0 8000 12 11

Տեղեկացնում ենք, որ ՀՔԱ Վանաձորի գրասենյակը զբաղվում է 2015թ. նոյեմբերի 28-ին ՀՀ ԱԱԾ Սահմանապահ զորքերի N զորամասում հրազենային վնասվածքից մահացած ժամկետային զինծառայող Գևորգ Խաչատրյանի մահվան գործով: Կազմակերպության նախագահ Արթուր Սաքունցը և իրավաբան Տաթևիկ Սիրադեղյանը հարուցված քրեական գործով ներգրավվել են որպես տուժող Գ. Խաչատրյանի իրավահաջորդ Հասմիկ Ավետիսյանի ներկայացուցիչներ՝ ստանձնելով Գ. Խաչատրյանի իրավունքների և օրինական շահերի պաշտպանությունը:

Հիշեցնենք, որ դեպքի առթիվ 2015թ. նոյեմբերի 29-ին ՀՀ Քննչական կոմիտեի ԶՔԳՎ 9-րդ կայազորային քննչական բաժնի կողմից հարուցվել է քրեական գործ՝ ՀՀ Քրեական օրենսգրքի 110-րդ հոդվածի (ինքնասպանության հասցնել) 1-ին մասի հատկանիշներով: Նախաքննության շրջանակներում մեղադրանք է առաջադրվել ուղեկալի պետ, կապիտան Մհեր Ոսկանյանին (ՀՀ Քրեական օրենսգրքի 364.1-րդ հոդվածի 2-րդ մասով, 375-րդ հոդվածի 1-ին մասով, 360-րդ հոդվածի 2-րդ մասով), ուղեկալի ավագ, ենթասպա Հովիկ Քալաշյանին  (ՀՀ Քրեական օրենսգրքի 364.1-րդ հոդվածի 1-ին մասով, 375-րդ հոդվածի 1-ին մասով), ինչպես նաև ժամկետային զինծառայող Հարություն Մուրադյանին (ՀՀ Քրեական օրենսգրքի 364.1-րդ հոդվածի 1-ին մասով, 359-րդ հոդվածի 1-ին մասով և 360-րդ հոդվածի 1-ին մասով):

Քրեական գործի նախաքննությունը շարունակվում է, և հույս ենք հայտնում, որ կկատարվի օբյեկտիվ, լրիվ և բազմակողմանի քննություն, որի շրջանակներում կբացահայտվեն Գ. Խաչատրյանի մահվան բոլոր հանգմանքները և բոլոր մեղավորները, քանզի միայն այդ դեպքում հնարավոր կլինի ապահովել արդարադատությունը և վերականգնել  սոցիալական արդարությունը:

Միաժամանակ, ցավով ենք արձանագրում, որ Գ. Խաչատրյանի մահը և նախաքննության առկա արդյունքներն արդեն իսկ վկայում են, որ զինված ուժերում, մասնավորապես սահմանապահ զորքերում չեն վերացել իրավախախտումներին հանգեցնող պատճառները, իսկ սպայական անձնակազմը հաճախ բավարար պատրաստվածություն չունի ծառայողական պարտականությունների պատշաճ կատարումն ապահովելու համար, որը հանգեցնում է հայրենիքի պաշտպանության համար զորակոչված զինծառայողների մահվան: