Խաղացողը Քոչարյանն էր, ոչ թե Ծառուկյանը. Նա փորձում էր չեզոքացնել նախագահի պաշտոնը «Անգլիայի թագուհու» կարգավիճակին դարձնելու Ս. Սարգսյանի ձգտումները
15:39, February 19, 2015 | Այլ լրատվամիջոցներ, Նորություններ
Փորձել քաղաքական միտք որոնել այնտեղ, որտեղ այն բացակայում է, անիմաստ է: Տեղի է ունեցել բառացիորեն «կրիմինալ ռազբորկա», ինչի հետ ժողովուրդը, ՀՀ քաղաքացին իրականում ոչ մի կապ չունի: Այս կարծիքին է իրավապաշտպան Արթուր Սաքունցը, ով համոզված է, որ անցած մի քանի օրերի զարգացումներում գլխավոր դերակատարները կամ խաղացողները երկուսն էին՝ Ս. Սարգսյանն ու Ռ. Քոչարյանը, իսկ Գագիկ Ծառուկյանն ինքնուրույն խաղացող չէր:
Ներկայացնում ենք ԳԱԼԱ-ի հարցազրույցն Ա. Սաքունցի հետ ամբողջությամբ:
-Պարո՛ն Սաքունց, ՀՀԿ-ԲՀԿ եռօրյա պատերազմը, կարելի է ասել, հաշտությամբ ավարտվեց: ԲՀԿ առաջնորդը, ով վճռական հայտարարում էր, որ ամեն ինչի պատրաստ է, այսօր հայտարարեց իր մարտավարությունը փոխելու մասին: Ինչո՞վ կարելի է բացատրել Գ. Ծառուկյանի նահանջը:
Արթուր Սաքունց
-Ս. Սարգսյանը բառացիորեն կրկնեց այն, ինչ 2008 թ.-ի Մարտի 1-ից առաջ հրապարակավ հայտնել էր նաեւ Ռ. Քոչարյանը: Այն ժամանակ Ռ. Քոչարյանը հայտարարեց՝ շատ շատերը երկար ժամանակ ճաղերի հետեւում են հայտնվելու եւ բանտերում են գտնվելու: Ս. Սարգսյանը կիրառեց նույն մեթոդը. նա հրապարակային ասաց՝ ինչ է անելու եւ սկսեց…
Եվ այն, ինչ տեղի ունեցավ, դժվարանում եմ անվանել քաղաքական գործընթաց. չկա այդպիսի բան: Նույնիսկ քննարկման առարկան այս դեպքում քաղաքական չէ իր բնույթով, հետեւաբար քաղաքական բանավեճ էլ չկա: Եվ առավել զարմանալի է, երբ որ, այսպես կոչված, քաղաքական գործիչները կամ քաղաքական վերլուծաբանները փորձում են քաղաքական միտք գտնել այնտեղ, որտեղ այն բացակայում է: Բառացիորեն «կրիմինալ ռազբորկային» տալ քաղաքական բնույթ, դա հանցագործություն է:
Կար ընդամենը հետեւյալը՝ Հայաստանը բռնազավթած եւ պոտենցիալ բռնազավթող կողմերի միջեւ կռիվ կամ «ռազբորկա»: Ավելի պարզ՝ մեկ կողմն իշխանությունը զավթել էր, մյուս կողմն էլ ասում էր՝ հիմա էլ իմ հերթն է, ես եմ ուզում զավթել:
-Այնուամենայնիվ հաշտություն կնքվեց, ինչպե՞ս…
-Այո, կնքվեց, գողական կամ «կրիմինալ ռազբորկայի» արդյունքում Ս. Սարգսյանն ասաց, որ իր ամբողջ պոտենցիալը կօգտագործի եւ դա իրապես իրականացնում էր: Մյուս կողմը գնաց զիջման, որովհետեւ չէր ուզենա կորցնել իր ունեցվածքը, իր կարողությունները:
-Բայց եւ այնպես իր հայտարարությունում Գ. Ծառուկյանն ասել էր, որ պատրաստ է ամեն ինչի, այդ թվում՝ կորուստների: Նա սխալ էր հաշվարկե՞լ, թե՞ թերագնահատել էր Ս. Սարգսյանի «հնարավորությունները»:
-Այդ հայտարարությունների մասին ասեմ, որ պետք է արդարացիորեն արձանագրենք մի բան, որ բոլորն ազնիվ էին իրենց գնահատականներում: Ս. Սարգսյանը շատ կարեւոր մի բացահայտում արեց, որ Հայաստանի Հանրապետությունը կրկեսի պետք չէ վերածել: Նա ի նկատի ուներ հենց իր «ռազբորկաները»: Իսկ Գագիկ Ծառուկյանն իսկապես մենակ փաստաթուղթ կարդացողն է, նույնիսկ չի էլ հասկանում՝ ինչ է կարդում: Եվ ես կասեմ, որ սա ոչ թե Գագիկ Ծառուկյանն, այլ Ռոբերտ Քոչարյանն էր խոսացողը, խաղացողը, հիմնական դերակատարը:
Հիշեք Քոչարյանի հայտարարությունը. նա չասաց, որ պետք է հրաժարվել Ս. Սարգսյանին անվստահություն հայտնելու կամ իշխանությունից հեռացնելու մտքից: Քոչարյանն իր խոսքում չասաց նաեւ, որ պետք է հրաժարվել արտահերթ նախագահական ու խորհրդարանական ընտրությունների գաղափարից: Ընդհակառակը՝ նա հորդորում էր Ս. Սարգսյանին չկիրառել այն մեթոդները, որոնք ինքը ժամանակին կիրառել է: Այսինքն, Ռ. Քոչարյանը բացահայտվեց, Սերժն ինքը բացահայտեց սեւ կարդինալին, որից հետո Ռ. Քոչարյանի հիմնական ներկայացուցիչը՝ Սամվել Կարապետյանը, հայտնվեց այնտեղ, որտեղ պետք էր հայտնվել: «Կրիմինալ ռազբորկան» տեղափոխվեց դեպի հաշտության տիրույթ, եւ այնպես արվեց, որ իրավիճակը չսրվի, կամ ինչպես ժողովուրդն է ասում՝ համ գայլերը կուշտ լինեն, համ էլ գառները ողջ մնան: Սա էր ամբողջը:
Բայց այս ամենը մեզ հետ կապ չունի: Սա զուտ կլանային պայքար էր իշխանությունը կիսելու կամ իրար ձեռքից փախցնելու համար:
-Քոչարյանն ի՞նչ էր ուզում: Եվ ինչո՞ւ Ս. Սարգսյանը գնաց Գ. Ծառուկյանին վարկաբեկելու եւ փոշիացնելու ճանապարհով:
Գագիկ Ծառուկյանը ոչ մի անգամ խաղացող չի եղել: Եթե անընդհատ սրա մասին ասվել է ու չեն հասկացել, ապա հիմա գոնե պարզ դարձավ: Ինքը եղել է ի սկզբանե որպես Քոչարյանի գործիք: Եվ բոլոր այն թյուրիմացություն հանդիսացող մեկնաբանությունները, որ իբր Գ. Ծառուկյանը խաղացող է, դա ավելի շատ աղճատում է իրավիճակը եւ մարդկանց էլ ապակողմնորոշում: Եվ հիմա ուրեմն շատ կարեւոր միֆ բացահայտվեց, որ չի կարող գործիքը խաղացող լինի:
Ինչ մնում է Քոչարյանին, նա ուզում էր իշխանությունը բռնազավթած, Մարտի 1-ի գնով իշխանությունը նվաճած Սերժի ձեռքից վերցնել այն, ավելի կոնկրետ՝ որպեսզի սահմանադրական փոփոխություններ չլինեն, նախագահական կառավարումից պառլամենտական անցում չլինի, որովհետեւ ինքը շատ լավ հասկանում էր, որ միայն նախագահի պաշտոնի համար իր թեկնածության առաջադրումը կարող է հնարավորություն տալ իրեն վերադառնալու: Իսկ Ս. Սարգսյանը, հասկանալի է, որ ուզում է վերարտադրվել:
Տվյալ պարագայում քանի որ Ս. Սարգսյանն էր ՀՀԿ-ի ղեկավար ուժը, Քոչարյանն ուներ միայն ԲՀԿ-ն եւ դա գործի գցեց եւ ԲՀԿ-ի միջոցով նաեւ այն քաղաքական ուժերին, որոնք իբրեւ թե ԲՀԿ-ին էին ուզում դարձնել իրենց գործիքը: Նկատի ունեմ ՀԱԿ-ին, որն ուզում էր Քոչարյանից խլել գործիքը, այն էլ Քոչարյանը բացահայտ ցույց տվեց, որ դա իր գործիքն է:
Հիմա ուզում են մեղմացել կամ թե խեղաթյուրել, թե՝ գիտեք, Ծառուկյանին մոլորեցրել է Լեւոն Տեր-Պետրոսյանը, դա աբսուրդ է: Քոչարյանն այս ընթացքում նույն Ծառուկյանի միջոցով օգտագործեց նաեւ ՀԱԿ-ին:
Մի բան պետք չէ մոռանալ, որ թե Ծառուկյանը, թե Սերժ Սարգսյանը եւ թե Ռ. Քոչարյանն իրար հետ շաղկապված են Մարտի 1-ի հանցագործությամբ: Եվ լավ հասկանում են, որ եթե մեկը մյուսի դեմ դուրս գա, ապա Մարտի 1-ի հանցագործության կոծկմանը վերջ կտրվի:
-Ի՞նչ փոխզիջման գնով եղավ հաշտությունը:
-Այս ընթացքում նախ Ս. Սարգսյանը ցույց տվեց, որ ինքը սահմանադրական փոփոխություններից հրաժարվելու միտք չունի: Այդ «գողական ռազբորկայի» արդյունքում ինչ համաձայնություն են ձեռք բերել, դա մոտակա օրերին հստակ կերեւա: Այսինքն եթե սահմանադրական փոփոխություններ կատարեն, բայց մնա նախագահական ինստիտուտն այնպիսին, ինչպիսին որ կա, Ս. Սարգսյանը կարող է արձանագրել, որ տեսեք՝ ինքն այնուամենայնիվ կատարում է փոփոխություններ, բայց միեւնույն ժամանակ Ռ. Քոչարյանն էլ շանս է ստանում նորից առաջադրվելու: Իսկ եթե նախագահական ինստիտուտն իր բովանդակությունը փոխում է, Սերժը փորձում էր նախագահի պաշտոնը «Անգլիայի թագուհու» կարգավիճակին համապատասխանեցնել: Դա նշանակում է, որ այդ «ռազբորկայի» արդյունքում, այնուամենայնիվ, Ս. Սարգսյանն իր դիրքերն ամրապնդել է:
Թե ինչպիսին է եղել արդյունքը, կիմանանք առաջիկայում: Ս. Սարգսյանը երկար սպասել չի կարող, քանի որ ժամկետին քիչ է մնում, իսկ սահմանադրական փոփոխությունները պետք է կյանքի կոչվեն:
Աղբյուրը՝ galatv.am