Ես միամիտ չեմ, որ մտածեմ, թե հայցը պետք է բավարարվեր, բայց քննության չառնելն այլ խնդիր է. Արթուր Սաքունց
06:01, December 6, 2013 | Այլ լրատվամիջոցներ, Նորություններ
«Հելսինկյան քաղաքացիական ասամբլեայի» Վանաձորի գրասենյակի ղեկավար Արթուր Սաքունցի համար սպասելի չէր ՀՀ վարչական դատարանի կայացրած որոշումը՝ Սերժ Սարգսյանի գործողությունները ոչ իրավական ճանաչելու մասին հայցադիմումի վերաբերյալ: Tert.am-ի հետ զրույցում Արթուր Սաքունցն ասաց, որ վարչական դատարանն ակնհայտ խախտել է վարչական դատավարության սկզբունքները:
Հիշեցնենք, որ իրավապաշտպան Արթուր Սաքունցը դիմել էր Վարչական դատարան
Մաքսային միությանն անդամակցելու փաստաթղթերն ու գործընթացը, նաև՝ Սերժ Սարգսյանի հայտարարությունն անօրինական ճանաչելու հայցադիմումով:
«Ես միամիտ չեմ, որ մտածեմ, թե հայցը պետք է բավարարվեր, բայց քննությանն չառնվելն այլ խնդիր է»,-ասաց նա:
Արթուր Սաքունցը նաև նշեց, որ վարչական դատարանը խնդիրն ամբողջությամբ տեղափոխել է պետությունների միջև միջազգային պայմանագրերի կնքման դաշտ, այնինչ հայցադիմումը մի քանի հիմնավորումներով է ներկայացված եղել:
«Մենք նախագահի պաշտոնը դիտարկել էինք որպես հանրային կառավարում իրականացնող մարմին, որը պետք է հաշվետու և թափանցիկ լինի իր քաղաքացիների առջև, իսկ Վարչական դատարանն այդ հիմնավորումներին բացարձակապես չի էլ անդրադարձել: Դատարանը հարցը տեղափոխել է միջազգային պայմանագրերի դաշտ ու գտել, որ նախագահն իրավունք ունի իրականացնելու իր լիազորությունները բացարձակ որպես միապետ: Կներեք, բայց վարչական դատարանը մոռանում է, որ դա վերաբերում է ժողովրդավարական պետության հանրապետության նախագահին, ոչ թե բռնապետական պետութանը»,-ասաց Արթուր Սաքունցը:
Արթուր Սաքունցն ընդգծեց, որ Սահմանադրությամբ նախագահն իրավունք ունի հանդես գալ երկրի անունից, սակայն որոշումների ընդունման նման ընթացակարգը ժողովրդավարական պետությանը բնորոշ չէ և հակասում է իրավական պետության սկզբունքներին:
«Վարչական դատարանը, ցավոք, այդ հանգամանքին ուշադրություն չի դարձրել, ակնհայտ միակողմանի որոշում է»,-ասաց նա:
Արթուր Սաքունցը ընդգծեց, որ իրենք դիմելու են Վերաքննիչ, իսկ հարկ եղած դեպքում՝ Վճռաբեկ դատարան: