0 8000 12 11

Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցն, այսօր, «Շանթի և իր ընկերների դատական գործը Եվրոպական դատարան ուղարկելու» թեմայի քննարկման ժամանակ ասաց, որ ակնկալում է` Եվրոպական դատարանը` ՀՀ-ում քաղաքական հետապնդման և այդ պրակտիկայի խնդիրների վերաբերյալ կտա իրավական գնահատական: Նրա խոսքով` մեր իշխանության համար դրամական տուգանքը շատ ավելի զգայուն է, քան իրավունքի պահպանության նկատմամբ պատասխանատվությունը:

Սաքունցը ևս մեկ անգամ հիշատակեց, թե ինչ է նշանակում «քաղբանտարկյալ» հասկացողությունը, որը սահմանվում է ԵԽԽՎ 2012 թվականի 1900 բանաձևով: «Ըստ այդ բանաձևի, անձնական ազատությունից զրկված մարդը պետք է համարվի քաղբանտարկյալ հետևյալ հիմքերի առկայության դեպքում.

– Եթե ազատազրկումը կիրառվել է Մարդու իրավունքների եվրոպական կոնվենցիայի կամ կից արձանագրություններով երաշխավորված հիմնական ազատություններից որևէ մեկի խախտմամբ:

– Եթե ազատազրկումը կիրառվել է ակնհայտորեն քաղաքական դրդապատճառներով` առանց որևէ օրինախախտման հետ առնչության:

– Եթե քաղաքական դրդապատճառներով կալանքի տևողությունը և պայմաններն ակնհայտորեն անհամաչափ են այն իրավախախտմանը, որով տվյալ անձը մեղավոր կամ կասկածյալ է ճանաչվել (այս հոդվածն ուղղակիորեն վերաբերվում է Շանթի գործով Հայկ Կյուրեղյանին, որը քաղաքական հետապնդման զոհ է):

– Եթե քաղաքական դրդապատճառներով անձն ազատազրկվել է այլ անձանց համեմատ խտրական վերաբերմունքի հիման վրա: Խտրական վերաբերմունքը նույնպես ակնհայտորեն տեսնում ենք Հայկ Կյուրեղյանի դեպքում, երբ որ նույն ժամանակ բռնության հոդվածներով իշխանության հովանավորությունն ունեցող անձանց նկատմամբ ակնհայտ մեղմ պատիժ է սահմանվում:

Եվ վերջինը, եթե ազատազրկումը սահմանվել է այնպիսի ընթացակարգի արդյունքում, որոնք ակնհայտորեն անարդարացի էին: Ես դա վերագրում եմ ոչ միայն Շանթենց, այլև` Վոլոդյա Ավետիսյանին, Վարդան Պետրոսյանին և Հիմնադիր խորհրդարանի անդամներին»,- ասաց իրավապաշտպանը:

Աղբյուրը՝ mamul.am