ՀՔԱ Վանաձորի գրասենյակը կոչ է անում իրավասու պետական մարմիններին չապավինել քաղաքացիների իրավագիտակցության ցածր մակարդակին և չդիմել անօրինական քայլերի
18:55, May 9, 2016 | Նորություններ, Սեփական լրատվություն
ՀՔԱ Վանաձորի գրասենյակ դիմած քաղաքացին հայտնել է, որ Վանաձորի քաղաքապետարանը իր դեմ գումարի բռնագանձման պահանջի մասին հայցադիմում է ներկայացրել դատարան՝ հետ պահանջելով երեխայի խնամքի համար տրվող նպաստի՝ ավելի քան մեկ տարվա համար վճարված գումարը՝ շուրջ 200.000 ՀՀ դրամ:
Հայցադիմումը հիմնավորվել է նրանով, որ քաղաքացի Լիլիթ Եղիազարյանը 2012 թ. հուլիսից մինչ 2014 թ. մարտ ամիսը ստացել է երեխայի խնամքի համար տրվող նպաստ, այնինչ դեռևս 2013 թ. հունվարի 31-ին նրա գործատու կազմակերպությունը դադարեցրել է գործունեությունը, ինչի մասին Լ. Եղիազարյանը չի տեղեկացրել համապատասխան տարածքային կենտրոն, որի արդյունքում նպաստի տրամադրումը պետք է դադարեցվեր:
Վերոնշյալը Վանաձորի քաղաքապետարանի կողմից դիտվել է որպես անհիմն հարստացում:
ՀՔԱ Վանաձորի գրասենյակի աջակցությամբ Լ. Եղիազարյանի կողմից հայցադիմումի դեմ առարկություն է ներկայացվել, որով հիմնավորվել է այն հանգամանքը, որ քաղաքացին չէր կարող իմանալ իր գործատու կազմակերպության գործունեության դադարեցման մասին, քանի որ գործատուի հետ ունեցել է բացառապես աշխատանքային հարաբերություններ, իսկ աշխատանքի ազատման մասին ծանուցում գործատուի կողմից չի ստացել: Ավելին՝ գործատուն ինքն է պարտավոր եղել համապատասխան տարածքային կենտրոնին տեղեկացնել աշխատողին աշխատանքից ազատելու մասին: Հետևաբար՝ ենթադրյալ վնաս պատճառելու մեջ բացակայում է Լ. Եղիազարյանի մեղքը, և նա պարտավոր չէ հետ վերադարձնել պահանջվող գումարը:
Վերոնշյալի հիման վրա Լոռու մարզի ընդհանուր իրավասության դատարանը 2016 թ. մարտի 18-ին մերժել է Վանաձորի քաղաքապետարանի հայցը:
ՀՔԱ Վանաձորի գրասենյակը կոչ է անում իրավասու պետական մարմիններին չապավինել քաղաքացիների իրավագիտակցության ցածր մակարդակին և չդիմել անօրինական քայլերի:
Բոլոր նրանք, ովքեր հայտնվել են համանման իրավիճակներում, կարող են դիմել ՀՔԱ Վանաձորի գրասենյակ և ստանալ անվճար իրավական աջակցություն: