Վիլնյուսում Հայաստանի վերաբերյալ ոչինչ չի քննարկվում. Արթուր Սաքունց
06:06, November 29, 2013 | Այլ լրատվամիջոցներ, Նորություններ
Վիլնյուսում ընթացող Արևելյան գործընկերության գագաթնաժողովի շրջանակներում Հայաստանի վերաբերյալ ոչինչ չի քննարկվում: Այդ մասին NewsBook-ի հետ զրույցում ասաց Վիլնյուսում գտնվող՝ Արևելյան գործընկերության քաղաքացիական հասարակության պլատֆորմի անդամ, ՀՔԱ Վանաձորի գրասենյակի ղեկավար Արթուր Սաքունցը: «Ցավոք սրտի, Հայաստանի մասին Վիլյուսում ոչինչ չի քննարկվում:
Սակայն ոչ այն պատճառով, որ մենք Արևելյան գործընկերությունից դուրս ենք, այլ որ Հայաստանում Ասոցացման համաձայնագիրը չստորագրելու վերաբերյալ զանգվածային-հրապարակային վերաբերմունք չկա` ի տարբերություն Ուկրաինայի: Այդ իսկ պատճառով ուշադրության կենտրոնում գտնվում է Ուկրաինան»,- ասաց Արթուր Սաքունցը: NewsBook-ի հարցին, թե կարելի՞ է ասել, որ Հայաստանը Վիլնյուսում անտեսված է, Սաքունցը պատասխանեց, որ Հայաստանը ոչ թե անտեսված է Եվրամիության կողմից, այլ հասարակության կողմից որևէ քայլի բացակայության պատճառով Հայաստանն ինքնաբերաբար հայտնվել է լուսանցքում:
Սաքունցը նաև տեղեկացրեց, որ Արևելյան գործընկերության Ուկարինայի ազգային պլատֆորմի համակարգողը սիմվոլիկ Ասոցացման համաձայնագիր է ստորագրել Արևմտյան Եվրոպայի քաղաքացիական հասարակության ներկայացուցիչների հետ, ինչը ցույց է տալիս, որ Ուկրաինայի քաղաքացիական հասարակությունն ունի կամք` ստորագրելու Ասոցացման համաձայնագիրը, որն առայժմ չեն ստորագրում Ուկրաինայի իշխանությունները:
Նյութի աղբյուրը ` Newsbook.am