Ո՞ւմ էր վիրավորել Ռուբեն Հայրապետյանը
11:45, August 29, 2012 | Նորություններ | Արդար դատաքննության իրավունք
Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանի դատավոր Ռուբեն Ափինյանը մերժեց իրավապաշտպան, ՀՔԱ Վանաձորի գրասենյակի նախագահ Արթուր Սաքունցի հայցն ընդդեմ ԱԺ պատգամավոր Ռուբեն Հայրապետյանի։
Հայցվոր կողմը դատարանից պահանջում է Ռուբեն Հայրապետյանին պարտավորեցնել հրապարակայնորեն ներողություն խնդրել և որպես փոխհատուցում Ռուբեն Հայրապետյանից հօգուտ Արթուր Սաքունցի բռնագանձել 1 (մեկ) լումա:
Հիշեցնենք, որ Արթուր Սաքունցի կողմից հայցադիմում ներկայացնելու համար հիմք է հանդիսացել 2012 թ. մայիսի 25-ին Հայաստանի հանրային հեռուստաընկերությամբ ցուցադրված «Լրացուցիչ ժամանակ» սպորտային հաղորդումը, որտեղ հաղորդման հյուրը` Հայաստանի ֆուտբոլի ֆեդերացիայի նախագահ Ռուբեն Հայրապետյանը, կատարել է հետևյալ արտահայտությունները. «Երբ որ ես Վանաձորում ուզում եմ ֆուտբոլի դպրոցը կառուցեմ, ոչ մի ծառ, ոչ մի թուփ չկա, սարի վրա դպրոց եմ կառուցում, բայց չգիտես ինչի հայտնվեց Հելսինկյան մի հատ ինչ որ անհասկանալի օղերով մի հատ շան ծնունդ ու բռնեց դատի տվեց մեզ, քաղաքապետարանին, ավագանու որոշմանը, այդ թվում ֆեդերացիան էլ որպես երրորդ կողմ, պատասխանող կողմ: Հիմա դրանք մի քանի կոպեկ արտասահմաններից էդ գռանտները ստանում են, իրանց գռանտների հաշվին ցանկացած գեղեցիկ բան այսօր վարկաբեկում են»:
Դատական վճիռը լսեց միայն պատասխանող կողմը, քանի որ ոչ հայցվոր եւ ոչ էլ 3-րդ կողմը` Հանրային հեռուստատեսության ներկայացուցիչը, դահլիճում չէին։
Դատական վճռի հրապարակումից հետո ուշացումով դատարան է ժամանել Արթուր Սաքունցը եւ վճռին ծանոթանալուց հետո հայտարարեց, թե վճիռ կայացնողը նույնպես հանցագործ է , որովհետեւ ինքը որոշում է կայացնում արդարադատության դեմ. «Իմ նպատակն է ֆիքսել, որ սնանկ ՀՀ դատարանը իր դատավորներով, բոլորը հանցագործներ են նման վճիռ կայացնողների հետ համաձայնվողները»։
Արթուր Սաքունցը հավելեց, որ պատրաստվում է բողոքարկել վճիռը՝ Վերաքննիչ դատարանում։
Աղբյուրը՝ http://www.a1plus.am/am/politics/2012/08/29/sakunc