0 8000 12 11

News.am լրատվական կայքի 2012 թ. հունիսի 2-ին տարածած տեղեկատվության համաձայն, հունիսի 1-ին առավոտյան ժամը 08:20-ի սահմաններում, հրազենային մահացու վիրավորում ստացած ժամկետային զինծառայող, 19-ամյա Սարո Արտյոմի Սամվելյանի մահվան փաստով հարուցվել է քրեական գործ` ՀՀ քրեական օրենսգրքի 110 հոդվածի 1-ին մասի  հատկանիշներով /ինքնասպանության հասցնելը/:

Այսօր` ժամը 16:00-ի սահմաններում, մեր կազմակերպության աշխատակիցներն այցելեցին Ս. Սամվելյանենց տուն: Արդեն մահացած զինծառայողի դին տեղափոխվել էր և գտնվում էր տանը: Անձամբ հարազատներից մի քանիսի հետ զրույցներից, ինչպես նաև Ս.Սամվելյանի մահվան փաստը հավաստող բժշկական վկայականում գրառված տեղեկատվության համաձայն զինծառայողի դիակի վրա հայտնաբերվել են քերծվածքներ և արյունազեղումներ:

Վերջինս հիմք է տալիս եզրակացնելու, որ Ս.Սամվելյանը ենթարկվել է բռնությունների: Իսկ թե իրապես նա գնացել է ինքնասպանության, թե սպանվել է, իհարկե պետք է պարզի քննությունը: Սակայն, նման վնասվածքների առկայության պարագայում, ինչու քրեական գործը չի հարուցվել սպանության հիմքով /քր.օր.ի 104 հոդվածի 1-ին մասի հիմքով/ հայտնի չէ: Վերջիվերջո, ինչպես բազմիցս նշել  է ՀՀ զինդատախազը, քննության ընթացքում կարող է քրեական գործի հարուցման հոդվածը փոխվել:

Կարծում ենք, մահվան փաստով  քրեական գործը հարուցվել է ոչ համարժեք հոդվածի հիմքով:

ՀՔԱ Վանաձորի գրասենյակ
Վանաձոր
2.06.2012 թ.