0 8000 12 11

2016 թ. նոյեմբերի 21-ին ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանում, նախագահությամբ` դատավոր Մ. Մարտիրոսյանի, շարունակվեց «Հայ կանանց ճակատի» անդամ Սուսաննա Սիմոնյանի կողմից ՀՀ Գլխավոր դատախազության հատկապես կարևոր գործերով քննության վարչության դատախազ Վ. Դոլմազյանի՝ քրեական գործ հարուցելը մերժելու մասին որոշման բողոքարկման բաց թողնված ժամկետը վերականգնելու հրաժարման դեմ ներկայացված բողոքի քննությունը: Բողոքի քննությանը մասնակցում էին Ս. Սիմոնյանի ներկայացուցիչ, ՀՔԱ Վանաձորի գրասենյակի Երևանի ներկայացուցչության իրավաբան Տաթևիկ Սիրադեղյանը, ՀՀ Գլխավոր դատախազության հատկապես կարևոր գործերով քննության վարչության դատախազ Վ. Դոլմազյանը:

Ս. Սիմոնյանի ներկայացուցիչը նշեց, որ հնարավոր չի եղել ձեռք բերել այլ փաստաթղթեր, ուստի՝ խնդրեց բողոքը քննարկել դրան կցված և դատարանում ներկայացված ապացույցների հիման վրա:  ՀՀ Գլխավոր դատախազության հատկապես կարևոր գործերով քննության վարչության դատախազ Վ. Դոլմազյանը պնդեց իր դիրքորոշումը, որի հիմնավորման նպատակով դատարան ներկայացրեց նյութերի նախապատրաստման ընթացքում կատարված դատաբժշկական փորձաքննության եզրակացության պատճենը, ինչպես նաև 2016 թ. նոյեմբերի 6-ին զանգվածային լրատվական միջոցներով հրապարակված լուսանկար: Վ. Դոլմազյանը նշեց, որ ըստ փորձագիտական եզրակացության, Ս. Սիմոնյանին տրվել է վնասվածքաբանի կոնսուլտացիայի ուղեգիր, սակայն նա այդպես էլ չի ներկայացել կոնսուկլտացիային: Միաժամանակ նա հայտնեց, որ չնայած դատական նիստին Ս. Սիմոնյանը նշել է, որ ձեռքը դեռևս չի կարողանում օգտագործել, սակայն 2016 թ. նոյեմբերի 6-ին կայացած հավաքի ժամանակ այդ ձեռքով պաստառ է պահել:  Նշված փաստաթղթերին ծանոթանալուց հետո Տ. Սիրադեղյանը նշեց, որ դատաբժշկական փորձաքննության եզրակացությամբ նշված է, որ Ս. Սիմոնյանը բուժօգնության չի դիմել վնասվածքի հետ կապված, սակայն դատարան ներկայացվել են բժշկական փաստաթղթեր, որոնք վկայում են, որ Ս. Սիմոնյանը դիմել և բուժօգնություն է ստացել: Տ. Սիրադեղյանը հավելեց նաև, որ դատական նիստին Ս. Սիմոնյանը հայտնել է ոչ թե այն մասին, որ ձեռքը չի կարողանում օգտագործել, այլ այն մասին, որ դեռևս ամբողջությամբ չի ապաքինվել և ձեռքի հետ կապված խնդիրներ ունի:  Տ. Սիրադեղյանը պնդեց ներկայացված բողոքը՝ նշելով, որ ներկայացված ապացույցները բավարար են եզրահանգելու, որ Ս. Սիմոնյանը բողոք ներկայացնելու ժամկետը բաց է թողել հարգելի պատճառով և խնդրեց այն բավարարել: Դատարանը, բողոքի քննությունը համարելով ավարտված, հեռացավ խորհրդակցական սենյակ՝ որոշում կայացնելու, այնուհետև հրապարակված որոշմամբ մերժեց ներկայացված բողոքն՝ անհիմն լինելու պատճառաբանությամբ:

Տես նաև՝ aravot.am