0 8000 12 11

Այսօր Գյումրիում ՝ «Արաքս» հյուրանոցում, սկսվել է  Ավետիսյանների ընտանիքի յոթ անդամների սպանության բացահայտման խնդիրների շուրջ հանրային առաջին քննարկումը:

Հիշեցնենք, որ ըստ միջոցառման Ֆեյսբուքյան էջի՝ նման քննարկում հրավիրելու անհրաժեշտությունը ծագել է դեպքից մի քանի օր անց, այն բանից հետո, երբ բազմաթիվ հարցեր ու հանելուկներ առաջացան, որոնք մինչև հիմա պատասխան չունեն:

Քննարկմանը այսօր  մասնակցում են «Ժառանգություն» խմբակցության պատգամավոր Զարուհի Փոստանջյանը, իրավապաշտպան Արթուր Սաքունցը եւ այլք:

Ըստ իրավապաշտպան Արթուր Սաքունցի՝  Գյումրիում հունվարի 12-ին Ավետիսյանների սպանության դրդապատճառները դեռ բացահայտված չեն:  Նա  նշեց, որ առայժմ հայտնի չէ, թե որն է այս հանցագործության շարժառիթը:  «Բացի այն ընդհանուր բանը, որ ահաբեկչություն է իրականացվել ՀՀ քաղաքացիների նկատմամբ,  բայց կոնկրետ կատարման հետ կապված շարժառիթը չկա, ոչինչ այս պահին չկա: Այսինքն՝ հայտնի չէ, թե որն է շարժառիթը, թե ինչու է Ավետիսյանների ընտանիքը ընտրված, եւ շատ կարեւոր է կատարման մեխանիզմը այսինք ՝ ով, ինչպես եւ ինչ հրահանգով է  կատարել այս հանցագործությունը: Այս հարցերի պատասխաններով  այդ  քաղաքական հնարավոր ենթատեքստը միայն է բացահայտել, իսկ եթե  չի բացահայտվում, ապա քաղաքական  ենթատեքստը ամրապնդվում է»,-նշեց Սաքունցը:

Իրապաշտպանը Սաքունցը նշեց, որ կարեւոր է ռուսական ռազմաբազայի ղեկավարության մեկնաբանությունը կատարվածի մասին, որը մինչեւ հիմա չկա:

«Ռուսական ռազմաբազայի ղեկավարությունը բացի ցավակցությունից, պետք է բացատրեր, թե ինչպես է դեպքը տեղի ունեցել, արդյոք ծառայողական քննություն նշանակվել է, եւ ովքեր են պատժվել»,-ասաց իրավապաշտպանը:

Աղբյուրը՝ armtimes.com