«Մարդու իրավունքների վիճակը ոստիկանություն – քաղաքացի հարաբերություններում» թեմայով քննարկում
10:27, February 11, 2016 | Մամլո հաղորդագրություններ | ՀՀ Գլխավոր դատախազություն, ՀՀ Հատուկ Քննչական Ծառայություն, ՈստիկանությունՀելսինկյան քաղաքացիական ասամբլեայի Վանաձորի գրասենյակը հրավիրում է մասնակցելու «Մարդու իրավունքների պաշտպանության հիմնախնդիրները ոստիկան – քաղաքացի հարաբերություններում» թեմայով քննարկմանը:
Միջոցառումը տեղի կունենա Կոնգրես Հյուրանոցի Բոլլ Ռում դահլիճում (հասցեն՝ ք. Երևան, Իտալիայի 1) 2016 թվականի փետրվարի 16-ին՝ ժամը 12:00-ին:
– Միջոցառման առաջին մասում կներկայացվի ոստիկանության կողմից մարդու իրավունքների խախտման վիճակը՝ ըստ ԶԼՄ մշտադիտարկման 2015թ. արդյունքների:
– Միջոցառման երկրորդ մասում նախատեսված է ներկայացնել «Հայաստանի Հանրապետության իրավապահ մարմինների գործունեությունը բնորոշող համաթվերը» զեկույցը, որն ամփոփում է 2015 թվականի օգոստոսին իրականացված սոցիոլոգիական հետազոտության արդյունքները:
ՀՀ իրավապահ մարմինների կամայականության և ՀՀ Ոստիկանության վստահության համաթվերի միջոցով բացահայտվել է քաղաքացիների վերաբերմունքը իրավապահ մամինների գործունեության նկատմամբ:
– Միջոցառման երրորդ մասում կցուցադրվի Թեհմինե Ենոքյանի կողմից պատրաստված «Պարբերական հիվանդություն» վերնագիրը կրող տեսազեկույցը, որում ներառված են 2014-2015 թվականների քաղաքական հետապնդումների, խոշտանգումների, քաղաքացիների վրա հարձակման դեպքերը: Այս երկու տարվա ընթացքում ինչպիսի զարգացումներ են տեղի ունեցել քրեական գործ հարուցելու, հանցագործությունները բացահայտելու ուղությամբ: Հետադարձ հայացք նետելով՝ պարզ է դառնում, որ բոլոր գործերը կարճվել են, կասեցվել են, որոշ դեպքերում անգամ քրեական գործ չի հարուցվել:Բոլոր դեպքերին անդրադառնում են հենց իրենք տուժողները:
Քննարկմանը հրավիրված են իրավասու պետական կառավարման մարմինների, հասարակական կազմակերպությունների, հիմնադրամների, միջազգային կազմակերպությունների ներկայացուցիչներ:
Բանախոսներն են՝
| Արթուր Սաքունց | ՀՔԱ Վանաձորի գրասենյակի նախագահ |
| Անուշ Համբարյան | ՀՔԱ Վանաձորի գրասենյակի ծրագրերի օգնական |
| Ռուբեն Սարգսյան | սոցիոլոգ-փորձագետ |
| Թեհմինե Ենոքյան | ֆիլմի հեղինակ, լրագրող |
Միջոցառումն իրականացվում է ՀՔԱ Վանաձորի գրասենյակի կողմից իրականացվող «Ոստիկանության հետ հարաբերություններում քաղաքացիների իրավունքների պաշտպանության արդյունավետության բարձրացում» ծրագրի շրջանակներում Նորվեգիայի հելսինկյան կոմիտեի ֆինանսական աջակցությամբ:
Կից կարող եք տեսնել քննարկման օրակարգը:
Հարցերի դեպքում կարող եք զանգահարել +374 322 4 22 68 հեռախոսահամարով կամ գրել communication@hcav.am էլ փոստին:
Կոնտակտային անձ՝ ՀՔԱ Վանաձորի գրասենյակի հասարակայնության հետ կապերի մասնագետ Նարինե Եգանյան