0 8000 12 11

Սա իշխանության ձևակերպած օրակարգն է, որ շարժումը թափ ստանա, մարդկանց մեծ հոսքեր լինեն: Մտածում են. «Սա ի՞նչ թիվ է, որ արձագանքենք»: Այս մասին Araratnews.am-ի հետ զրույցում, մեկնաբանելով հոսանքի թանկացման դեմ բողոքի ալիքը, ասաց ազգագրագետ Հրանուշ Խառատյանը:

«Մենք տրվում ենք այդ պրովոկացիային: Ակնհայտ է, որ հասարակությունը սկզբունքորեն անընդունելի է համարում հոսանքի թանկացումը: Չեն ներկայացվել ռեալ փաստարկներ, թե խիստ անհրաժեշտություն էր այդ թանկացումը: Մնացած առումներով էլ՝ եթե վատ կառավարում է եղել, թող լուծեն այդ խնդիրը: Մարդկանց ջանից ինչքա՞ն կարելի է հանել»,- նկատեց նա:

Խառատյանը կարծում է, որ կարևոր չէ, թե քանի մարդ է հավաքվում փողոցում, իշխանությունը տեղյակ է, որ որոշումից ոչ միայն այդ մի քանի հոգին, այլ՝ ամբողջ հասարակությունն է դժգոհ:

«Միշտ կարող է լինել այդ խնդիրը: Մի՞թե մարդկանց թվով է որոշվում: Մի՞թե այդ պրովոկացիային մենք պետք է տրվենք: Մարդիկ պարզ հասկացրել են, որ անհնար է: Ամենահասարակ բանը. եթե սա խնդիր է, թող սոցհարցում անեն: Ինչո՞ւ պետք է բոլորն անընդհատ օրերով, ժամերով փողոցում լինեն, որ հասկանալի լինի, թե իշխանությունը շատ վատ ու սխալ բան է արել: Աուդիտը պատասխանելու է այն հարցին, որն իր առջև դնելու են: Այն չի պատասխանելու հարցին, թե ինչ է արժենում ժողովրդի համար վատ կառավարումը: Վերջին հաշվով, իշխանությունն այդ հարցին պետք է լուծումով անդրադառնա, ոչ թե՝ փախչելով»,- նշեց նա:

Իրավապաշտպան Արթուր Սաքունցն, ով սատարում է «Ոչ թալանին» շարժմանը, ասում է, որ նախաձեռնությունն իր գործողություններով կարող է լուծում տալ կարևոր խնդիրների:

«Ես ինձ իրավունք չմ վերապահում հորդորելու կամ ուղղորդելու նախաձեռնությանը, որովհետև յուրաքանչյուր քաղաքացիական նախաձեռնություն ինքն է որոշում իր գործողությունների նպատակահարմարությունը, այն նպատակները կամ խնդիրները, որոնց համար հավաքվում: Ինձ համար՝ որպես  ՀՀ քաղաքացի, գոյություն ունի մեկ խնդիր. ոչ լեգիտիմ իշխանությունը, որը մեզ փորձում է պարտադրել ոչ լեգիտիմ Սահմանադրությունը և բռնությունը՝ որպես միջոց, թե արտաքին, թե ներքին հարաբերություններում: Կան շատ ավելի կարևոր մարտահրավերներ, արտաքին և ներքին, որոնց վրա պետք է ուշադրություն դարձվի: Ցանկացած քաղաքացիական նախաձեռնության գործողություններ ես մեկնաբանում եմ այդ մարտահրավերների տեսակետից, թե որքանով են ուղղված դրանց լուծմանը»,- մեզ հետ զրույցում ասաց նա:

Աղբյուրը՝ araratnews.am