0 8000 12 11

2012 թ. հոկտեմբերի 8-ին` ժամը 10:00-ին, Երևանի Կենտրոն և Նորք-Մարաշ համայնքների ընդհանուր իրավասության դատարանում նշանակված է ՀՀ ոստիկանության Լոռու մարզային վարչության Վանաձորի բաժնի քրեական հետախուզության բաժնում ճնշումների ենթարկված Նարեկ Ափինյանի գործով դատական նիստ:

Օգոստոսի 17-ին ոստիկանության աշխատակիցները աշխատանքի վայրից բերման են ենթարկել Ն. Ափինյանին և ասել են, որ նա մասնակից է եղել ինչ-որ ծեծկռտուքի: Այնուհետև ստիպել են, որպեսզի բացատրություն գրի տվյալ միջադեպի վերաբերյալ: Տեղյակ չլինելով միջադեպից` Ն. Ափինյանը հայտնել է, որ տեղեկություններ չունի ու հրաժարվել բացատրություն տալ, որից հետո ոստիկանության աշխատակիցները սկսել են հայհոյել և հարվածել նրան:

Ոստիկանության աշխատակիցների կողմից կիրառված անօրինական գործողությունները, հոգեբանական և ֆիզիկական բռնությունները, անմարդկային և արժանապատվությունը նվաստացնող վերաբերմունքը տևել է շուրջ 5 ժամ, որից հետո չդիմանալով ճնշումներին՝ Ն. Ափինյանը բացատրություն է գրել:

2012 թ. օգոստոսի 18-ին ՀՔԱ Վանաձորի գրասենյակը հանցագործության մասին հաղորդում է ներկայացրել ՀՀ հատուկ քննչական ծառայություն, պատճենը՝ ՀՀ գլխավոր դատախազություն: ՀՀ հատուկ քննչական ծառայության ՀԿԳ քննիչ Գ. Հովակիմյանը կայացրել է քրեական գործի հարուցումը մերժելու մասին որոշում:

Այնուհետև կազմակերպության կողմից դիմում-բողոք է ներկայացվել ՀՀ գլխավոր դատախազություն` ՀՀ հատուկ քննչական ծառայության քննիչի կողմից կայացված որոշումը վերացնելու պահանջի մասին:

ՀՀ գլխավոր դատախազությունից ստացվել է պատասխան գրություն, որով հայտնվել է, որ «……: Նախապատրաստված նյութերով քրեական գործի հարուցումը մերժելու մասին որոշումն օրինական է, հիմնավորված և պատճառաբանված, այն վերացնելու հիմքեր չկան»:

Հելսինկյան Քաղաքացիական Ասամբլեայի Վանաձորի գրասենյակը 2012 թ. սեպտեմբերի 14-ին դիմում է ներկայացրել ՀՀ Երևանի Կենտրոն և Նորք-Մարաշ համայնքների ընդհանուր իրավասության դատարան՝ պահանջելով վերացնել ՀՀ հատուկ քննչական ծառայության քննիչի կողմից քրեական գործի հարուցումը մերժելու մասին որոշումը և ՀՀ գլխավոր դատախազությանը պարտավորեցնել կազմակերպության կողմից ներկայացված դիմում-բողոքի վերաբերյալ կայացնել որոշում: