«Հայ կանանց ճակատի» անդամ Սուսաննա Սիմոնյանի բողոքի քննությունը կրկին հետաձգվեց
14:57, November 7, 2016 | Նորություններ, Սեփական լրատվություն
2016 թ. նոյեմբերի 7-ին ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանում, նախագահությամբ՝ դատավոր Մ. Մարտիրոսյանի, շարունակվեց Սուսաննա Սիմոնյանի կողմից ՀՀ Գլխավոր դատախազության հատկապես կարևոր գործերով քննության վարչության դատախազ Վ. Դոլմազյանի՝ քրեական գործի հարուցումը մերժելու մասին որոշման բողոքարկման բացթողնված ժամկետը վերականգնելու հրաժարման դեմ ներկայացված բողոքի քննությունը:
Բողոքի քննությունը կայացավ Ս. Սիմոնյանի ներկայացուցիչ, ՀՔԱ Վանաձորի գրասենյակի Երևանի ներկայացուցչության իրավաբան Տաթևիկ Սիրադեղյանի և ՀՀ Գլխավոր դատախազության հատկապես կարևոր գործերով քննության վարչության դատախազ Վ. Դոլմազյանի մասնակցությամբ:
Ս. Սիմոնյանի ներկայացուցիչը դատարան ներկայացրեց 2016 թ. հուլիսի 19-ի հետազոտության արդյունքները, որով Ս. Սիմոնյանի մոտ անոթային խնդիրներ չէին հայտնաբերվել: Տ. Սիրադեղյանը նշեց նաև, որ իրենք նպատակ են ունեցել բժշկական փաստաթուղթ վերցնել նաև բուժող բժշկից, սակայն նա առողջական խնդիրների պատճառով բացակայել է աշխատանքից և խնդրեց հնարավորություն տալ Ս. Սիմոնյանին բուժող բժշկի կողմից տրված տեղեկանքը ներկայացնել դատարան:
ՀՀ Գլխավոր դատախազության հատկապես կարևոր գործերով քննության վարչության դատախազ Վ. Դոլմազյանն առարկեց դատական նիստը հետաձգելու միջնորդության դեմ՝ նշելով, որ 2016 թ. հուլիսի 19-ի էպիկրիզն ամբողջական տեղեկատվություն է պարունակում Ս. Սիմոնյանի առողջական վիճակի վերաբերյալ և բուժող բժշկի տեղեկանքը չի կարող այլ տեղեկություններ պարունակել:
Տ. Սիրադեղյանը նշեց, որ բողոքին կից ներկայացված էպիկրիզը վերաբերում է Ս. Սիմոնյանի ՝ 2016 թ. հուլիսի 19-ի դրությամբ առողջական վիճակին, մինչդեռ՝ բուժումից հետո Ս. Սիմոնյանը կրկին խնդիրներ է ունեցել, կրկին դիմել է բուժօգնության, և իրենք նպատակ ունեն հուլիսի 19-ից հետո Ս. Սիմոնյանի առողջական վիճակի վերաբերյալ տեղեկություններ ներկայացնել դատարան:
Դատարանը, ճշտելով փաստաթղթի ներկայացման համար անհրաժեշտ ժամանակը, որոշեց միջնորդությունը բաարարել և բողոքի քննությունը հետաձգել մինչ 2016 թ. նոյեմբերի 21-ը՝ ժամը 10:00-ը: