0 8000 12 11

2015թ. դեկտեմբերի 8-ին ՀՀ Վերաքննիչ քրեական դատարանում, նախագահությամբ դատավոր Ռ. Թադևոսյանի, շարունակվեց բողոքաբեր Սուսաննա Անտոնյանի ներկայացուցիչներ Արթուր Սաքունցի և Արայիկ Զալյանի ներկայացրած վերաքննիչ բողոքի քննությունը: Դատական նիստին մասնակցում էին բողոքաբեր Ս. Անտոնյանի ներկայացուցիչ Ա. Սաքունցը և վարույթն իրականացրած քննիչ Արսեն Գեղամյանը:

Սույն դատական նիստին նախագահող դատավոր Ռ. Թադևոսյանը որոշ հարցեր ուղղեց դատավարության կողմերին: Մասնավորապես, նա փորձեց վարույթն իրականացնող մարմնից պարզել, թե ինչ գործողություններ են ձեռնարկվել Արման Անտոնյանի մահվան գործով ՀՀ վճռաբեկ դատարանի կողմից կայացված որոշմամբ արձանագրված խախտումները վերացնելու ուղղությամբ: Ա. Գեղամյանը նշեց, որ ՀՀ Վճռաբեկ դատարանի որոշման հիման վրա մասնագետի մասնակցությամբ զննվել է հիվանդների գրանցամատյանը և դրանում հեպատիտ B հիվանդություն ունեցող անձանց վերաբերյալ տվյալներ առկա չեն եղել: Այն հարցին, թե ինչ գործողություններ են ձեռնարկել Ա. Անտոնյանին առաջին բուժօգնություն ցուցաբերած շտապ օգնության աշխատակիցների կողմից մասնագիտական պարտականությունների կատարման ընթացքում հնարավոր թերությունների բացահայտման ուղղությամբ, Ա. Գեղամյանը հայտնեց, որ ՀՀ Վճռաբեկ դատարանի որոշումից հետո հարցաքննվել են կանչին արձագանքած մասնագետները, առգրավվել են կանչի արձանագրությունները, իսկ այդ մասնագետների գործողությունների իրավական գնահատականը տրվել է որոշման պատճառաբանական մասում՝ եզրափակիչ մասում անդրադարձ չկատարելով նրանց գործողություններին: Հիվանդի ամբուլատոր քարտի հայտնաբերման և հետազոտման առումով վարույթն իրականացրած մարմինը նշեց, որ իր տեղեկություններով ամբուլատոր քարտը հիվանդության պատմագրին նախորդող փաստաթուղթ է, իսկ հիվանդության պատմագիրը հայտնաբերել հնարավոր չի եղել:

Նախագահող դատավորը որոշ հարցեր ուղղեց նաև բողոքաբերի ներկայացուցիչ Ա. Սաքունցին՝ կապված Դատարան ներկայացված պահանջի հստակեցման հետ: Դատարանը փորձեց նաև պարզել, թե ըստ բողոքաբեր կողմի՝ անհետաձգելի քննչական գործողություններ չկատարելու՝ ՀՀ Վճռաբեկ դատարանի կողմից արձանագրված խախտման առթիվ ինչ գործողություններ կարող էր ձեռնարկել վարույթն իրականացնող մարմինը: Ա. Սաքունցը նշեց, որ նախաքննության ընթացքում վարույթն իրականացնող մարմինը որևէ միջոց չի ձեռնարկել նախկինում թույլ տրված խախտումների շուրջ քննություն կատարելու ուղղությամբ, նշելով, որ այդ մասով պետք է գործն ուղարկվեր ըստ ենթակայության՝ համապատասխան իրավական գնահատական տալու իրենց լիազորությունները ոչ պատշաճ կատարած պաշտոնատար անձանց գործողություններին:

Դատարանի հարցերից հետո բողոքի քննությունը համարվեց ավարտված, և նախագահող դատավոր Ռ. Թադևոսյանը հայտարարեց, որ որոշումը կհրապարակվի 2015 թ. դեկտեմբերի 9-ին, ժամը 16:00-ին:

2015 թ. դեկտեմբերի 9-ին հրապարակված որոշմամբ Դատարանը, քննության առնելով ներկայացված բողոքը, որոշեց այն բավարարարել մասնակիորեն: Մասնավորապես, Դատարանը որոշեց բեկանել ընդհանուր իրավասության դատարանի՝ 2015թ. սեպտեմբերի 16-ի բողոքը մերժելու մասին որոշումը, պարտավորեցնել վերացնել ՀՀ Վճռաբեկ դատարանի կողմից արձանագրված խախտումները, ինչպես նաև Ա. Անտոնյանի և վերջինիս իրավահաջորդի իրավունքների խախտումները:

Տես նաև՝ hcav.am