0 8000 12 11

Այսօր Վանաձորի Հելսինկյան Քաղաքացիական Ասամբլեայի Վանաձորի գրասենյակի նախագահ Արթուր Սաքունցը մեզ հետ զրույցում, անդրադառնալով Եվրախորհրդի կտտանքների կանխարգելման կոմիտեի հայտարարությանը, որտեղ նշվում է, որ Հայաստանում ոստիկանության կողմից ազատազրկվածների նկատմամբ վերաբերմունքը շարունակում է լուրջ խնդիր մնալ, նշեց, որ գնահատականները նույնիսկ շատ ավելի խիստ կարող էին լինել:

«ՀՀ-ի իշխանությունները, ցավոք սրտի, նախորդ զեկույցից մինչև այս զեկույցը, որը երկու տարին մեկ է տեղի ունենում, եղած ժամանակահատվածում եղած փաստերի հիման վրա պատշաճ քննություն կատարելու ուղղությամբ իրական քայլեր չեն կատարել»,-նշեց Արթուր Սաքունցը:

Մեր հարցին՝ չե՞ն ուզում, թե՞ չեն կարողանում, Սաքունցը պատասխանեց, որ չեն ուզում, քանի որ քաղաքական կամք չունեն: «Բացի այդ՝ ես ուզում եմ ասել, որ քրեական քաղաքականության հիմքում բռնությունը հանդիսանում է հիմնական գործիքներից մեկը քաղաքացիների նկատմամբ: Կարող եմ նաև փաստեր բերել. առաջինը՝ ոստիկանական բաժանմունքերում քաղաքացիների նկատմամբ բռնություններն են՝ ապացույցներ հայթայթելու առումով: Եվ այդ դեպքերի վերաբերյալ քրեական գործեր չեն հարուցվում: Ավելին՝ այդ քրեական գործերի հարուցումը մերժելու որոշումները կայացնելը ևս դատական ատյաններում շատ երկար ժամանակ են պահանջվում: Այսինքն՝ խնդիրը, ոչ միայն իրավապահ մարմիններին, այլև դատական պրակտիկային է վերաբերում:

Զինված ուժերում ևս բռնությունների կամ վատ վերաբերմունքի մասին դեպքերը պատշաճ ուշադրության չեն արժանանում: Քրեակատարողական հիմնարկներում մահացության 35 դեպք էր անցյալ տարի գրանցվել, որոնք շատ ավելի աճեցին 2009թ. համեմատ: Էլ չեմ խոսում անմարդկային պայմանների,սննդի որակի և այլնի մասին: Օրինակ, պայմանականի վաղաժամկետի խնդիրները: Հոգեբուժարանների մահացության դեպքերի փաստերով քրեական գործերը որպես այդպիսին չեն բացահայտվում»,- բացատրեց Արթուր Սաքունցը:

Պատասխանելով՝ այս ամենի հետևանքը ո՞րը կարող է լինել հարցին, Սաքունցը որպես օրինակ բերեց ՀԱԿ ակտիվիստների վերջին դեպքերը և ասաց. «Իրավիճակը դեպի վատը կփոխվի: Այսինքն՝ կլինի երկիր, որը ոչ միայն չի կարողանում, այլև չի ցանկանում իր քաղաքացիների առաջ վերցրած պարտավորությունները իրականացնել:

Երկրորդը՝ իմ կարծիքով նույն իշխանական համակարգը ոստիկանությանը օգտագործում է որպես բռնության գործիք, թե քաղաքացիների նկատմամբ, թե քաղաքական նպատակներով, և այդ իրավիճակների անընդհատ շարունակության դեպքում, այսպես թե այնպես, գալու է մի պահ, որ զոհեր տան՝ իրենց բնավորության համաձայն: Առանձին նկատողություններով քրեական գործերով, զոհաբերության ճանապարհով ցույց տան, իմիտացիա ստեղծեն, թե իբր փոփոխություններ են կատարում: Բայց իրապես դրա հնարավորությունները չեն ունենալու և մի պահ, հնարավոր է, իրավապահ համակարգը դուրս գա «վերահսկողությունից»՝ նույն քաղաքական իշխանության կողմից , որովհետև իրենք զգալու են, որ իրենց զոհաբերում են»,- ավելացրեց Արթուր Սաքունցը:

Աղբյուրը՝ http://1in.am/arm/armenia_right_30501.html