«Պետական և ծառայողական գաղտնիքի մասին» ՀՀ օրենքի վերաբերյալ ընդունված ՀՀ սահմանադրական դատարանի որոշումը փորձարկվում է
10:32, January 22, 2014 | Նորություններ, Սեփական լրատվություն
2014 թվականի հունվարի 21-ին ՀՀ վարչական դատարանում կայացավ ՀՀ պաշտպանության նախարարության դեմ ՀՔԱ Վանաձորի գրասենյակի ներկայացրած և 2010 թվականի հունիսի 15-ին կասեցված գործով նախնական դատական նիստ: Սույն հայցով կազմակերպությունը պահանջել էր ոչ իրավաչափ ճանաչել ԶՈՒ գլխավոր շտաբի վարչական ապարատի ղեկավարի տեղեկատվության չտրամադրումը և պարտավորեցնել տրամադրել ՀՀ պաշտպանության նախարարությանը սնունդ, հագուստ, վառելիք և գրենական պիտույքներ մատակարարող կազմակերպությունների անվանումները և նրանց կողմից մատակարարվող սննդի, հագուսի, վառելիքի և գրենական պիտույքների տեսակները: Չնայած դատարանը սույն գործով նշանակեց ևս մեկ նախնական դատական նիստ, սակայն այս նիստի ընթացքում պարզվեցին գործով կարևոր նշանակություն ունեցող հանգամանքներ:
Մասնավորապես, դատական նիստի ընթացքում ՀՔԱ Վանաձորի գրասենյակի նախագահ, գործով հայցվոր Արթուր Սաքունցի կողմից ներկայացվեցին հայցի առարկան և հիմքերը: Վերջիների թվում, բացի ՀՀ Սահմանդրության 27 հոդվածի և «Տեղեկատվության ազատության մասին» ՀՀ օրենքի 6-րդ հոդվածի դրույթներից, հայցվորը հավելեց նաև ՀՀ Սահմանդրական դատարանի 06.03.2012թ. N 1010 որոշումը: Այդ որոշմամբ, մեկ այլ գործով ՀՔԱ Վանաձորի գրասենյակի դիմումի հիման վրա հակասահմանադրական է ճանաչվել «Պետական և ծառայողական գաղտնիքի մասին» Հայաստանի Հանրապետության օրենքի 12-րդ հոդվածի 7-րդ մասի` «Գերատեսչական ցանկերը գաղտնագրվում են և հրապարակման ենթակա չեն» դրույթը` այնքանով, որքանով չի վերաբերում գաղտնագրման ենթակա կոնկրետ տեղեկության, ճանաչել Հայաստանի Հանրապետության Սահմանադրության 27-րդ և 43-րդ հոդվածների պահանջներին հակասող և անվավեր:
Գործով պատասխանող ՀՀ պաշտպանության նախարարության ներկայացուցիչն առարկեց կազմակերպության կողից ներկայացված հայցադիմումի պահանջների դեմ, ասելով, որ ՀՀ սահմանադրական դատարանի 06.03.2012թ. N 1010 որոշումը տվյալ գործի շրջանակներում կիրառելի չէ: Պատասխանողի ներկայացուցիչը պնդեց, որ կազմակերպության տեղեկատվության հարցմամբ պահանջված տեղեկատվությունը ՀՀ կառավարության 13.03.1998թ. N 173 որոշման իմաստով համարվում է գաղտնի տեղեկատվություն:
Հարկ է նշել նաև, որ դատարանում որպես գործով պատասխանող ՀՀ պաշտպանության նախարարության ներկայացուցիչ ներգրավված նույն կառույցի աշխատակիցը տեղեկություն չուներ ՀՀ Սահմանդրական դատարանի 06.03.2012թ. N 1010 որոշումից հետո ՀՀ պաշտպանության նախարարության կողմից ի կատարումն ՀՀ սահմանադրական դատարանի որոշման որևէ գործողություն ձեռնարկվել է, թե ոչ, այսինքն՝ արդյոք գաղտնի տեղեկությունների շարքին դասվող գերատեսչական ցանկում փոփոխություններ են կատարվել, կամ արդյոք ցուցակներում պարունակվող տեղեկությունները տարանջատվել են ըստ գաղտնիության և հասանելիության:
ՀՔԱ Վանաձորի գրասենյակի նախագահ Արթուր Սաքունցը դատարանին հայտնեց, որ ի պատասխան կազմակերպության տեղեկատվության հարցումների ՀՀ պաշտպանության նախարարությունից նախ հայտնվել է, որ ՀՀ սահմանադրական դատարանի 06.03.2012թ. N 1010 որոշման կատարման համար ձևավորվել է աշխատանքային խումբ համապատասխան գերատեսչական ակտը մշակելու համար, իսկ այնուհետև հայտնվել է, որ այդ ակտը ևս համարվում է գաղտնի:
Դատարանը հստակեցրեց նաև գործով ապացուցման ենթակա հանգամանքները, այն է՝ արդյոք հայցվոր կողմի պահանջած տեղեկությունները գտնվում են գաղտնիք պարունակվող գերատեսչական ցանկերում, թե ոչ և այս փաստի ապացուցման բեռը, ՀՀ վարչական դատավարության օրենսգրքի 29-րդ հոդվածի իմաստով, դրվեց պատասխանող կողմի վրա:
Դատավորն անհրաժեշտ համարեց սույն գործով նշանակել ևս մեկ նախնական դատական նիստ՝ չպարզված հանգամանքները պարզելու և դատարանին լրացուցիչ տեղեկություններ ներկայացնելու համար:
Հաջորդ նախնական դատական նիստը տեղի կունենա 2014 թվականի փետրվարի 3-ին, ժամը 15:00-ին: