0 8000 12 11

ՀՀ դատախազությունը քրեական գործեր է հարուցել ՀՀ քննչական կոմիտեի մի շարք պաշտոնատար անձանց կողմից կատարված չարաշահումների կապակցությամբ: Քննչական ծառայությունների իրականացրած քննությունների փորձը իրավապաշտպաններին հիմք է տալիս հայտարարելու, որ քրեական գործեր ավելի շատ պետք է լինեին:

Սակայն երբ հարցին նայում ենք ՀՀ գլխավոր դատախազ Գևորգ Կոստանյանի և ՀՀ քննչական կոմիտեի ղեկավար Աղվան Հովսեփյանի փոխհարաբերության հարթությունից, հարց է առաջանում՝ ինչո՞ւ միայն քննչական կոմիտեի քննիչների նկատմամբ է գործ հարուցվել, մի՞թե Ազգային անվտանգության ծառայության, հարկային ու մաքսային կառույցների քննիչները, որոնք չեն ենթարկվում Աղվան Հովսեփյանին, որևէ խախտում թույլ չեն տվել.

«Գլխավոր դատախազը հենց այս գործերով բացահայտում է կամ վերահսկում  չպայմանավորված կոռուպցիոն գործողությունները և դրանով փորձում է գործոններ ի հայտ բերել ընդդեմ Աղվան Հովսեփյանի՝ որպես ոչ պատշաճ ղեկավարի»,- ենթադրում է իրավապաշտպան Արթուր Սաքունցը:

Վերջինս հիշեցնում է՝ երբ դեռ Աղվան Հովսեփյանը գլխավոր,  իսկ Գևորգ Կոստանյանը զինվորական դատախազ էր, ինքը բազմաթիվ անգամներ է  բարձրացրել նրանց միջև հակասության  հարցը, որոնք փաստել է նաև Արմեն Պողոսյանի, Հայկ Մովսիսյանի  և այլ  գործերով. «Այդ հակասություններում տեսնում ենք, որ մարդկային ճակատագրերը որևէ էական նշանակություն չունեն»,- ասում է իրավապաշտպանը:

Թե Գևորգ Կոստանյանը, թե Աղվան Հովսեփյանը, թե ցանկացած կառույց  ՀՀ-ում դրանք Սերժ Սարգսյանի անձնական գործիքներն են, և  իրական պատկերը  աղճատող  եզրակացություններ չանելու համար, ըստ Արթուր Սաքունցի, շատ կարևոր է հարցին նայել այս դիտակետից. «Խնդիրը կայանում է նրանում, որ ըստ էության ինստիտուցիոնալ որևէ հակասություն չի կարող լինել, որովհետև երկուսն էլ միայն մեկ նպատակի համար են ստեղծված՝ ապահովել Սերժ Սարգսյանի ռեժիմի  հրահանգների իրականացումը: Այդ կոնֆլիկտը միշտ ունի որոշակի սահման, որտեղ կառնչվի կլանի շահերին: Իսկ այս կոնկրետ դեպքում դա արտահայտություն է, թե ոչ,  սա երևի թե պետք է գործի կոնկրետ մանրամասնությունները իմանանք, նոր եզրակացություն անենք»,- ասում է Սաքունցը:

Աղբյուրը՝ galatv.am