0 8000 12 11

2016 թ. մարտի 24-ին Սիվիլիթաս հիմնադրամի կողմից Վանաձորում կազմակերպվել էր հանրային քննարկում՝ «Նոր ընտրական օրենսգիրք. ՏԻՄ ընտրությունների մարտահրավերներն ու հնարավորությունները» թեմայով:

Քննարկման բանախոսներն էին «Լուսավոր Հայաստան» կուսակցության հիմնադիր Էդմոն Մարուքյանը, Հելսինկյան քաղաքացիական ասամբլեայի Վանաձորի գրասենյակի նախագահ Արթուր Սաքունցը և իրավագիտության դոկտոր Արմեն Մազմանյանը:

Քննարկումը վարում էր Սիվիլիթաս հիմնադրամի վերլուծաբան Դերենիկ Մալխասյանը:

Քննարկմանը մասնակցում էր նաև Հայաստանի Հանրապետությունում Շվեդիայի Թագավորության դեսպան Մորթեն Էնբերգը:

Վերջինս, իր ելույթում շնորհակալություն հայտնելով կազմակերպիչներին և ներկաներին, ընդգծեց նման կարևոր թեմաների շուրջ քննարկումերին քաղաքացիաների հասարակության մասնակցությունը և հույս հայտնեց, որ դրանք շարունակական կլինեն: Դեսպանը պատրաստակամություն հայտնեց կիսվելու նաև շվեդական փորձով:

ԱԺ պատգամավոր Է. Մարուքյանն իր խոսքում անդրադարձավ Հանրապետությունում տիրող ընդդիմադիր տրամադրություններին, մասնավորապես առանձնացնելով Վանաձորը, ինչը, ըստ պատգամավորի, պայմանավորված է Վանաձորում քաղաքացիական հասարակության, ՀԿ սեկտորի, լրագրողական դաշտի, փաստաբանական համայնքի ավանդույթներով և առհասարակ քաղաքացիական հասարակության ինստիտուտների կայացմամբ:

ՀՔԱ Վանաձորի գրասենյակի նախագահ Ա. Սաքունցը տեղական ինքնակառավարման մարմինների ընտրությունը Վանաձոր և Գյումրի քաղաքներում համամասնական ընտրակարգով անցկացնելը տրամաբանական չի համարում: Բանախոսը դա պայմանավորում է նրանով, որ  Հանրապետական կուսակցությունը իրեն սպառել է այդ երկու քաղաքներում; Միաժամանակ անդրադառնալով Է. Մարուքյանի խոսքին՝ նշեց, որ Վանաձորում ընդդիմադիր ուժերը ազդեցիկ չեն:

Ա. Սաքունցն իր խոսքում կարևորեց հանրային վստահությունը ընտրական ինստիտուտի նկատմամբ:

Իրավագիտության դոկտոր Ա. Մազմանյանը իր խոսքում կարևորեց ստորագրված ցուցակների հրապարակումը, միաժամանակ անդրադարձ կատարելով բաց ցուցակների ներդրմանը, նշեց, որ դա միանշանակ դրական կամ բացասական փոփոխություն չի կարելի համարել: Ժողովրդավարության տեսանկյունից դա դրական կարող է համարվել, սակայն մեր երկրի համար դա լուրջ վտանգներ կարող է պարունակել, քանի որ այս եղանակով «թաղային հեղինակությունների» ազդեցությամբ ձայներ հավաքելու վտանգ կա:

Հայաստանի Հանրապետությունում Շվեդիայի Թագավորության դեսպան Մորթեն Էնբերգը կիսվեց ընտրությունների կազմակերպման և անցկացման շվեդական փորձով՝ նշելով, որ Շվեդիայում ևս ստորագրված ցուցակները չեն հրապարակվում, բայց դրանք համարվում են հանրային փաստաթղթեր, պահվում են համայնքապետարաններում և հասանելի են քաղաքացիների համար:

Մանրամասն տեսանյութում