0 8000 12 11

2014 թ. մայիսի 16-ին ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում, նախագահությամբ՝ դատավոր  Ա. Բեկթաշյանի, շարունակվեց ԼՂՀ քննչական մեկուսարանում մահացած Հայկ Մովսիսյանի մոր՝ Հեղինե Պետրոսյանի ներկայացուցիչներ Արթուր Սաքունցի և Արայիկ Զալյանի ներկայացրած դիմումի քննությունը:

Հիշեցնենք, որ նախորդ դատական նիստին դիմումատուի ներկայացուցիչ Ա. Սաքունցին տրամադրվել էին ԼՂՀ գլխավոր դատախազության հատուկ քննչական բաժնի ՀԿԳ ավագ քննիչի 2013 թ. մարտի 18-ի՝ քրեական գործի մասը կարճելու մասին որոշման և թիվ 62202513 քրեական գործով վարույթը կարճելու մասին ՀՀ հատուկ քննչական ծառայության ՀԿԳ քննիչի 2013 թ. դեկտեմբերի 10-ի որոշման պատճենները՝ ծանոթանալու և դրանց վերաբերյալ դիրքորոշում հայտնելու համար:

Սույն դատական նիստին Ա. Սաքունցի կողմից ներկայացվեցին լրացուցիչ դիտարկումներ հիշյալ որոշումների վերաբերյալ: Մասնավորապես, Ա. Սաքունցը հայտնեց, որ ՀՀ ՀՔԾ-ի կողմից կայացված որոշման մեջ ներառված են ԼՂՀ գլխավոր դատախազության հատուկ քննչական բաժնում հարուցված քրեական գործի նյութերը, որով կարճվել է Հայկ Մովսիսյանին ԼՂՀ ոստիկանության քրեակատարողական վարչության աշխատակիցների և քննչական մեկուսարանի կալանավորների, ամբաստանյալների ու դատապարտյալների նկատմամբ հարուցված քրեական գործի մասը՝ նրանց արարքում ինքնասպանության հասցնելու կամ հակելու հանցակազմի հատկանիշների բացակայության հիմքով: Բացի այդ, դիմումատու Հեղինե Պետրոսյանի ներկայացուցիչը հայտնեց, որ ԼՂՀ-ում հարուցված քրեական գործի քննության բովանդակությունը վերաբերել է մահվան հանգամաքներին, ինչը ենթադրում է, որ Հայկ Մովսիսյանը պետք է ճանաչվեր տուժող, իսկ նրա մայրը՝ տուժողի իրավահաջորդ, ինչն էլ հնարավորություն կտար պաշտպանելու իրենց իրավունքները և շահերը:

Դիակի դատաբժշկական փորձաքննությունն սկսվել է Հայկ Մովսիսյանի մահվանից 12 ժամ հետո, իսկ կրկնակի դատաբժշկական փորձաքննության արդյունքում Հայկ Մովսիսյանի մարմնի վրա հայտնաբերվել են լրացուցիչ վնասվածքներ, մասնավորապես՝ քերծվածք աջ նախաբազկի երրորդական մակերեսին, որոնք պատճառվել են մինչմահու՝ բութ առարկայով: Սակայն հիշյալ հանգամանքները վարույթն իրականացնող մարմնի կողմից քննության առարկա չեն դարձել և որևէ կերպ չի պարզաբանվել, թե ինչով է պայմանավորված կենդանության օրոք բութ առարկայի հարվածների առկայությունը: Այդ վնասվածքի առնչությամբ Ա. Սաքունցը կասկած հայտնեց այն մասին, որ Հայկ Մովսիսյանի նկատմամբ բռնություն է կիրառվել, որը կարող էր դրդել Հայկ Մովսիսյանին ինքնասպանության                  (նախաքննության մարմնի վարկածի քննարկումը շրջանառության մեջ դնելու դեպքում):

Այսինքն՝ ՀՀ հատուկ քննչական ծառայությունն ունեցել է բավարար հիմքեր Հայկ Մովսիսյանին տուժող, իսկ նրա մորը տուժողի իրավահաջոդ ճանաչելու համար, մինչդեռ Հեղինե Պետրոսյանը դեռևս նախաքննության ընթացքում դիմել է Հայկ Մովսիսյանին տուժող, իսկ իրեն տուժողի իրավահաջորդ ճանաչելու պահանջով, որի քննարկումը հետաձգվել է մինչև բավարար հիմքեր ձեռք բերելը:

Բացի վերը նշված հանգամանքները, Ա. Սաքունցը նշեց, որ վարույթն իրականացնող մարմնի կողմից քննության առարկա չի դարձել նաև այն տեղեկությունը, ըստ որի Հայկ Մովսիսյանը բանակ զորակոչվելուց կարճ ժամանակ անց զորացրվել է՝ ճանաչվելով ոչ պիտանի ծառայության համար: Այսինքն՝ գնահատական չի տրվել զորակոչի պատշաճությանը կամ ծառայության ընթացքում հիվանդությունը ձեռք բերելու հանգամանքին:

Դատաքննության ընթացքում Ա.Սաքունցը խնդրեց բավարարել ներկայացված դիմումը՝ Հայկ Մովիսիյանին ճանաչելով տուժող, իսկ Հեղինե Պետրոսյանին՝ տուժողի իրավահաջորդ:

Դատարանը հեռացավ խորհրդակցական սենյակ՝ որոշում կայացնելու, որը կհրապարակվի 2014 թ. մայիսի 19-ին, ժամը 10:30-ին: