Պաշտոնեական լիազորությունների չարաշահում թույլ տված ոստիկանության մայորը պատասխանատվության կենթարկվի
11:14, May 26, 2016 | Նորություններ, Սեփական լրատվություն | Ոստիկանություն
Ինչպես ավելի վաղ հայտնել էինք, իրավապահ մարմինների անօրինական գործողություններից տուժած Ռ. Գ.-ի խախտված իրավունքների պաշտպանության նպատակով ՀՔԱ Վանաձորի գրասենյակը 2016 թ. ապրիլի 12-ին դիմել է ՀՀ Գլխավոր դատախազություն՝ ՀՀ Հատուկ քննչական ծառայության անգործությունը վերացնելու և ՀՀ Քրեական դատավարության օրենսգրքի 181-րդ հոդվածի իմաստով որոշում կայացնելուն պարտավորեցնելու հարցով:
Հիշեցնենք՝ ՀՀ Հատուկ քննչական ծառայության կողմից քաղաքացու դիմումի հիման վրա ՀՔԱ Վանաձորի գրասենյակի ներկայացրած հանցագործության մասին հաղորդման առնչությամբ ՀՀ Քրեական դատավարության օրենսգրքի դրույթներին համապատասխան որևէ որոշում չի կայացվել, փոխարենը՝ հանցագործության մասին հաղորդումը գրությամբ վերահասցեագրվել է ՀՀ Քննչական կոմիտեի և ՀՀ Ոստիկանության ներքին անվտանգության վարչություններ՝ ծառայողական քննություն կատարելու նպատակով:
ՀՀ Գլխավոր դատախազությունից 2016 թ. ապրիլի 22-ի պատասխան գրությամբ փաստացի ուղղորդում են դատարան դիմել՝ նշելով, որ դիմումով պահանջվածը չի մտնում դատախազի լիազորությունների մեջ, մինչդեռ ՀՀ Քրեական դատավարության օրենսգիրքը հստակ սահմանում է, որ մինչդատական վարույթի նկատմամբ դատախազի լիազորությունների մեջ են մտնում նաև՝ հարուցել և իրականացնել քրեական հետապնդում, վերացնել հետաքննության մարմնի և քննիչի՝ քրեական գործի հարուցումը մերժելու մասին որոշումը:
Հանցագործության մասին հաղորդում ներկայացնելուց ավելի քան երկու ամիս անց՝ 2016 թ. մայիսի 17-ին, այնումենայնիվ, ՀՀ Ոստիկանության ներքին անվտանգության վարչության կողմից որոշում է կայացվել քաղաքացու հայտնած տեղեկությունների հիման վրա իրականացված ծառայողական քննության արդյունքներով պատասխանատվության ենթարկել ՀՀ Ոստիկանության Լոռու մարզային վարչության Սպիտակի բաժնի ՔՀ բաժանմունքի պետ, ոստիկանության մայոր Նարեկ Խաչատրյանին՝ քաղաքացիների հետ անհարկի խոսակցություններ վարելու և ծառայողական պարտականությունները ոչ պատշաճ կատարելու համար:
Հատկանշական է, որ ՀՀ Ոստիկանության ներքին անվտանգության վարչության գրությամբ չի հայտնվում, թե կոնկրետ ինչ պատասխանատվության է ենթարկվելու պաշտոնեական լիազորությունների չարաշահում թույլ տված ոստիկանը, ինչը, ի դեպ, քրեորոն հետապնդելի արարք է:
Միաժամանակ հայտնում են, որ ծառայողական քննության արդյունքներով կազմված եզրակացությունն ուղարկվել է ոստիկանության Լոռու մարզային վարչության պետին՝ հետագայում նման խախտումները կանխելու, ինչպես նաև՝ Ռ. Գ.-ի կողմից հայտնած մյուս հանգամանքների ուղղությամբ պատշաճ քննություն իրականացնելու համար: