Մենք շարունակում ենք հանդես գալ որպես հպատակներ, որոնք պետք է փրկագին վճարեն
15:44, November 4, 2016 | Այլ լրատվամիջոցներ, Նորություններ
ՀՀ վարչապետ Կարեն Կարապետյանի որոշումներն ու հանձնարարականները որեւէ կերպ կապ չունեն իրավական պետության հետ: Այս մասին Araratnews.am-ի հետ զրույցում նշեց Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը՝ անդրադառնալով Կարապետյանի այն հայտարարությանը, թե այսուհետ «Սեքյուրիթի դրիմ» եւ «Փարքինգ սիթի սերվիս» ՓԲԸ-ի՝ վարորդներից գանձվող գումարները մասնավորից անցնելու են պետությանը:
Հարցին, թե այդկերպ խնդիրը լուծում կստանա, նկատի ունենալով, որ վարորդները դժգոհում են հիմնականում անհարկի տուգանքներից, Սաքունցն ասաց հետեւյալը. «Նախ գանք ինքնին որոշման կամ հանձնարարականի տրամաբանությանը, որը բխում է ոչ թե իրավական կարգավորումների տրամաբանությունից, կամ իրավական հիմնավորումներով է այդ հանձնարարականը տրված, այլ տրված է վարչական կամայական լուծման տրամաբանությունից»,- ասաց Սաքունցը, հավելելով, թե կա իշխանություն, եւ լուծումը բխում է իշխանության ցանկությունից: «Դա որեւէ առնչություն իրավական պետության սկզբունքների եւ մոտեցումների հետ չունի: Իսկ եթե անդրադառնում ենք արդեն կոնկրետ այդ խնդրին, որը վերաբերում է արագաչափերին եւ այլն, այստեղ արդեն մեկ այլ խնդիր ունենք, որ ժամանակին բարձրացվել է. արդյոք համաչա՞փ է այդքան վարչական հսկողությունը վարորդների նկատմամբ»,- ասաց Սաքունցը, հավելելով, որ այն համաչափ չէ:
Նրա խոսքով՝ պատիժները, որոնք կիրառվում են վարորդների նկատմամբ, բնավ էլ չեն հանգեցրել ՃՏՊ-ների թվի նվազման: «Կա ավելի շատ կարգավորումների, աջակցությունների, ծառայության մատուցման ինստիտուտը, որի պարագայում դու ստանում ես արդյունք: Իսկ մեր Հայաստանի պարագայում, երբ ճանապարհները խայտառակ վիճակում են՝ թե ներհամայնքային, թե համապետական, եւ այդ պարագայում, երբ դու ամբողջ ռեսուրսն ուղղում ես այդ արագաչափերի ներդրմանը, այսինքն՝ վարորդների կողմից իբր թե երթեւեկության կանոնների խախտումների դեմ պայքարին, չապահովելով վարորդների, հետիոտների համար անհրաժեշտ ճանապարհային պայմաններ, դա նշանակում է, որ դու ոչ թե նորմալ պայմաններ են ապահովում երթեւեկության համար, այլ վարչական ռեսուրսով գումարներ կորզելու խնդիր ես լուծում»,- մեզ հետ զրույցում նշեց Արթուր Սաքունցը:
Իրավապաշտպանի կարծիքով՝ վարչապետը նախեւառաջ պետք է անդրադառնա այդ հարցին՝ որքանո՞վ են իրավաչափ այդ արագաչափերը: Բացի այդ, կարմիր գծերի ներդրումն արդյունավետ է քաղաքացիներին ծառություններ մատուցելու տեսանկյունից: Ա. Սաքունցի խոսքով՝ միայն գումարների տեղաբաշխման հասցեատերերին փոխելը հարցի լուծում չէ, քանի որ նպատակը մնում է նույնը՝ գումար կորզել: «Այսինքն՝ մենք շարունակում ենք հանդես գալ որպես հպատակներ, որոնք պետք է փրկագին, հարկեր, տուրքեր վճարեն, այնպես, ինչպես բահրան էր, կոռը, տասանորդը»,- ասաց Սաքունցը, հավելելով, որ վարչապետի հանձնարարականները չի համարում այնպիսի որոշումներ, որոնք համահունչ են իրավական պետությանը եւ ժողովրդավարական կառավարմանը:
Մեր հարցին, թե նպատակ կա այս կերպ պետական բյուջե՞ն լցնելու, թե՞ գանձվող գումարները տնօրինողների շրջանակը ընդլայնելու, իրավապաշտպանն ասաց. «Վարչապետի հանձնարարականի բուն իմաստը շարունակում է մնալ հետեւյալը. քաղաքացին դիտարկվում է միայն որպես փող վճարող, այսինքն՝ ոչ թե քաղաքացուն ծառայության մատուցման տրամաբանությունն է գործում, նրա համար խնդիրներ լուծելն է կարեւոր, այլ նա դիտարկվում է որպես հպատակ, ով փող է վճարում»:
Արթուր Սաքունցը կարծում է, որ Սերժ Սարգսյանն այլեւս ռեսուրս չունի տրամադրելու եւ մի քանի օլիգարխների ախորժակը զսպելու, եւ հիմա սկսում է սահմանափակումները, եւ անցնելու է սեփականության վերաբաշխմանը: Սաքուցը նշեց, թե Կարեն Կարապետյանը ինքն է հայտարարել, որ տնտեսական վիճակը իսկապես վատ է, հետեւաբար, պետք է գնալ հարկերի հավասար բաշխման քաղաքականության: