ՀՔԱՎ-ը՝ ընդդեմ ՀՀ Ֆինանսների նախարարության գործով վճիռը կհրապարակվի փետրվարի 22-ին
10:09, February 3, 2016 | Նորություններ, Սեփական լրատվություն | Տեղեկատվության եւ խոսքի ազատություն
2016 թ. փետրվարի 2-ին ՀՀ Վարչական դատարանում, նախագահությամբ՝ Ա. Ավագյանի, կայացավ ՀՔԱ Վանաձորի գրասենյակը՝ ընդդեմ ՀՀ Ֆինանսների նախարարության՝ տեղեկատվություն տրամադրելուն պարտավորեցնելու պահանջով գործի դատաքննությունը:
Դատական նիստին մասնակցում էին հայցվոր ՀՔԱ Վանաձորի գրասենյակի նախագահ Արթուր Սաքունցի ներկայացուցիչ, Կազմակերպության իրավաբան Անի Չատինյանը և ՀՀ Ֆինանսների նախարարության ներկայացուցիչ Անուշ Ղարիբյանը:
Ա. Չատինյանը պնդեց ներկայացված պահանջը, իսկ պատասխանողի ներկայացուցիչ Ա. Ղարիբյանն առարկեց ներկայացված հայցի դեմ:
Իր բացման խոսքում Ա. Չատինյանը նշեց, որ ՀՔԱ Վանաձորի գրասենյակը տեղեկատվության հարցմամբ դիմել է ՀՀ ֆինանսների նախարարություն՝ պահանջելով տեղեկատվություն տրամադրել Կազմակերպություն դիմած անձի կողմից տրասնսպորտային միջոցի մաքսազերծման գումարի հաշվարկման կարգի, դա կարգավորող իրավական ակտի, հաշվարկված գումարի մեջ ընդգրկված հարկատեսակների վերաբերյալ: Սույն հարցմամբ պահանջվել է տրամադրել տեղեկատվական բազայի կրկնօրինակը: Տեղեկատվություն տնօրինող ՀՀ Ֆինանսների նախարարությունը պատասխան գրությամբ տրամադրել է ոչ ամբողջական տեղեկատվությունը, մասնավորապես, հայտնվել է, որ ՀՀ մաքսային սահմանով տեղափոխվող ավտոմեքենաների մաքսային մարմնի բազայում առկա արժեքների ցանկն ամփոփ տարբերակով հրապարակվում և ներկայացվում է ավտոտրանսպորտային միջոցների մաքսային ձևակերպումների մասնագիտացված մաքսատանը՝ դրա համար հատուկ հատկացված վայրում: Ա. Չատինյանը նշեց, որ Կազմակերպության հարցմանն ամբողջական պատասխան չտրամադրելու արդյունքում խախտվել է Կազմակերպության՝ տեղեկատվության ազատության իրավունքը և խնդրեց բավարարել ներկայացված հայցը:
ՀՀ Ֆինանսների նախարարության ներկայացուցիչ Ա. Ղարիբյանն առարկեց ներկայացված հայցի դեմ՝ նշելով, որ Նախարարությունը տրամադրել է պահանջված ամբողջական տեղեկատվությունը, իսկ տեղեկատվական բազայի տվյալները Մաքսային միության օրենսգրքով և «Մաքսային կարգավորման մասին» ՀՀ օրենքով սահմանված կարգով հրապարակվել են ավտոտրանսպորտային միջոցների մաքսային ձևակերպումների մասնագիտացված մաքսատանը:
Այնուհետև Դատարանն անցավ ապացույցների հետազոտմանը, որից հետո, լսելով դատական վիճաբանությունների փուլում հայցը պնդելու և դրա դեմ առարկելու կողմերի դիրքորոշումները, Դատաքննությունը համարեց ավարտված:
Դատարանի վճիռը կհրապարակվի 2016 թ. փետրվարի 22-ին՝ ժամը 17:00-ին: