Պերմյակովն առաջին հերթին պետք է հանձնվի Հայաստանի իրավապահ մարմիններին. Սաքունցը վստահ է` Պերմյակովը մենակ չի եղել
15:42, January 17, 2015 | Այլ լրատվամիջոցներ, Նորություններ
Վալերի Պերմյակովն առաջին հերթին պետք է հանձնվի Հայաստանի իրավապահ մարմիններին, որպեսզի քննչական կոմիտեն կարողանա գործողություններն ամբողջական ու օբյեկտիվ իրականացնել, եթե չի հանձնվում ՀՀ-ին, ապա Պերմյակովի` այս պահին որպես կասկածյալի կողմից Ավետիսյանների ընտանիքի սպանության գործով քննության իրականացումը ռուսական իրավապահների կողմից ես կհամարեմ սուբյեկտիվ ու ոչ բազմակողմանի, որովհետև ինքը գտնվում է ռազմաբազայի հսկողության տակ, իսկ ռուսական իրավապահների հսկողության ներքո բացառում եմ դրանց իրականացումը:
Այս մասին Irakan.info-ի հետ զրույցում նշեց Հելսինկյան ասոցացիայի Վանաձորի գրասենյակի ղեկավար, իրավապաշտպան Արթուր Սաքունցը` անդրադառնալով Գյումրիի սպանությանը:
Հիշեցնենք, որ հունվարի 12-ի գիշերը Գյումրիում սպանվել է Ավետիսյանների ընտանիքի 6 անդամ, հրաշքով կենդանի է մնացել միայն վեց ամսական երեխան. սպանության կասկածյալն է համարվում ոռուսական 102-րդ ռազմաբազայի զինծառայող Վալերի Պերմյակովը:
«Խնդիրն այն չէ, թե ՀՀ իրավապահ մարմինները օբյեկտիվ են թե ոչ, խնդիրն այն է, որ ի սկզբանե արդեն ռուսական կողմն ունի սուբյեկտիվ մոտեցում, որպեսզի այդ հանցագործության իրական պատկերը կոծկվի: Այդ տեսակետից նրա հանձնումը ՀՀ իրավապահ մարմիններին շատ ավելի կապահովի օբյեկտիվությունը, այնուամենայնիվ մենք Հայաստանի իրավապահ մամինների վրա ավելի մեծ ազդեցություն ունենք, քան Ռուսաստանի իրավապահների վրա»,-ասում է Սաքունցը:
Արթուր Սաքունցի պնդմամբ շատ կարևոր է, որ ՀՀ գլխավոր դատախազը գրություն-պահանջ ուղարկի ՌԴ գլխավոր դատախազին, որպեսզի Պերմյակովին հանձնեն ՀՀ իրավապահ մամիններին:
Մեր դիտարկմանը, որ մամուլում կարծես թե տեղեկություններ կային, որ Գլխավոր դատախազի կողմից գրությունն ուղարկվել է, Սաքունցը նկատեց.
«Այս գործով բոլոր գործողությունները պետք է լինեն հրապարակային` ոչ թե մամուլում կարծիք կա, կամ ասում են… Կա գործողություն, այդ գործողության վերաբերյալ պետք է լինի համապատասխան հիմնավորող հրապարակում` մասնավորապես այդ դիմումի հրապարակայնացումը»,-նշեց նա` ընդգծելով, որ այն նախաքննության գաղտնիք չի կարող հանդիսանալ:
Իրավապաշտպանը հիշեցնում է, որ հանրային սուր հնչեղություն ունեցող նման գործի նկատմամբ պետք է հանրային պահանջմունքը բավարարվի.
«Երբ ասում եմ հրապարակայնություն չեմ ասում հարցաքննության ժամանակ նրան էս հարցերը տվեցին, ինքը սա պատասխանեց, բայց առնվազն գաղտնիք չի կարող համարվել օրինակ ռուսական ռազմաբազայի հրամանատրի հարցաքննությունը, կամ Ավետիսյանների հարևանների կամ հարազատների հարցաքննությունը, սրանք տեղեկություններ են, որոնք ոչ թե նախաքննության գաղտնիք են բացահայտում, այլ նախաքննության մարմնի կողմից գործողությունների մասին տեղեկություն են հաղորդում, որը վստահեցնում է, որ իրականացվում է նախաքննություն»,-նշեց նա:
Մեր հարցին, թե արժանահավա՞տ արդյոք այն վարկածը, որ Պերմյակովը միայնակ է եղել, ընդ որում, երբ սպանվածներին անկողիններում են գտել, իսկ մարդասպանը 3 տարբեր սենյակներում է կրակոցներ արձակել, ստացվում է կրակոցները չե՞ն լսվել մյուս սենյակներում, Սաքունցը պատասխանեց.
«Այս պահին տեղազննության արձանագրության արդյունքները կցկտուր են` 27 պարկուճ և 1 կամ 2 չկրակած պարկուճի առկայություն, մանկահասակ երեխայի գնդակահարում, 6 ամսական երեխայի սվինահարում. ընդամենն այս տեղեկատվության առկայության պարագայում ես ասում եմ, որ դա ամբողջությամբ հանդիսանում է պատժիչ գործողություն, պատժիչ գործողության ձեռագիր է, որը ոչ ոք չի կարող հերքել… Այս օբյեկտիվ տվյալները պետք է հավաքվեն, որոնց հիման վրա շատ հարցեր կարող են առաջանալ, այն որ Պերմյակովը միայնակ չի արել, դա ինձ համար կասկած չի հարուցում, որովհետև այն պատճառանությունը, որ չի ուզեցել հետք թողնի, դա ընդհանրապես անհեթեթություն է, որովհետև առավել քան հետքերը թողնված են, որը վկայում է, որ իրապես կատարողը հետքեր չպետք է թողներ, բացի էն, որ 6 ամսական երեխան չէր կարող վկա հանդիսանալ, ինքը թողնում է նաև ինքնաձիգը, այսինքն թողնում է իրեր, որոնց վրա իր անունը գրված է, բայց ձեռագրի հարց կա նաև էստեղ… Պերմյակովը 18-19 տարեկան է, ինքը հատուկ պատրաստվածություն չի անցել, հատուկ պատրասվածություն պետք է անցած լինի անձը, որ կարողանա նման սառնասրտությամբ մարդկանց սպանել: Հետևաբար խումբ է, դա միանշանակ»,-ասաց Սաքունցը:
Ինչ վերաբերում է մամուլում տեղ գտած այն տեսակետներին, որ չի բացառվում այս պատմության մեջ երրորդ երկիր ներքաշված լինի, Սաքունցը արձանագրեց, որ Ավետիսյանների սպանության դեպքը պարզապես կիզակետ հանդիսացավ, որով կենտրոնում հայտնվեցին բոլոր այն հարցերը, որոնք հայ-ռուսական հարաբերությունների հետ կապված կային: Մասնավորապես չարդարացան ԵՏՄ անդամակցությունից հայ հասարակության սպասելիքները.
«Հիմա չարածներն արդարացնել երրորդ երկրի միջամտությամբ, դա սոփեստություն է, մեղմ ասած. երկրի ղեկավարը լռում է, ԱԺ-ն լռում է` անհեթեեթ ձևակերպում տալիս, ու թող ոչ մեկին չմեղադրեն իրենց անողնաշար, անգրագետ, մեկը` ստրկամիտ, մյուսը` ստրկատեր, պահվածքով, ոչ մեկ թող երրորդ երկրին չմեղադրի հայ-ռուսական հարաբերություների փչացման հարցում, այդ հարաբերությունները փչացրել են հայկական և ռուսական կողմի պաշտոնական ներկայացուցիչները և քաղաքական իշխանությունը»,-եզրափակեց նա:
Աղբյուրը՝ irakan.info