0 8000 12 11

Ոստիկանապետ Վլադիմիր Գասպարյանը նախօրեին Տավուշի մարզային վարչությունում խորհրդակցության ժամանակ մասնակիցների ուշադրությունը հրավիրել է առաջիկա համապետական ընտրությունների ընթացքում ոստիկանության դերին ու գործառույթներին՝ նշելով, որ «Սերժ Սարգսյանի պահանջն է՝ ընտրական ողջ գործընթացում առավելագույնս պահպանել օրենքի տառն ու ոգին, լինել բացարձակ արդար և անխոցելի»:

Իրավապաշտպան Արթուր Սաքունցը «Առաջին լրատվական»-ի հետ զրույցում նկատեց, որ դրանք ընդամենը օդի մեջ հնչեցված հայտարարություններ են, քանի որ նախորդ բոլոր նախադեպերը Հայաստանում հուշում են, որ օրենքի տառն ու ոգին չեն պահպանվում։ «Եվ հետո՝ Սերժ Սարգսյանը չպետք է ասի՝ օրենքի տառին հետևեն, թե չհետևեն։ Օրենքը գերակա է և պետք է գործի առանց որևէ մեկի ասելու։ Սա անվիճելի փաստ է։ Օրենքի գործելու համար հատուկ հրահանգ պետք չէ։ Սերժ Սարգսյանը բոլորովին այլ ուղերձ, հանձնարարական պետք է տար այն մասին, որ օրենքի խախտումների դեպքում մեղավորները կհեռացվեն համակարգից և կպատժվեն օրենքի ամբողջ խստությամբ։ Նա պետք է ասեր, որ պատասխանատվության կենթարկի յուրաքանչյուրին, ով չի հետևի օրենքի տառին ու ոգուն»,- հավելեց իրավապաշտպանը։

Նրա դիտարկմամբ՝ մինչ այս մենք տեսել ենք ընտրախախտների, ընտրությունների ժամանակ խախտումների վրա աչք փակածների հանդեպ մեղմ վերաբերմունք, ներողամտություն. «Այնպես որ՝ նման հայտարարությունները հերթական երեսպաշտության դրսևորումն են։ Դրանք բառեր են առանց բովանդակության»։

Իրավապաշտպանի խոսքով՝ ոստիկանությունը միշտ գործել է ոչ թե օրենքի տառին համապատասխան, այլ քաղաքական հրահանգով։ «Նրանց կտրվի քաղաքական հրահանգ, և նրանք կգործեն ըստ այդ հրահանգի։ Որևէ դրական սպասելիք չունեմ ես ոստիկանությունից»,- եզրափակեց Սաքունցը։

1in.am