Ըստ դատավորների ընդհանուր ժողովի էթիկայի և կարգապահական հարցերի հանձնաժողովի՝ գործի քննության անհարկի ձգձգումը կարգապահական վարույթ հարուցելու հիմք չէ
12:34, September 15, 2015 | Նորություններ, Սեփական լրատվություն | Արդար դատաքննության իրավունք, Պացիենտների իրավունքներ
Ինչպես նախկինում տեղեկացրել էինք, ՀՔԱ Վանաձորի գրասենյակն զբաղվում է թմրաբանական բժշկական հաստատությունում սահմանված կարգի խախտմամբ հաշվառման վերցված Ռուստամ Ղազարյանի խախտված իրավունքների պաշտպանությամբ: Վերջինիս խախտված իրավունքների վերականգնման նպատակով ՀՀ Երևան քաղաքի Ավան և Նոր-Նորք վարչական շրջանների ընդհանուր իրավասության առաջին ատյանի դատարան ներկայացված հայցադիմումը, սակայն, դատարանը վերադարձրել էր՝ հայցադիմումին կցված փաստաթղթերը` որպես գրավոր ապացույց, բնօրինակով ներկայացված չլինելու հիմքով: Չնայած այն հանգամանքին, որ հիշյալ միջանկյալ որոշումը վերացվել էր ՀՀ Վերաքննիչ քաղաքացիական դատարանի որոշմամբ, այնուամենայնիվ, Ռ. Ղազարյանը և վերջինիս ներկայացուցիչ, ՀՔԱ Վանաձորի գրասենյակի իրավաբան Տ. Սիրադեղյանը դիմել են ՀՀ Արդարադատության խորհուրդ՝ դատավոր Ա. Դավթյանի նկատմամբ կարգապահական վարույթ հարուցելու պահանջով:
Նշված դիմումով Ռ. Ղազարյանը և Տ. Սիրադեղյանը հղում են կատարել ՀՀ Դատավորի վարքագծի կանոններին, ըստ որի՝ դատավորը պարտավոր է բարեխղճորեն կատարել իր մասնագիտական պարտականությունները, այդ թվում` ձեռնարկել բոլոր անհրաժեշտ միջոցառումները գործերի և նյութերի ողջամիտ ժամկետում քննության համար և գտել, որ դատավոր Ա. Դավթյանի կողմից հայցադիմումն անհիմն վերադարձնելը չի բխում գործի՝ ողջամիտ ժամկետում քննության ապահովման պարտականությունից: Մասնավորապես, դատարանի գործողությունները հանգեցրել են Ռ. Ղազարյանի կողմից ներկայացված հայցադիմումի վարույթ ընդունման և քննության անհիմն ու անհարկի ձգձգման, ինչն էլ իր հերթին անհարկի երկարաձգել է Ռ. Ղազարյանի՝ ենթադրյալ խախտված իրավունքների վերականգնման ընթացքը:
Քննության առնելով ներկայացված դիմումը՝ ՀՀ Դատավորների ընդհանուր ժողովի էթիկայի և կարգապահական հարցերի հանձնաժողովը որոշել է դատավոր Ա. Դավթյանի նկատմամբ կարգապահական վարույթ չհարուցել: Հանձնաժողովը վկայակոչել է օրենքի այն պահանջը, համաձայն որի՝ դատավորին կարգապահական պատասխանատվության ենթարկելու համար անհրաժեշտ է ոչ միայն օրենքի նորմի խախտման առկայությունը, այլ նաև այն, որ այդ խախտումը պետք է լինի կոպիտ:
Այսպիսով, ուսումնասիրելով ներկայացված նյութերը և ամփոփելով պարզված հանգամանքները, հանձնաժողովը գտել է, որ արդարադատություն իրականացնելիս ՀՀ Երևան քաղաքի Ավան և Նոր-Նորք վարչական շրջանների ընդհանուր իրավասության առաջին ատյանի դատարանի դատավոր Ա. Դավթյանը թույլ չի տվել նյութական և դատավարական նորմերի էական, անվիճելի և անհերքելի խախտումներ:
Տես նաև՝ hcav.am