ՀՔԾ նորանշանակ պետին հարցրեք` նա հավատարիմ է լինելու օրենքի՞ն, թե՞ Սերժ Սարգսյանին. Արթուր Սաքունց
07:55, May 30, 2013 | Նորություններ
«Իրավական համակարգում այս կամ այն պաշտոնյայի նշանակումը հասկանալի չէ հանրությանը, քանի որ պարզ չէ` ինչ սկզբունքով են ազատում կամ նշանակում այս կամ այն պաշտոնյայի»,- mardik.am- ի հետ զրույցում ասաց իրավապաշտպան Արթուր Սաքունցն անդրադառնալով ՀՔԾ-ի նոր պետի նշանակմանը:
Պրն Սաքունցի խոսքով` ՀՔԾ-ն քաղաքացիների հարկերի շնորհիվ աշխատող կառույց է, հետևաբար քաղաքացիների համար պետք է ամեն ինչ պարզ ու հասկանալի լինի: «Մենք, իհարկե, գիտենք, որ այդ կառույցը լավ չի աշխատում: Մինչ օրս Մարտի 1-ը բացահայտված չէ, ինչու է հիմա ազատվել ՀՔԾ-ի պետը`Անդրանիկ Միրզոյանը»,- մանրամասնեց իրավապաշտպանը:
Զրուցակցիս հիշեցրի` նախագահը հայտարարել էր, որ ՀՔԾ-ի նախկին պետին` Անդրանիկ Միրզոյանին աշխատանքից ազատում է իր առջև դրված խնդիրը չկատարելու համար: «Դա նախագահն է ասում և չի հիմնավորում` ինչու է ազատում աշխատանքից: Հետաքրքիր է` իսկ ո՞վ է կատարում իր առջև դրված խնդիրը` վարչապե՞տը, ԴԱՀԿ-ի ղեկավա՞րը, արդարադատության նախարա՞րը, գլխավոր դատախա՞զը, գյուղնախարա՞րը, ՔԿՎ-ը: Խնդիրը համակարգային փոփոխությունների մեջ է»,- ասաց պրն Սաքունցը` հավելելով, որ մեր երկրում հաստատվել է մեկ մարդու իշխանություն. նա է որոշում` ով է լավ աշխատում, ով` վատ:
Արթուր Սաքունցը վստահ է` Հայաստանում մեծամասամբ պաշտոնյաների նշանակումն ու ազատումը պայմանավորված է ներիշխանական հակասություններով ու բախումներով, ոչ թե հանրության պահանջով, հետևաբար որևէ ակնկալիք չունի իրավապաշտպանը պաշտոնյաների փոփոխությունից, քանի որ այս կամ այն պաշտոնյան տվյալ կառույցում կարող է 5-10 տոկոսով ազդեցություն ունենալ:
Խոսելով նախկին պետի`Անդրանիկ Միրզոյանի մասին, զրուցակիցս հիշեցրեց նրա հարցազրույցների մեկը, որտեղ պրն Միրզոյանն ասել էր, որ հավատարիմ է եղել և´ Լևոն Տեր-Պետրոսյանին, և´ Ռոբերտ Քոչարյանին, և´ Սերժ Սարգսյանին, բայց չի նշում, որ հավատարիմ է եղել օրենքին: «Վահրամ Շահինյանին հարցրեք` նա հավատարիմ է լինելու օրենքի՞ն, թե՞ Սերժ Սարգսյանին: Վստահ եմ` նա կպատասխանի` հավատարիմ եմ մնալու Սերժ Սարգսյանին` օրենքի ոգուն համապատասխան»,- հայտարարեց իրավապաշտպանը:
Ինչ վերաբերում է ՀՔԾ պետի այն հայտարարությանը, թե կառույցն անկախ է ու չի ենթարկվում ոչ մեկին, Սաքունցի խոսքով` դա իրականությանը չի համապատասխանում:
Աղբյուրը՝ http://mardik.am/am/