Երկու երեխայի մահվան գործով ազատազրկված բժշկուհին կբողոքարկի դատավճիռը
11:19, June 6, 2016 | Այլ լրատվամիջոցներ, Նորություններ | Կարինե Հովհաննիսյան
Մահացած երեխաների ծնողները, մինչդեռ, երեք տարվա ազատազրկումը մեղմ պատիժ են համարում:
Արմավիրցի 4-ամյա Կարինեի և 5-ամյա Էրիկի մահվան գործով երեք տարվա ազատազրկման դատապարտված բժիշկ Անահիտ Պետրոսյանը պատրաստվում է բողոքարկել դատարանի վճիռը: Այս մասին «Ազատությանը» հայտնեց նրա փաստաբան Արայիկ Ղազարյանը: Դատարանը բժշկին մեղավոր է ճանաչել իր մասնագիտական պարտականությունները չկատարելու կամ ոչ պատշաճ կատարելու մեջ:
«Մենք դատավճռից գոհ չենք, պետք է բողոքարկենք վերաքննիչ դատարան, որովհետև մեր դիրքորոշումը նույնն է՝ նա հանցագործություն չի կատարել: Գուցեև ինչ-որ տեղ սխալ է արել, բայց դա հանցագործություն չի կարելի համարել: Ես համարում եմ, որ երկրորդ ատյանը հնարավոր է, որ այո՝ ավելի օբյեկտիվ լինի, ավելի հումանիստական․․․»,- ասաց փաստաբանը:
Երեկ Արմավիրի մարզի ընդհանուր իրավասության դատարանը երեք տարվա ազատազրկման վճռից բացի նաև որոշում կայացրեց Անահիտ Պետրոսյանին 1 տարի 6 ամիս ժամկետով մասնագիտական գործունեություն իրականացնելու իրավունքից զրկելու մասին: Հիվանդանոցում մահացած 4-ամյա Կարինե Հովհաննիսյանի իրավահաջորդի շահերը ներկայացնող՝ Հելսինկյան քաղաքացիական ասամբլեայի Վանաձորի գրասենյակի իրավապաշտպան Անի Չատինյանն «Ազատության» հետ զրույցում ասաց՝ թեպետ 3 տարին քիչ է, բայց բավական է, որպեսզի բժիշկ Անահիտ Պետրոսյանը հեռու մնա հիվանդանոցից: «Երեք տարին շատ քիչ է երկու երեխայի մահվան համար, բայց, այնուամենայնիվ, պատժելու համար, իմ կարծիքով, էդ ժամանակահատվածն էլ բավական կլինի երևի»,- ասաց Չատինյանը:
Դատարանի այս որոշումը նախադեպային համարող՝ տուժող կողմի ներկայացուցիչն ասաց՝ պատժաչափն ավելացնելու վերաբերյալ իրենք դիմում կներկայացնեն միայն այն դեպքում, եթե երեխայի ծնողները նման որոշում կայացնեն: Անցած տարի բժիշկ Անահիտ Պետրոսյանի հսկողության տակ գտնվող 5-ամյա Էրիկը, ծնողի պնդմամբ, Երևան է տեղափոխվել արդեն մահացած: Մայրը՝ Լուսինե Ամիրխանյանը, երեք տարվա ազատազրկումը մեղմ պատիժ է համարում: «Երկու երեխայի գլուխն ուտես մի օրում ու երեք տարի՞, ես չեմ հասկանում: Թեկուզ մի դոմիկի մեջ եմ մնում, դոմիկն էլ կվաճառեմ․․․ ոչ մի ծնողի արցունքներ իրանք չեն մարսելու, եթե ծնողներ կան, որ կարող են ինձ հետ պայքարել, թող միանան: Եթե չէ, ես մենակով․․․ բոլոր ծնողների արցունքների համար ինքը պետք է պատասխան տա»,- ասաց մահացած երեխայի մայրը:
Ու թեև Արմավիրի մարզի հիվանդանոցի ինֆեկցիոն բաժանմունքի նախկին ղեկավարն արդեն շուրջ մեկ տարի է չի աշխատում հիվանդանոցում, 5-ամյա Էրիկի մայրը, միևնույն է՝ չի վստահում հիվանդանոցի մյուս բուժաշխատողներին: Առողջական խնդիրներ ունեցող ավագ դստերն այսօր Երևան էր բերել: Ասում է՝ բժիշկ Անահիտ Պետրոսյանն իրեն զրկեց երջանիկ ապրելու հնարավորությունից: Որդեկորույս մոր խոսքով, մինչ այսօր գիշերներ է լուսացնում որդու գերեզմանի մոտ: Արտասվելով վերհիշում է՝ վերակենդանացման բաժանմունքում որդին տասն օրից ավելի պայքարել է կյանքի համար, բայց՝ ապարդյուն․ – «Անընդհատ սպասում էինք, որ լավ նորություն կիմանանք, բայց ապարդյուն էր․․․ոչ մի բան չեղավ»:
Դատական նիստերից մեկի ժամանակ, երբ դատավորը հարց ուղղեց ամբաստանյալ բժշկուհուն՝ ինչպե՞ս պատահեց, որ իր հսկողության տակ գտնվող երկու երեխաներն էլ մահացան, Պետրոսյանը պատասխանել էր՝ ինքն անուշադիր չի եղել, արել է հնարավոր ամեն բան: Այդ օրը, մինչ դատարանի դահլիճ մտնելը, լրագրողների հետ զրույցում Անահիտ Պետրոսյանը վստահություն էր հայտնում, որ դատարանն իրեն կարդարացնի: