ՀՔԱ Վանաձորի գրասենյակի աջակցությամբ զինծառայությանը պարբերաբար պիտանի ճանաչված զորակոչիկի պիտանիության վերաբերյալ որոշումը փոխվեց
15:22, September 20, 2017 | Նորություններ, Սեփական լրատվություն | Զինծառայողների/Զորակոչիկների իրավունքներ
Վանաձորցի զորակոչիկ Ա. Գ.-ն, ունենալով տեսողության հետ կապված լուրջ խնդիրներ, 2016 թ. ձմեռային զորակոչին զինծառայությանը պիտանի է ճանաչվել եւ ծանուցվել զորակոչման մասին: Մինչ այդ՝ 2015թ. ձմեռային զորակոչի ժամանակ, առողջական վիճակով պայմանավորված, նրան 10 ամսով տարկետում է տրամադրվել:
Սակայն տարկետման ժամկետը լրանալուց հետո, առանց առողջական վիճակի համալիր հետազոտություն իրականացնելու, հիմնվելով միայն Մալայանի անվան ակնաբուժական կենտրոնի ախտորոշման վրա և անտեսելով 2016 թ. հոկտեմբերի 5-ին Երևանի Քանաքեռ – Զեյթուն ԲԿ-ում անցկացրած հետազոտությամբ արձանագրված տեսողության սրության հետ կապված խնդիրները, ՀՀ ՊՆ Կենտրոնական բժշկական հանձնաժողովը զորակոչիկին սահմանափակումով պիտանի է ճանաչել:
Ուշագրավ է, որ հանձնաժողովը, ունենալով տարբեր բժշկական հաստատություններում անցկացված հետազոտությունների արդյունքները, որոնք էապես տարբերվում են իրարից, հիմնվել է դրանցից միայն մեկի վրա և զորակոչիկի համար անբարենպաստ որոշում կայացրել:
Համաձայն չլինելով այդ որոշմանը՝ Ա. Գ.-ն հրաժարվել է զինծառայության մեկնելուց: Արդյունքում հարուցվել է քրեական գործ՝ զինվորական ծառայությունից խուսափելու հիմքով:
Իր խախտված իրավունքների վերականգնման նպատակով Ա. Գ.-ն ՀՔԱ Վանաձորի գրասենյակ է դիմել 2016-ի նոյեմբերին, որից հետո էլ Կազմակերպությունն ստանձնել է զորակոչիկի իրավունքների պաշտպանությունը: Եվ բացթողումները վերացնելու, ՀՀ ՊՆ թիվ 410-13 հրամանի համապատասխան կետով նրան փորձաքննելու հարցով դիմել է ՀՀ Պաշտպանության նախարարություն: Սակայն 2017 թ. հունվարի 25-ին Ա. Գ.-ը կրկնակի ներկայացվել է ԿԲՀ նիստին և կրկին նույն ախտորոշմամբ զինծառայությանը սահմանափակումով պիտանի ճանաչվել: Ընդ որում՝ տեսողության սրության աստիճանը այդ որոշումը կայացնելիս ևս հաշվի չի առնվել:
ՀՔԱ Վանաձորի գրասենյակը զորակոչիկի իրավունքների պաշտպանությամբ զբաղվել է նաև զինծառայությունից խուսափելու հիմքով հարուցված քրեական գործի նախաքննության շրջանակներում: Քրեական գործի շրջանակներում նշանակված դատաբժշկական հանձնաժողովային փորձաքննության արդյունքներին ծանոթանալուց հետո վարույթն իրականացնող մարմնին միջնորդություն է ներկայացվել դատաբժշկական փորձաքննության ընթացքում իրականացված բժշկական հետազոտության արդյունքները համապատասխան բժշկական հաստատությունից առգրավելու վերաբերյալ, որը բավարարվել է և ստացվել են «Սուրբ Գրիգոր Լուսավորիչ» ԲԿ-ում Ա. Գ.-ի առողջական վիճակի հետազոտության արդյունքները: Դրանք ներառում են նաև զորակոչիկի տեսողության սրության վերաբերյալ տվյալները:
Դրա հիման վրա զորակոչիկը կրկին ներկայացվել է ԿԲՀ նիստին, ուղարկվել ստացիոնար հետազոտությունների և 2017 թ. հուլիսի 31-ին՝ հերթական նիստի ժամանակ Կենտրոնական բժշական հանձնաժողովը եզրակացրել է, որ Ա. Գ.-ը զինծառայությանը ժամանակավորապես պիտանի չէ խաղաղ ժամանակ և 3 տարով տարկետում տրամադրել:
Սակայն այս որոշումը կայացնելիս ևս ԿԲՀ-ն ՀՀ ՊՆ 410 հրամանի սխալ դրույթ է կիրառել. Ա. Գ.-ի ունեցած առողջական խնդիրների պարագայում, որոնց մասին վկայում են բժշկական փաստաթղթերը, նրան պետք է փորձաքննեին Հրամանի ոչ թե 85բ, այլ 85ա կետով, որի համաձայն՝ զորակոչիկը ճանաչվում է զինծառայությանը ոչ պիտանի և հանվում հաշվառումից:
Հատկանշական է, որ մինչ այդ զորակոչիկի ներկայացուցիչ, ՀՔԱ Վանաձորի գրասենյակի իրավաբան Ս. Սողոմոնյանը բազմիցս դիմել է ինչպես ՀՀ ՊՆ Կենտրոնական բժշկական հանձնաժողովի նախագահին, այնպես էլ Հանրապետական զորակոչային հանձնաժողովի նախագահին՝ ԿԲՀ նախկին եզրակացությունները վերացնելու, զորակոչիկին վերափորձաքննելու և նրան զինծառայության համար ոչ պիտանի ճանաչելու վերաբերյալ որոշումներ կայացնելու պահանջներով:
Սակայն դրանց ի պատասխան, նույնիսկ զորակոչիկին ոչ պիտանի ճանաչելու մասին ԿԲՀ եզրակացության առկայության պարագայում ՀՀ ԶՈՒ գլխավոր շտաբի պետ Մ. Հակոբյանը 2017 թ. օգոստոսի 7-ի գրությամբ կրկին նույն պատասխանն է տվել՝ հայտնելով, որ զորակոչիկը պիտանի է զինվորական ծառայության համար և ենթակա է զորակոչման:
Այսպիսով՝ մեկ տարի շարունակ Ա. Գ.-ը պարբերաբար հետազոտվել է, ներկայացվել Կենտրոնական բժշկական հանձնաժողովի նիստերին, սակայն բոլոր դեպքերում նրան սահմանափակումով պիտանի են ճանաչել, որոնց մասին առկա են բազմաթիվ պաշտոնական նամակներ: Իսկ առողջական այն խնդիրները, որոնք հիմք են զինծառայությունից ազատվելու համար, Կենտրոնական բժշկական հանձնաժողովը ուշադրության չի արժանացրել:
 |
 |
Եվ միայն ՀՔԱ Վանաձորի գրասենյակի բողոքների ու միջնորդությունների արդյունքում ՀՀ Կենտրոնական բժշկական հանձնաժողովը փոխեց զորակոչիկի պիտանիության վերաբերյալ որոշումը՝ այնուամենայնիվ կիրառվելով ոչ համարժեք դրույթ:
Գործով հետագա գործողությունները կհստակեցվեն Ա. Գ.-ի հետ համաձայնեցնելուց հետո: