ՀԿ-ների փակման կամ սահմանափակման վտանգ կա, բայց ՀՀ-ն ՌԴ-ն չէ. Արթուր Սաքունց
18:32, November 25, 2013 | Այլ լրատվամիջոցներ, Նորություններ
Հայաստանում գործունեություն ծավալող հասարակական կազմակերպությունները, որոնք տարբեր կառույցներից (հիմնականում՝ եվրոպական) դրամաշնորհներ են ստանում, հնարավոր է ՝ հայտնվեն փակվելու վտանգի առաջ:
Tert.am-ի հետ զրույցում Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը չբացառեց, որ եվրոպական դրամաշնորհներով սնվող հասարակական կազմակերպությունները Հայաստանի՝ Մաքսային միությանն անդամակցելուց հետո դադարեցնեն իրենց գործունեությունը:
«Հայաստանն, այնուամենայնիվ, Ռուսաստանի Դաշնությունը չէ, բայց եթե ՄՄ-ն մեր երկրի դեպքում հանդիսանա այն մեխանիզմը, որի միջոցով Ռուսաստանի Դաշնությունը՝ հանձին Պուտինի, ամրապնդի իր իշխանությունը Հայաստանում, դա կբարդացնի իրավիճակը: Դա կարող է հանգեցնել Ռուսաստանում այս պահին առկա իրավիճակին»:
Հիշեցնենք, որ ՌԴ-ում գործում է օրենք, համաձայն որի՝ դրսից ֆինանսավորվող հասարակական կազմակերպություններն «օտարերկրա գործակալներ» են համարվում: Օրենքի անհրաժեշտությունը պայմանավորվում է նման կազմակերպությունների կողմից առավելագույն ֆինանսական թափանցիկության ապահովման հասնելու ձգտումով, սակայն օրինագծի հակառակորդների կարծիքով՝ այն ընդդիմադիր շարժումների դեմ է:
Արթուր Սաքունցը նշում է, որ իշխանությունները «հրապարակավ չեն բացատրել», թե ինչու են ուզում մտնել Մաքսային միություն:
«Ո´չ մի անվտանգության խնդիր էլ չկա, որովհետև եթե ունենային այդ փաստարկները, համաձայն որոնց ՄՄ մտնելը Հայաստանի անվտանգությունից է բխում, ապա դրանց մասին կհայտարարեին ուղղակիորեն: Մինչև հիմա ոչ ոք ուղղակի նման բան չի արել: Միայն խոսնակների մակարդակով կամ՝ միջնորդավորված է դա ներկայացվում, կիսատ-պռատ, որովհետև իրենք գիտեն, որ դա սուտ է, այլապես հազար-անգամ մեր աչքը մտցրած կլինեին»:
Ինչ վերաբերում է հարցին՝ գուցե «դուրսը» ինքը, հույսը կտրելով Հայաստանից, դադարեցնի ֆինանսավորումը, իրավապաշտպանը նկատեց.«Սա 20-րդ դարի ո՛չ 60 –ական, ո՛չ էլ՝ 80 –ականները չեն, գլոբալ աշխարհ է, և նման մեծ տարածքի վրա նման ռեժիմ հաստատելն ու պահպանելը շատ թանկ հաճույք է: Դա հնարավոր է միայն առանձին փոքր կտորներում կամ հարուստ երկրներում, ինչպես օրինակ՝ Կուբան կամ Հյուսիսային Կորեան են»: