0 8000 12 11

Այսուհետ Երևանի Շենգավիթ վարչական շրջանում և Վանաձորում կգործեն պրոբացիայի ծառայության պիլոտային ստորաբաժանումներ, որոնք ըստ Հայաստանի արդարադատության նախարար Հովհաննես Մանուկյանի՝ առաջիկայում Հայաստանում օրենսդրական բազա ձևավորելու հիմք կծառայեն:

«Սկսվում է այլընտրանքային պատիժների համակարգի լիարժեք ներդրում, որը վերաբերում է պրոբացիայի ծառայության ադապտացիոն շրջանին: Նորվեգիայի կառավարության և Եվրոպայի խորհրդի աջակցությամբ իրականացվող այս ծրագիրը շատ ենք կարևորում, որովհետև այն հնարավորություն է տալիս ոչ միայն համապատասխան ծառայողներին մոտեցնել այս գործընթացին, այլև արձանագրել այնպիսի կարևորագույն առկա խնդիրներ և հետևություններ անել, որոնք թույլ չեն տա օրենսդրական փուլում սխալներ գործել»,- չորեքշաբթի լրագրողներին ասել է Մանուկյանը:

Նախարարը նաև նշել է, որ միշտ որևէ նոր ծրագիր սկսելիս թերահավատություն է լինում, որ Հայաստանում դա անհնար է իրականացնել, սակայն չպետք է վախենալ և առաջ գնալ:

Պրոբացիայի ծառայության ստեղծման հիմնական նպատակը կրկնահանցագործության կրճատումը և հասարակության անվտանգության ապահովումն է՝ հանցագործություն կատարած անձի հետ բարիդրացիական հարաբերություններ հաստատելու միջոցով նրանց վերահսկելու (ներառյալ՝ հարկ եղած դեպքում հսկելու, վերասոցիալականացմանն ուղղված ծրագրեր մշակելու և իրականացնելու միջոցով), ուղղորդելու և աջակցելու ու նրանց բարեհաջող սոցիալական ներգրավումը խթանելու նպատակով:

Հելսինկյան քաղաքացիական ասամբլեայի Վանաձորի գրասենյակի նախագահ Արթուր Սաքունցի կարծիքով` պրոբացիայի ծառայության ստորաբաժանումների ընտրությունը պայմանավորված է այդ տարածքներում հանցագործությունների մեծ թվով, սակայն նա մտավախություն ունի, որ Հայաստանում այդ գաղափարը հնարավոր է արժեզրկվի:

«Պրոբացիայի ծառայությունը մարդասիրական և մարդկային արժանապատվության նկատմամբ հարգանքի ծառայություն է, որը խորքում փիլիսոփայական նշանակություն ունի: Ըստ էության, այն մարդկանց նկատմամբ, որոնք հայտնվել են այնպիսի իրավիճակում, որ մեղադրվում են հանցագործության կատարման մեջ կամ կասկածվում են, ի սկզբանե գերակայի ոչ թե պատժիչ մոտեցումը, այլ նրանց հետ այնպիսի սոցիալ-հոգեբանական աշխատանքներ կատարվեն, որ մարդը հասկանա իր մեղքը և շտկելու հնարավորություն տեսնի»,- «ԱրմենիաՆաուին» ասում է նա:

Նրա խոսքով՝ պրոբացիայի ծառայությունն անհրաժեշտ է բոլոր պետություններին և հասարակություններին, որովհետև պատմությունը ցույց է տալիս, որ պատժելով հանցագործությունների դեմ պայքարը այդքան էլ արդյունավետ չէ:

«Բայց միաժամանակ պետք է հասկանալ, թե որտե՛ղ է պրոբացիայի ծառայությունը արդյունավետ: Դրանք այն պետություններն են, որտեղ իրավունքի գերակայությունը, դատական իշխանության կամ դատավորների անկախությունը, մարդկային արժանապատվության նկատմամբ հարգանքը ձևավորվել են որպես հիմնական սկզբունքներ, այդ երկրներում են պրոբացիայի ծառայությունը հաջողում»,- նշում է նա, հավելելով, որ քրեակատարողական հիմնարկները ոչ միայն ապահովում են ազատազրկման ռեժիմը, այլ նաև օգնում են, որ անձը նորից չվերադառնա այնտեղ:

Աղբյուրը՝ www.armenianow.com