«Համաներման որոշումները պետք է պայմանավորված լինեն մարդասիրական մոտեցումներով, բայց այս իշխանությունը մարդասիրությամբ ոչ մի անգամ աչքի չի ընկել». Արթուր Սաքունց
15:15, December 28, 2016 | Այլ լրատվամիջոցներ, Նորություններ
Մինչև 2016-ի անկախության տոնն, անընդհատ խոսվում էր համաներման մասին, ինչը տեղի չունեցավ: Սպասում կար, որ գոնե տոնից հետո` հոկտեմբերի կեսերին, Սերժ Սարգսյանը համաներում կհայտարարի, սակայն ապարդյուն: Եթե համաներում շնորհվեց 2008թ. մարտի 1-ի գործով դատապարտվածներին, ինչո՞ւ ուրեմն այն չկիրառվեց տարբեր պատճառներով բանտերում հայտնված բազմաթիվ անմեղ մարդկանց նկատմամբ, ովքեր անազատության մեջ են գտնվում: Անդրադառնալով խնդրին` Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցն ասաց, որ համաներման մասին պաշտոնական հայտարարություն ոչ մի անգամ չի եղել, այլ եղել են միայն խոսակցություններ և ենթադրություններ, և դա հիմք չէր մտածելու, որ իշխանությունները նման քայլի կգնան: Հարցին, թե ապա ինչո՞վ էին պայմանավորված նախկինում հայտարարված համաներումները, իրավապաշտպանն ասաց. «Սերժ Սարգսյանի պրակտիկան հուշում է, որ մարտիմեկյան դեպքերի շրջանակում հայտարարված համաներումն ամենից շատ պայմանավորված էր ակնհայտ քաղաքական հետապնդումների հետևանքով ապօրինի քրեական գործերի հիման վրա դատապարտված անձանց ազատություն շնորհելու միտումներով, որը ոչ թե իրենց բարի ցանկությամբ տեղի ունեցավ, այլ Եվրոպայի խորհրդարանի վեհաժողովի մի շարք որոշումներով: Եվ որպեսզի նրանք, այսպես ասած, մի կողմից մնան իրենց իրավական որոշումներում կայուն (իմաստով, որ իրենց կողմից ճիշտ են դատապարտումները եղել, բայց մյուս կողմից էլ` փաստացի կատարած լինեն Եվրոխորհրդի հանձնարարականները), այդ նպատակով էլ համաներում կիրառեցին»:
Ըստ Սաքունցի` դրանք բացարձակապես քաղաքական որոշումներ էին` ցույց տալու համար, որ իրենք կատարում են ԵԽԽՎ հանձնարարականները: «Իրականում, եթե վերանանք նման տիպի հանձնարարականներից, ապա համաներման որոշումները պետք է պայմանավորված լինեն իրապես մարդասիրական մոտեցումներով, բայց այս իշխանությունը մարդասիրությամբ ոչ մի անգամ աչքի չի ընկել»,- կարծիք հայտնեց մեր զրուցակիցը:
