0 8000 12 11

2016 թ. հունիսի 29-ին ՀՀ Վարչական դատարանում, նախագահությամբ՝ դատավոր Կ. Բաղդասարյանի, քննության առնվեց ՀՔԱ Վանաձորի գրասենյակի հայցը՝  ընդդեմ ՀՀ Հատուկ քննչական ծառայության՝ տեղեկատվություն տրամադրելուն պարտավորեցնելու պահանջի մասին:

Դատական նիստը կայացավ հայցվոր ՀՔԱ Վանաձորի գրասենյակի ներկայացուցիչ, Կազմակերպության Երևանի ներկայացուցչության իրավաբան Տաթևիկ Սիրադեղյանի և ՀՀ Հատուկ քննչական ծառայության ներկայացուցիչ, կառույցի քննչական աշխատանքների կազմակերպման կատարելագործման բաժնի պետի տեղակալ Տիգրան Խաչիկյանի մասնակցությամբ:

Դատական նիստի ընթացքում կողմերը հանդես եկան բացման խոսքերով:

Հայցվորի ներկայացուցիչն իր բացման խոսքում հիմնավորումներ ներկայացրեց այն մասին, որ որպես նախաքննություն իրականացնող մարմին, ՀՀ Հատուկ քննչական ծառայությունը տնօրինում է Կազմակերպության կողմից պահանջված տեղեկատվությանը, որը չտրամադրելու պայմաններում խախտվել է հայցվոր կազմակերպության տեղեկատվության ազատության իրավունքը:  Տ. Սիրադեղյանը նշեց, որ ՀՀ Հատուկ քննչական ծառայությունն իր գործունեության վերաբերյալ վիճակագրություն վարելու պարտականություն է կրում, բացի դրանից, Կառավարության որոշմամբ սահմանված կարգով հաշվետվություններ է ներկայացնում ՀՀ Գլխավոր դատախազություն և ՀՀ Ոստիկանության ինֆորմացիոն կենտրոն՝ միասնական վիճակագրություն վարելու համար:  Այդպիսով՝ ՀՔԱ Վանաձորի գրասենյակի ներկայացուցիչը պնդեց, որ ՀՀ Հատուկ քննչական ծառայությունը տնօրինում է մինչդատական վարույթի շրջանակներում իր գործունեությանը վերաբերող անհրաժեշտ տեղեկությունները, ուստի՝ համարվում է տեղեկատվության տնօրինող և պարտավոր է տեղեկատվություն փնտրողին տրամադրել հավաստի և իր տնօրինության տակ գտնվող ամբողջական տեղեկություն: Տ. Սիրադեղյանը խնդրեց բավարարել Կազմակերպության հայցը՝ պարտավորեցնելով ՀՀ Հատուկ քննչական ծառայությանը տրամադրել պահանջված տեղեկատվությունը:

ՀՀ Հատուկ քննչական ծառայության ներկայացուցիչ Տ. Խաչիկյանը, առարկելով հայցի դեմ, նշեց, որ ՀՀ Հատուկ քննչական ծառայությունը չի հանդիսանում տեղեկատվության տնօրինող, քանզի վիճակագրություն վարելու համար անհրաժեշտ տեղեկությունները տրամադրում է ՀՀ Գլխավոր դատախազություն և ՀՀ Ոստիկանության ինֆորմացիոն կենտրոն՝ հավելելով, որ հայցվորը կարող է պահանջված տեղեկատվությունն ստանալ այդ մարմիններից: Տ. Խաչիկյանը նշեց, որ ՀՀ Հատուկ քննչական ծառայության գործողությունները համապատասխանում են նաև վարչարարության իրականացման    պահանջներին:

Հայցադիմումի պատասխանի վերաբերյալ հայցվորի ներկայացուցչի հարցերին ի պատասխան՝ ՀՀ Հատուկ քննչական ծառայության ներկայացուցիչը նշեց, որ տեղեկատվության հարցում ստանալու դեպքում այն տրամադրելու հարցը դիտարկվում է ՀՀ Գլխավոր դատախազություն ներկայացվող հաշվետվությունների մեջ դրա ներառված լինելու տեսանկյունից:

Ապացույցների հետազոտման փուլում Տ. Սիրադեղյանը պնդեղ ներկայացված հայցը՝ հիշատակելով ՀՔԱ Վանաձորի գրասենյակի կողմից նույնաբովանդակ հարցումը՝ ՀՀ Գլխավոր դատախազություն, որը ևս մերժվել էր՝ ուղարկվելով ՀՀ Հատուկ քննչական ծառայություն. այս դեպքում ևս ՀՀ ՀՔԾ-ը չի տրամադրել պահանջված տեղեկատվությունը: Կազմակերպության՝ ՀՀ Գլխավոր դատախազության դեմ վարչական դատարան ներկայացված հայցը մերժվել է այն պատճառաբանությամբ, որ տեղեկատվություն տնօրինողը ՀՀ Հատուկ քննչական ծառայությունն է: Դատարանի պահանջով Տ. Սիրադեղյանը ներկայացրեց քննված գործի համարը:

Այնուհետև Տ. Սիրադեղյանը նշեց, որ ՀՀ ՀՔԾ-ի կողմից վկայակոչվող՝ Կառավարության  որոշումը իր մեջ չի ներառում այն հոդվածների վերաբերյալ տեղեկատվության տրամադրումը, որոնք ներկայացվել են Կազմակերպության հարցմամբ:  Նա հավելեց, որ Կազմակերպության կողմից ՀՀ Հատուկ քննչական ծառայության կայքէջի ուսումնասիորւթյունը ցույց է տալիս, որ դրանում հիմնականում հրապարակվում են նախաքննությունը մեղադրական եզրակացությամբ ավարտված գործերի վերաբերյալ տեղեկություններ, այդուհանդերձ՝ Կազմակերպությունը որևէ կերպ չի կարող համոզված լինել, որ կայքէջում հրապարակվում են տեղեկություններ՝ բոլոր գործերի վերաբերյալ:

Այդպիսով, Տ. Սիրադեղյանը խնդրեց բավարարել ՀՔԱ Վանաձորի գրասենյակի հայցը:

Պատասխանողի ներկայացուցիչը պնդելով, որ ՀՀ Հատուկ քննչական ծառայությունը չի հանդիսանում տեղեկատվության տնօրինող և պահանջված տեղեկատվության մի մասն ընդհանրապես ՀՀ Հատուկ քննչական ծառայության տիրապետության տակ չի գտնվում, խնդրեց մերժել ՀՔԱ Վանաձորի գրասենյակի հայցը:

Դատարանը, գործի դատախաքննությունը համարելով ավարտված, վճռի հրապարակման օր նշանակեց 2016 թ. հուլիսի 21-ը՝ ժամը 17:45-ը:

 Տես նաև՝ hcav.am