությունների ներկայացուցիչներս, նկատի առնելով «Եվրամիություն-Ուկրաինա Ասոցացման համաձայնագիրը (ԱՀ) քաղաքական եւ տնտեսական բաղադրիչների բաժանելու» եւ «ԱՀ քաղաքական մասն» առանձին վավերացնելու մասին առաջարկությունը, ինչը մենք տեխնիկապես անհնարին ենք համարում, ստիպված ենք հանդես գալ հետեւյալ հայտարարությունամբ։
ԱլԳ ՔՀՖ Ուկրաինայի ազգային պլատֆորմը ողջունում է Եվրամիության եւ Ուկրաինայի կառավարության պատրաստակամությունը՝ մոտակա ժամանակում Ասոցացման համաձայնագիրը ստորագրելու մասին։
Մենք Ասոցացման համաձայնագիրը դիտարկում ենք որպես համընդգրկուն, ամբողջական եւ անբաժանելի փաստաթուղթ, որը ոչ միայն ապահովում է Եվրամիության եւ Ուկրաինայի քաղաքական մերձեցումը, այլ նաեւ երաշխավորում է Ուկրաինայի զարգացման համար կենսականորեն անհրաժեշտ բարեփոխումների իրականացումը։ Մենք ողջունում ենք ԱՀ-ով սահմանված՝ Ուկրաինային միակողմանիորեն եւ անհապաղ առեւտրային արտոնություններ տրամադրելու մասին Եվրամիության որոշումը։ Մենք աջակցում ենք Ուկրաինայում առկա տնտեսական դժվարությունները հաղթահարելու եւ տնտեսական եւ առեւտրային որոշ դրույթների՝ ուժի մեջ մտնելն առայժմ հետաձգելու վերաբերյալ կողմերի մտադրություններին։ Միեւնույն ժամանակ, մենք կողմնակից ենք մնում այն ձեւաչափին, ըստ որի Համաձայնագիրը հանդիսանում է ամբողջական եւ անբաժանելի միջազգային-իրավական փաստաթուղթ։