Զինծառայողի՝ վիրավորում ստանալը գաղտնի պահվելը կարո՞ղ է դատական կարգով վիճարկվել
17:29, December 2, 2016 | Այլ լրատվամիջոցներ, Նորություններ | Զինծառայողների/Զորակոչիկների իրավունքներ | Զինված ուժեր
Սահմանային դեպքերի վերաբերյալ ԼՂՀ ՊԲ-ն ու ՀՀ ՊՆ-ն պարտավոր են օբյեկտիվ տեղեկատվություն տրամադրել, հատկապես, եթե այն վիրավորում է կամ վերաբերվում է զինծառայողի առողջական վիճակին:
Այս մասին լրագրողների հետ հանդիպմանն ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը՝ անդրադառնալով երեկվա միջադեպին:
Հիշեցնենք, որ երկու պայմանագրային զինծառայող բազմաբեկորային վնասվածքներով այս պահին գտնվում են Երեւանի կենտրոնական զինվորական հոսպիտալում, սակայն նրանց՝ վիրավորվելու հանգամանքներն են հստակեցվում:
«Առնվազն հարազատներին պետք է իրազեկվի, որովհետեւ միշտ էլ կան կասկածներ, թե հակառակորդի կրակոցի հետեւանքով է վիրավորում ստացել զինծառայողը, թե՝ կանոնադրության խախտումների կամ զինծառայակիցների կողմից ոտնձգությունների: Ցանկացած հիմնավորում զինծառայողի առողջական վիճակի մասին պետք է ասվի, այն չի կարող պետական գաղտնիք համարվել»,- ասաց Սաքունցը:
Մեր հարցին՝ նման դեպքերը թաքցնելու մեղադրանքով զինծառայողի հարազատը կարո՞ղ է իրավական պատասխանատվության ենթարկել պետությանը, ավելի կոնկրետ պաշտպանական գերատեսչությանը, Սաքունցը պատասխանեց.
«Իրավական պետության կոնցեպցիայի մեջ է պետության պատասխանատվությունն իր հսկողության տակ գտնվող քաղաքացու նկատմամբ: Անձի հետ կատարված ցանկացած նման խնդիրների դեպքում օբյեկտիվ, բազմակողմանի քննության իրականացնումը եւս իրավական պետության կոնցեպցիայի մեջ է մտնում: Էնպես չի, որ գաղտնիության ձեւակերպմամբ կարող ես թաքցնել հնարավոր հանցագործությունը: Դու պարտավոր ես հասարակությանը տեղեկացնել վիրավոր զինվորների՝ վիրավորվելու հանգամանքների մասին, մենք չենք ասում պատմիր՝ ինչ օպերացիա է արել. ի վերջո զինվոր են, գաղտնի ծառայության գործակալներ չեն»:
Մեր ճշտող հարցին՝ այդ ամենն օրենսդրությամբ ինչպե՞ս է կանոնակարգվում, հնարավո՞ր է թաքցնելու համար իրավական պատասխանատվության ենթարկել պաշտպանական գերատեսչությանը, Սաքունցը հստակեցրեց՝ կարող է, իրավունք ունի համապատասխան պահանջ ներկայացնելու ՊՆ-ին:
Արթուր Սաքունցի խոսքով՝ ՊՆ-ն պարտավոր է մարդու կյանքին եւ առողջությանը վերաբերող տեղեկություն տրամադրել՝ «անկախ նրանից ՊՆ-ի օգնականներին այն դուր է գալիս, թե՝ չէ»:
Սաքունցը կոչ արեց նման դեպքերով զինծառայողների ծնողներին դիմել իրենց գրասենյակ՝ խոստանալով հետամուտ լինել վերջիններիս իրավունքների վիճարկմանը դատական կարգով: