0 8000 12 11

Գյումրեցի Ավետիսյանների ընտանիքի սպանության մեջ մեղադրվող ռուս զինծառայող Վալերի Պերմյակովի ոչ ադեկվատ վիճակի մասին փաստաբանների երեկվա ներկայացած դրվագները հերթական անգամ փաստում են, որ այս սպանության անմիջական պատասխանատուն ռուսական կողմն է: Այս մասին Lragir.am-ի հետ զրույցում ասաց Ավետիսյանների իրավահաջորդի ներկայացուցիչ Արթուր Սաքունցը: Նշենք, որ այս գործով փաստաբան Լուսինե Սահակյանը երեկ հայտարարեց, որ ռուսական կողմից հայկական կողմին փոխանցված փաստաթղթից տեղեկանում են, որ ժամանակին Պերմյակովը բազմիցս գտնվել է հոգեբույժների հսկողության տակ, բուժվել է հոգեբուժական բաժանմունքներում, այն բանից հետո, երբ զորակոչվել է բանակ: Բանակում էլ նա մշտապես ոչ ադեկվատ վարք ու ագրեսիվություն է դրսևորել, ասել էր փաստաբանն ու որպես օրինակ՝ մի քանի դրվագներ ներկայացրել: Արթուր Սաքունցի խոսքով՝ սա հերթական անգամ վերահաստատում է այն տեսակետը, որ ռուսական կողմը Գյումրիի ռազմական բազայի զինծառայողների ընտրության հարցում բծախնդիր ու ուշադիր չէ: Հետևաբար, նրա խոսքով, ռուսական բազայի ղեկավարությունն անմիջական պատասխանատվություն է կրում Ավետիսյանների ընտանիքի սպանության գործում, քանի որ իրենց հսկողության տակ գտնվող զինծառայողի կողմից է կատարվել այդ ծանր հանցագործությունը: “Բազայի ղեկավարությունը, մեծ հաշվով ռուսական կողմը, այն մարդիկ, ովքեր ընտրում են զինծառայողներին եւ ուղարկում են Հայաստան, այդ բոլոր օղակներն անմիջական պատասխանատվություն են կրում այդ ամենի համար: Դա վկայում է ռուսական բազայում տիրող ոչ առողջ մթնոլորտի, զինվորական ծառայության ոչ պատշաճ կազմակերպման մասին”,- ասաց նա: Ըստ Սաքունցի՝ նախաքննություն իրականացնող մարմինն ու Քննչական կոմիտեն անպայման պետք է այս հարցերին իրավական գնահատական տան: Ինչ վերաբերում է նրան, որ Պերմյակովին ապօրինի սահմանահատության մասով նույնպես մեղադրանք է առաջադրվել, ապա Արթուր Սաքունցը կարծում է, որ ռուս սահմանապահների գործողություններին նույնպես պետք է իրավական գնահատական տրվի: “Սահմանն ապօրինի հատելու փաստով քրեական գործ հարուցվեց, բայց մի բան պետք է հստակ նշել, որ սահմանը խախտողին հայտնաբերելուց և ձերբակալելուց հետո պետք է անպայման հանձնեին հայկական կողմին, ինչը չի արվել: Ակնկալում եմ, որ այդ ապօրինի գործողությանը նույնպես պետք է անպայման իրավական գնահատական տրվի: Այսինքն՝ տվյալ դեպքում ռուս սահմանապահների գործողությանը պետք է իրավական գնահատական տրվի”,- ընդգծեց նա: Սաքունցը նաև ասաց, որ գործի հետ կապված այն դեպքերով, որոնցով հայկական կողմն իրավական գնահատական չի տա, իրենք միջնորդությամբ հանդես կգան, որպեսզի այդ գնահատականներն անպայման տրվեն:

Աղբյուրը՝ lragir.am