ՀՀ ԱՆ ԴԱՀԿ-ն կսպասի ՀՀ-ում վճռի կայացմանը
08:58, February 15, 2014 | Նորություններ, Սեփական լրատվություն | Երեխաների իրավունքներ
Շուրջ մեկ ամիս առաջ Հելսինկյան Քաղաքացիական Ասամբլեայի Վանաձորի գրասենյակի պաշտոնական կայքէջում հրապարակվեց մի նյութ, որը տարակարծությունների առիթ հանդիսացավ:
Նյութը պատրաստվել էր գրասենյակի իրավաբաններին դիմած Դ. Հակոբյանի խնդրի վերաբերյալ, որում խնդիրը ներկայացվել էր միայն իրավական տեսակետից և համապատասխան հիմնավորումներով: Նյութը ներկայացվել էր երեխայի իրավունքների և ԼՂՀ քաղաքացիական դատավարության օրենսգրքի դրույթների խախտման տեսանկյունից՝ չշոշափելով ոչ մի անձնական կամ միջանձնային խնդիրներ:
Օրեր անց` ՀՔԱ Վանաձորի գրասենյակի հրապարակած նյութին ի պատասխան, lragir.am լրատվական կայքում հրապարակվեց մի նյութ, որով հեղինակը` Արփի Հովսեփյանը, խնդիրը ոչ միայն տեղափոխել էր անձնական և միջանձնային խնդիրների մակարդակ, այլ նաև քննադատում և կասկածի տակ էր դնում ՀՔԱ Վանաձորի գրասենյակի կողմից հրապարակված նյութի իրավական հիմնավորումները:
Այդուհանդերձ, օրերս գրասենյակը ՀՀ ԱՆ ԴԱՀԿ ծառայության Լոռու մարզային բաժնից ստացավ այս գործի վերաբերյալ գրությունը, որում մասնավորապես ասվում է.
«Հայտնվում է, որ Ձեր դիմումի և կատարողական վարույթի ուսումնասիրության արդյունքում ԴԱՀԿ ծառայության Լոռու մարզային բաժնում վերսկսված թիվ 06-3489/13 կատարողական վարույթով երեխային մորը` Արփի Հովսեփյանին հանձնելու վերաբերյալ կատարողական գործողությունները հետաձգվել են մինչև Լոռու մարզային ընդհանուր իրավասության դատարանի կողմից վճռի հրապարակումը»:
ՀՀ ԱՆ ԴԱՀԿ ծառայության գրությունն այստեղ: