Պաշտոնանկություններին պետք է հետևի որոշ պաշտոնյաների պատժի գործընթացը
09:45, October 7, 2016 | Այլ լրատվամիջոցներ, Նորություններ
Այս օրերին տեղի ունեցող պաշտոնանկություններին պետք է հետևի որոշ պաշտոնյաների պատժի գործընթացը, այլապես հնարավոր չէ երկրում բարեփոխում ակնկալել: Lragir.am-ի հետ զրույցում նման դիտարկում արեց իրավապաշտպան Արթուր Սաքունցը:
«Այն պաշտոնատար անձանց, որոնց գործունեության վերաբերյալ բազմաթիվ հրապարակումներ կան, լուրջ քրեական հանցագործությունների մեջ կասկածներ, նրանց նկատմամբ պետք է ժամանակին նախապատրաստվեին նյութեր, և մարդիկ ենթարկվեին պատասխանատվության՝ բազմակողմանի, լրիվ և օբյեկտիվ քննության արդյունքում: Այն, որ դա չի արվել, և մարդիկ երկար տարիներ հովանավորվել են նույնիսկ ամենածանր հանցագործությունների կատարման համար, չի կարող հույս տալ, թե բարեփոխում է լինելու: Խոսքը վերաբերում է հենց Սյունիքի նախկին մարզպետ Սուրիկ Խաչատրյանին, ում անունը կապված է ոչ միայն տնտեսական բնույթի հանցագործությունների, կոռուպցիայի հետ, այլ մարդկանց սպանության գործերի: Իսկ նման պարագայում ազատելով նրանց աշխատանքից՝ փորձել ներկայացնել որպես բարեփոխման կամք կամ օրինակ, դա առնվազն աչքակապություն է, որովհետև համակարգային խնդիրը, որը գոյություն ունի ՀՀ-ում, դա անպատժելիության մթնոլորտն է», ասաց Սաքունցը:
Նրա խոսքով՝ հարց է ծագում՝ նոր նշանակված կառավարության անդամները, ելնելով իրենց նախորդների օրինակից, արդոք չեն մտածելու, որ միևնույն է, վատագույն դեպքում ազատվելու են աշխատանքից, և կօգտագործեն իրենց հատկացված ժամանակը անձնական հարստացման և կոռուպցիոն տարբեր բնույթի գործարքներ կատարելու համար: Այսինքն, ըստ Սաքունցի, չի կարող խոսք գնալ բարեփոխման մասին այնպիսի տնտեսական պայմաններում, որի մասին վկայեց հենց ինքը՝ նոր վարչապետը, եթե չհաղթահարվի անպատժելիության մթնոլորտը:
“Իսկ անպատժելիության մթնոլորտը կարող է հաղթահարվել միայն այն դեպքում, երբ պաշտոնատար անձինք, որոնք թաղված են եղել կոռուպցիայի մեջ և որոնցով պայմանավորված է եղել ամբողջ կոռուպցիոն համակարգը, նրանք պատասխանատվության ենթարկվեն: Հակառակ պարագայում կոռուպցիոն մեխանիզմները կմնան նույնը, ուղղակի կփոխվեն կատարողները: Այսինքն՝ սա իր բովանդակությամբ հիմա կոչվում է միմիայն կոռուպցիոն մեխանիզմներն աշխատացնողների անունների փոփոխություն, իսկ դա բարեփոխում անվանել ոչ թե չի կարելի, այլ նույնիսկ անհնար է նման ձևակերպում տալը”,- ընդգծեց նա: