0 8000 12 11

Մենք արձանագրում ենք, որ հանրաքվեի խախտումների վերաբերյալ իշխանության մարմինների կողմից համապատասխան ջանք ու գործողություն չի տարվում: Չի նկատվում նաև դրանք հետագայում կանխելու պատրաստակամություն: Այս անգործության մեջ գտնվելով` իրենք դրսևորում են պաշտպանողական պահվածք: Սկսում են հարցը տեղափոխել ձևական այնպիսի դաշտ, որով ուղղակի փորձ է արվում սքողել առկա խայտառակությունը: Լրագրողների հետ հանդիպման ժամանակ նման տեսակետ հայտնեց իրավապաշտպան Արթուր Սաքունցն՝ անդրադառնալով ԵԱՀԿ/ԺՀՄԻԳ-ի զեկույցի վերաբերյալ իշխանության ներկայացուցիչների արձագանքներին:

Անդրադառնալով նոր Ընտրական օրենսգրքի վերաբերյալ իշխանության հետ միասնական քննարկումներին` Սաքունցը նկատեց. «Արդյո՞ք մենք Ընտրական օրենսգրքի վրա կենտրոնանալով` չենք սրբագրում ու աչքաթող չենք անում խախտումների այն բուն պատճառները, որոնք եղել են: Օրինակ՝ խախտումների ոչ արդյունավետ քննություն իրականացնելու հանգամանքը: ՀՔԾ-ին ասում ենք` այս չափի լցոնում է կատարվել, ասում են՝ դա ձեր երևակայության արդյունքն է: ՀՔԾ-ն ոչ թե պետք է երևակայություն չափի, այլ գործողություն կատարի»:

Նրա խոսքով՝ խնդիրը միայն Ընտրական օրենսգրքում փոփոխություններ կատարելու մեջ չէ, այլ այստեղ քաղաքական համակարգում փոփոխություններ կատարելու կամքի մասին է խոսքը:

«Չենք կարող մեկուսի դիտարկել ու ասել` գիտեք, եթե էլեկտրոնային քվեարկության ինչ-որ մեթոդներ դրեցինք, ապա 2017-ին կիրականացվի ընտրություն, որը կփոխի իրավիճակը: Հենց այս պահին իրավապահ մարմիններն ընտրական խախտումների հետ կապված պատշաճ քննություն չեն կատարում, և մենք որևէ վստահություն չենք կարող ունենալ, որ նրանք հակված են լավ ընտրական օրնեսդրություն, ընտրական լավ պրակտիկա ապահովելուն: Օրինակ՝ մինչև ընտրական խախտումների հետ կապված գոնե մի տեղամասի քվեարկության արդյունք չեղյալ չհայատարարվի, ապա որևէ երաշխիք չկա, որ Ընտրական օրենսգրքի միջոցով կարող ենք հասնել արդյունքի»,- ասաց նա՝ հավելելով, որ բացի մանիպուլյացիաներից, արամտական փոփոխություններ չենք տեսնում:

«Այդ դաշտում էներգիա դնելը չեմ կարծում, որ այն ճանարպարհն է, որով կարող ենք արդյունքի հասնել: ԵԱՀԿ/ԺՀՄԻԳ-ը հստակ նշեց, որ վարչական ռեսուրսներ են օգտագործվել: Նախագահի աշխատակազմի ղեկավար, Պնախարար, ԿԳ նախարար, նրանց ո՞վ է պատասխանատվության ենթարկելու: Ընտրական օրենսգիրքը, էլեկտրոնային քվեարկության մեթոդն ընդամենը գործիքներ են: Իսկ եթե գործիք կիրառողը մնում է իր բովանդակությամբ որպես կոռումպացված, լավագույն գործիքն էլ կփչացնի: Մեզ պետք է վստահություն, որ իշխանություն կոչվածն իրապես հակված է փոփոխություն կատարելու: Դրա լուծման համար ոչ թե միայն Ընտրական օրենսգիրքն է պետք փոխել, այլ իմ նշած անձանց պատասխանատվության ենթարկելու փաստը»,- եզրափակեց Արթուր Սաքունցը:

newsbook.am