ՊՆ-ն և ՀՔԱ Վանաձորի գրասենյակը համակարծիք չեն բանակում զոհված զինծառայողների թվի վերաբերյալ
18:41, January 27, 2016 | Այլ լրատվամիջոցներ, Նորություններ | Զինված ուժեր
2014 թվականին բանակում մահացությունների թիվը 46-ն է եղել, իսկ 2015-ին` 76: Ի դեպ, պետք է նշեմ, որ ցածր թիվն ունեցել ենք 2013 թվականին, որից հետո մահացությունների թիվը դինամիկ աճել է: Այս մասին այսօր «Մարդու իրավունքների պաշտպանությունը զիված ուժերում. 2015 թվականի ամփոփում» թեմայով հրավիրված ասուլիսի ժամանակ հայտարարեց Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը:
«Հրադադարի ռեժիմի խախտման հետևանքով մահացությունների թիվը կազմում է 41: 2014 թվականի համեմատ, որը կազմել էր 26, աճ կա: Ոչ պատշաճ բժշկական ծառայությունների հետևանքով մահացությունների թվի նվազում կա: Բայց զորակոչի ժամանակ, երբ որ ուսումնասիրվում է անձի առողջական վիճակը և որոշում նրա պիտանելիությունը զինվորական ծառայության ժամանակ, այ այդտեղ մենք ունենք լուրջ մտահոգություններ: Բժշկական զննության ընթացքում մոտեցումները կանխատեսելի չեն, որովհետև մի դեպքում այլ մոտեցում կա, մյուսում` այլ, որը հիմնված չէ օբյեկտիվ տվյալների վրա: Մենք ունենք մտահոգություն զորակոչման ժամանակ պատճած բժշկական ծառայություների վերաբերյալ»,- ասաց Սաքունցը:
Նա տեսակետ հայտնեց, թե Պաշտպանության նախարարի կողմից տրված կարգապահական տույժերն արդյունավետ չեն, քանի որ հրամանատարական կազմը շարունակում է նույն գործելաոճը, մինչդեռ այն պետք է սթափեցնող լինի վերջիններիս համար: Պաշտպանության նախարարի մամուլի խոսնակ Արծրուն Հովհաննիսյանն էլ հակադարձելով Սաքունցին փորձեց պարզաբանել, թե ինչու ՊՆ-ի և Սաքունցի հրապարակած տվյալները` բանակում մահացությունների թվի վերաբերյալ չեն համընկնում: Նշենք, որ ըստ ՊՆ-ի` 2015 թվականին մահացել են 57 զինծառայող, մինչդեռ Սաքունցը բարձրաձայնում է 76 զոհի մասին:
«Ծառայության հետ անմիջական կապ չունեցող դեպքերը պետք չեն դիտարկել ծառայության հետ եղած զոհերի հետ: Ես չգիտեմ` ծառայության հետ կապ չունեցող, այսինքն` պատահարների, ինֆարկտի և այլ պատճառներով մահացած զինծառայողների ընդհանուր հաշվառմամբ պարոն Սաքունցը ճիշտ թիվ է ստացել, քանի որ ես դաշտում հանդիպել եմ նաև թվեր, որտեղ ներառված է ԱԱԾ-ի զինծառայողը: Ես ամեն անգամ խնդրում եմ այս տարբերությանը մասնագիտորեն նայել, այսինքն` ծառայության հետ կապ ունեցող և չունեցող հանգամանքները տարբերել: Իսկ ծառայության մեջ գտնվող և ծառայության հետ կապ ունեցող թվերը միասին կազմում են 57: Դա անհնար է որևէ կերպ կեղծել, քանի որ ինչպես պարոն Սաքունցը, այնպես էլ շատերն օգտվում են բաց աղբյուրներից: Այո, հակառակորդի գործողությամբ է թելադրված գրեթե 57 մահերը, բայց ասել, որ գիտեք` սա է իրավիճակը և ամեն ինչ արդարացված է, չկա նման բան: Որևէ մեկին թող չթվա, որ Պաշտպանության նախարարությունը նման հագամանքներով, հակառակորդի ակտիվությամբ փորձում է սրբագործել իր թերությունները, նման բան չկա և չի կարող լինել: Չկա որևէ մեկը, հատկապես պաշտպանության նախարարը, որ ասի, թե այս մահերից մեկն արդարացված էր»,- ասաց Հովհաննիսյանը:
Տես նաև՝ panorama.am