0 8000 12 11

Աշնանը ՏԻՄ ընտրություններ կլինեն նաև Հայաստանի 3-րդ քաղաքում` Վանաձորում: Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը NewsBook-ի հետ զրույցում ասաց, թե ընտրական գործընթացները Վանաձորում առանձնապես պասիվ չեն և մատնանշեց, որ մի շարք կուսակցություններ արդեն իսկ իրենց թեկնածուներն են առաջադրել: Սակայն, անկախ ամեն ինչից, Սաքունցը հույս չի կապում ՏԻՄ ընտրությունների հետ, ըստ նրա, ՀՀ-ում տեղական ինքնակառավարումը որպես այդպիսին չի գործում և չի կարող լուծել տվյալ համայնքի առջև ծանրացած խնդիրները:

«Արձանագրված փաստ է, որ տեղական ինքնակառավարման մարմիններն ինքնուրույն խնդիրեր լուծել չեն կարող, քանի որ նրանք հանդիսանում են գործադիր Հանրապետական մարմինների շարունակությունը: Երևի թե բացառությամբ Գյումրիի, այլ տեղեր ՀՀԿ-ից բացի մարդ չի ընտրվում, ընտրվում են այն կուսակցության ներկայացուցիչները, որոնք իշխանության հետ դաշինքներ ունեն կամ էլ լոյալ են: Խոշոր համայնքներում կամ իշխանության ներկայացուցիչները, կամ իշխանության հետ դաշինք ունեցողներն են ընտրվում: Այնպես որ մեծ հույսեր կապել չենք կարող»,- ասաց նա:

Իրավապաշտպանի դիտարկմամբ՝ Վանաձորի այս տարվա ՏԻՄ ընտրությունների տարբերությունն այն է, որ առաջադրված թեկնածուները նոր անձինք են և պետական մարմիններում կամ տեղակական ինքնակառավարման մարմիններում աշխատելու փորձ չունեն: Բայց նրա համար այս հանգամանքն էլ դրական տեղաշարժի հիմք չէ, քանի որ բուն քաղաքական համակարգը չի փոխվել: Վերջինիս կարծիքով՝ նոր Ընտրական օրենսգիրքն էլ առկա ընտրական բարքերը չի փոխի, քանի որ այն միայն ֆորմալ առումով է նոր մեխանզիմներ մշակել:

«Ընտրական գործընթացները բովանդակային գործընթացներ են, որտեղ մեծ նշանակություն ունի ընտրողների պաշտպանվածությունը: Մեր ընտրողները ֆեոդալական կախվածության մեջ են գործատուներից, կենտրոնական ապարտից, մասնավոր բիզնեսից, ու շատ սահմանափակ թվով մարդիկ կան, որոնք ունեն ազատության որոշակի աստիճան և կարող են ազատ արտահայտվել՝ չվախենալով հետապնդումներից: Ընտրակաշառքների կիրառումը, վարչական ռեսուրսի կիրառումն այն հիմնարար խնդիրներից են, որոնք ԸՕ-ն չի կարգավորում: Սահմանադրական փոփոխությունների ժամանակ Լոռու մարզում «այո»-ն հաղթեց, ինչը եղավ կեղծման միջոցով, կամ 2013 թվականի նախագահական ընտրությունների ժամանակ ՀՀԿ-ն մեծ քաղաքաներում պարտվեց, բայց գյուղական համայնքների հաշվին ապահովեց իրենց ցանկալի թվերը և ընտրվեց Սերժ Սարգսյանը: Իհարկե, նոր ԸՕ-ով կուսակցություններին մեծ դեր է տրված, բայց կուսակցություններն այսքան կայացած չեն, որ էական ու արմատական փոփոխություններ անեն»,- ընդգծեց իրավապաշտպանը:

Սաքունցը վստահ է՝ ՏԻՄ ընտրությունների ժամանակ էլ իշխանությունը հավատարիմ կմնա իր գործելաոճին և կշարունակի կիրառել ընտրակեղծարարության հայտնի զինանոցը:

«Եթե մարդ մի քանի ամսվա ընթացքում որոշում է, որ այլ կուսակցության անդամ է գլխավորելու իր ցուցակը ու ստացվում է, որ կուսակցությունը 17 տարիների ընթացքում չի կարողացել իր համար կադրեր պատրաստել, դա արդեն հստակ ցուցանիշ է, որ կուսակցությունների դերը շատ ավելի նվազ է: Այս ընտրություններն էլ գործադիր իշխանության լծակների և մեկ-երկու անձանց համար է լինելու: Հանրայրն կարողությունը վերահսկելու և պահանջատար հասարակություն չունենալու հետևանք է, որ նման ընտրություններ են լինում»,- եզրափակեց Արթուր Սաքունցը:

newsbook.am