«ՀՀԿ-ն ինքն է վտանգի աղբյուրը՝ թե անվտանգության, թե ապահովության, թե զարգացման»
14:48, February 24, 2017 | Այլ լրատվամիջոցներ, Նորություններ
Անցած տարիներին ՀՀԿ-ն Հայաստանն ապահով չդարձրեց, հետևաբար չպետք է ակնկալել, որ այդ ուժն այսօր կարող է լուծել երկրի անվտանգության խնդիրը: Lragir.am-ի հետ զրույցում նման դիտարկում արեց իրավապաշտպան Արթուր Սաքունցը, անդրադառնալով ՀՀԿ նախընտրական կարգախոսին:
ՀՀԿ-ն որոշել է խորհրդարանական ընտրություններում հանդես գալ “Անվտանգություն և առաջընթաց” կարգախոսով:
Սաքունցի խոսքով՝ անվտանգության բաղադրիչը, որն օգտագործում է ՀՀԿ-ն որպես նախընտրական նշանաբան, տրամաբանական կապ ունի ապահով Հայաստան բաղադրիչի հետ, որը ժամանակին դարձյալ ՀՀԿ նախընտրական նշանաբանն էր:
“Բայց անցած 5 տարիների ընթացքում մենք արձանագրել ենք, որ ապահով չի դարձել երկիրը, այսինքն՝ իր նախընտրական խոստումը չի կատարել ՀՀԿ-ն: Ավելին, ապահովության ոչ թե մակարդակն է նվազել, այլ մարդիկ դարձել են անապահով թե սոցիալական տեսակետից, թե տնտեսական: Նաև ավելի վտանգվել է անվտանգությունը՝ թե ներքին, թե արտաքին առումով: Ներքին անվտանգության առումով հաշվի ենք առնում ոստիկանության կողմից շարունակվող բռնությունները, մարդու իրավունքների խախտումները”, ասաց Սաքունցը:
Նրա խոսքով՝ արտաքին առումով նույնպես վտանգված է Հայաստանի անվտանգությունը, սահմանային հատվածում հրադադարի ռեժիմի խախտումներն աճել են: Եվ բացարձակապես անհիմն է հրադադարի ռեժիմի խախտումների աճը միայն ադրբեջանական իշխանությունների վրա բարդելը, որովհետև, ըստ իրավապաշտպանի, դա նաև Հայաստանի իշխանությունների իրականացրած արտաքին քաղաքականության հետևանքն է, երբ Հայաստանն ըստ էության մեկուսացավ միջազգային հարաբերություններից և դարձավ խոցելի:
“Միաժամանակ, անվտանգության այն համակարգը, որում գտնվում է Հայաստանը՝ ՀԱՊԿ-ն, ակնհայտ ցույց է տվել իր սպառված լինելը: Բայց մինչև հիմա էլ Հայաստանի իշխանությունները համառորեն պնդում են, թե ՀԱՊԿ-ը հանդիսանում է Հայաստանի անվտանգության երաշխավորը: Եվ այդ առումով շատ տարօրինակ է առաջին հայացքից անվտանգության բաղադրիչի առկայությունը ՀՀԿ-ի նշանաբանում, որովհետև ըստ էության դա խոստովանություն է, որ ապահով Հայաստան ասածն այլևս ձախողված է, որովհետև ապահովությունն առանց անվտանգության չի լինում: Մյուս կողմից, նաև խոստովանություն է, որ իրապես արդիական է դարձել անվտանգության խնդիրը՝ որպես ՀՀ համար կենսական նշանակություն ունեցող հարց”, ասում է Արթուր Սաքունցը:
Ըստ իրավապաշտպանի՝ այստեղ մի կարևոր հանգամանք կա, որը մոռանում են ՀՀԿ ղեկավարները: Դա այն է, որ Հայաստանի անվտանգության թիվ մեկ սպառնալիքը հանդիսանում է կոռուպցիան: Հենց կոռուպցիան է, որը խարխլել է թե զինված ուժերի պատրաստվածության աստիճանը, թե հանգեցնում է նաև կարգապահության խարխլմանը:
Նաև մեր բանակի սպառազինությունների վիճակն է պայմանավորված այդ կոռուպցիայով: Կոռուպցիան անվտանգության հիմնական սպառնալիքն է, որը խժռում է վստահությունը պետական ինստիտուտների նկատմամբ, խժռում է բյուջետային միջոցները, ամբողջ պետական համակարգն ու սոցիալական ապահովությունը, ինչի հետևանքով արտագաղթ ենք արձանագրում երկրում: Այսինքն, նրա խոսքով, անվտանգություն հասկացությունը ՀՀ քաղաքացիների համար ունի բոլորովին այլ բովանդակություն, քան հասկանում է ՀՀԿ վերանախավը:
“Եվ իրենք ձախողելով ապահով Հայաստան լոզունգը, ցույց տալով իրենց բացարձակ անունակությունը կոռուպցիան հաղթահարելու հարցում, առաջարկում են մի լոզունգ, որը ոչ միայն ձախողել են, այլ նաև ունակ չեն ապահովելու: Այսինքն՝ մենք գործ ունենք հերթական խաբեության հետ: ՀՀԿ-ն հենց ինքն է հանդիսանում վտանգի աղբյուրը՝ թե անվտանգության, թե ապահովության, թե զարգացման”, հավելեց Սաքունցը: