Սերժ Սարգսյանի գործողությունները ոչ իրավաչափ ճանաչելու վերաբերյալ վճռաբեկ բողոք կներկայացվի
05:48, February 5, 2014 | Այլ լրատվամիջոցներ, Նորություններ | Արդար դատաքննության իրավունք
ՀՔԱ Վանաձորի գրասենյակը ՀՀ Վարչական վերաքննիչ դատարան էր ներկայացրել վերաքննիչ բողոք` պահանջով բեկանել ՀՀ Վարչական դատարանի որոշումը, որով մերժվել էր ՀՀ նախագահի գոծողությունները ոչ իրավաչափ ճանաչելու պահանջի մասին ՀՔԱ Վանաձորի գրասենյակի հայցադիմումի ընդունումը:
ՀՀ վարչական վերաքննիչ դատարանը որոշել է մերժել ներկայացված բողոքը և անփոփոխ թողնել ՀՀ վարչական դատարանի կայացրած որոշումը: Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը NewsBook-ին ասաց, որ իրենք պատրաստվում են դիմել վճռաբեկ դատարան: Իսկ հարցին՝ եթե վճռաբեկն էլ ամփոփոխ թողնի որոշումը, ո՞րը կլինի նրանց հետագա քայլը, Սաքունցը պատասխանեց. «15 օրվա ընթացքում կվորոշենք դիմել Սահմանադրական դատարան կամ եվրադատարան»:
Հիշեցնենք, որ ՀՔԱ Վանաձորի գրասենյակը հայցադիմում էր ներկայացրել ՀՀ վարչական դատարան՝ պահանջելով ոչ իրավաչափ ճանաչել Սերժ Սարգսյանի՝ 2013թ. սեպտեմբերի 3-ի՝ Մաքսային միությանը միանալուն ուղղված գործողությունները: 2013 թ. նոյեմբերի 27-ին ՀՀ վարչական դատարանը կայացրել էր հայցադիմումի ընդունումը մերժելու մասին որոշում: Համաձայն չլինելով որոշման հետ` 2013 թ. դեկտեմբերի 17-ին կազմակերպության կողմից ՀՀ վարչական վերաքննիչ դատարան է ներկայացվել վերաքննիչ բողոք, որը վարույթ էր ընդունել 2013 թ. դեկտեմբերի 27-ին:
Նյութի աղբյուրը` http://newsbook.am/?p=25219&l=am/serg+sargsyani+gorcoxutyuneryvoch+iravachap+chanachelu+veraberyal+vchrabek+boxoq+knerkayacvi